بالالار روزا رىمبايەۆا، مايرا مۇحامەت قىزىمەن بىرگە ءان شىرقادى
بيىل بۇل بايقاۋ استانا قالاسىنىڭ 20 جىلدىعىنا ارنالىپ وتىر، دەپ حابارلايدى قازاقپارات ءتىلشىسى.
ەلىمىزدەگى بالالار اراسىنداعى ەڭ اۋقىمدى ءان بايقاۋلارىنىڭ ءبىرىن ءاليا نازاربايەۆا اتىنداعى «جاندانۋ الەمى» قورى وتكىزۋدە. بايقاۋ سونىمەن قاتار، ق ر مادەنيەت جانە سپورت مينيسترلىگى مەن قازاقستان رەسپۋبليكاسىنىڭ تۇڭعىش پرەزيدەنتى - ەلباسى قورىنىڭ قولداۋىمەن ۇيىمداستىرىلىپ جاتىر.
جاڭا ماۋسىمنىڭ اشىلۋى بيىل تۇڭعىش رەت ەلوردادا ءوتتى. «بالا داۋىسى استانا جۇرەگىندە» اتتى مەرەكەلىك كونسەرتتىك باعدارلامادا ەلىمىزدىڭ تۇكپىر-تۇكپىرىنەن كەلگەن جاس ورەندەر وزدەرىنىڭ ۆوكالدىق مۇمكىندىكتەرىن پاش ەتتى. جاس انشىلەر روزا رىمبايەۆا، مارجان اراپبايەۆا، مايرا مۇحامەت قىزى، جەڭىس سەيدوللا ۇلى قاتارلى بەلگىلى انشىلەرمەن بىرگە ءان شىرقادى.
كەشكە كەلگەن قوناقتار بالالاردىڭ ورىنداۋىنداعى حالىق اندەرىن، الەمدىك حيتتەر مەن اۆتورلىق كومپوزيتسيالاردى تىڭدادى. بۇل جولعى كونيەت حورەگرافيالىق قويىلىمدارمەن، جارقىن شوۋمەن ەلدىڭ ەسىندە قالارى انىق. استاناداعى سازنادا وسى جولى شەتەلدەن كەلگەن تانىمال انشىلەر ونەرىن كورسەتتى. اتاپ ايتقاندا، قىرعىزستاننان كەلگەن «تۇمار» ءبي توبى، بەلگىلى بارابانشى گاگاش، YouTube جەلىسىنىڭ ايگىلى جۇلدىزى وزبەكستاندىق جۇرابەك جۇرايەۆ كورەرمەندى ونەرىمەن ءتانتى ەتتى.
«بالا داۋىسى-2018» ءان بايقاۋىنا سالتاناتتى تۇردە ءداستۇر بويىنشا ءاليا نازاربايەۆا باستاپ بەردى. كەشكە وقۋدا جانە سپورتتا وزات بولعان، اتا-انالار مەن مۇعالىمدەردىڭ ماقتانىشىنا اينالعان ەلىمىزدىڭ تۇكپىر-تۇكپىرىنەن كەلگەن 2600 وقۋشى مەيمان بولدى.
