تۇركىستان اۋماعىندا ارحەولوگيالىق قازبا جۇمىستارى باستالدى

    شىمكەنت. قازاقپارات - «تۇركىستان ارحەولوگيالىق ەكسپەديتسياسى» جوباسى اياسىندا «ازىرەت سۇلتان» مەملەكەتتىك تاريحي- مادەني قورىق مۋزەيى كونە شاھاردىڭ ماڭىنان ارحەولوگيالىق قازبا جۇمىستارىن باستادى.

بابايقورعان اۋىلدىق وكرۋگىنىڭ مەرگەن توبە جەرىندەگى قازبا ورنى تۇركىستان قالاسىنان سولتۇستىك- باتىسقا قاراي 33 شاقىرىم جەردە، جاڭاقورعان وزەنىنىڭ جاعالاۋىندا ورنالاسقان، دەپ حابارلايدى قازاقپارات ءتىلشىسى.

 قازبا جۇمىستارىنا 15 تەن اسا مامان قاتىسۋدا. ونىڭ ىشىندە «ازىرەت سۇلتان» قورىق- مۋزەيىنىڭ ارحەولوگى باقىتجان نۇرحانوۆ پەن نۇرجان تادجيبايەۆ تا بار. ارحەولوگ مامانداردىڭ ايتۋىنشا وبالار قۇرىلىسىنىڭ سىرتقى تۇرپاتىنا قاراعاندا بۇل ەسكەرتكىشتەر وتە قۇندى اقپاراتتار بەرەدى. اتالعان ارحەولوگيالىق قازبا جۇمىستارى ناتيجەسىندە قازىردىڭ وزىندە ەجەلگى وبالار ورنى انىقتالدى. وسى ورايدا، ارحەولوگ تالعات وسەروۆ اتالعان وبالار ەرتە تەمىر جانە ەرتە تۇرىك داۋىرلەرىنە قاتىستى دەگەن بولجام جاساپ وتىر.

وبالاردىڭ ديامەترى 23-26 م. بيىكتىكتەرى جەردىڭ دەڭگەيىنەن ەسەپتەگەندە 2 - 2,2 م بولادى. قازىرگى كەزدە وبالاردىڭ سىرتقى قۇرىلىستارى انىقتالا باستادى. ايتا كەتسەك، بيىل «ءازىرت سۇلتان» قورىق- مۋزەيى ارحەولوگيالىق قازبا زەرتتەۋ جۇمىستارىن جۇرگىزۋگە بەرىلەتىن ليسەنزياعا يە بولعان. مۋزەي تاريحىندا وسىنداي ارحەولوگيالىق قازبا جۇمىستارى مۋزەي تاراپىنان العاش رەت جۇزەگە اسۋدا.