فرانسۋز ونەرتاپقىشى سۋدا جۇرەتىن ءارى اۋەدە ۇشاتىن تاكسي ويلاپ تاپتى

استانا. قازاقپارات- فرانسۋز ونەرتاپقىشى الەن تەبو ءىرى قالالاردا وزەن ارقىلى قاتىنايتىن تازا ءارى جىلدام تاكسي قىزمەتىن قۇرماق. كولىكتىڭ ەرەكشەلىگى، ول سۋدا ءجۇزىپ قانا قويمايدى، ۇشا دا الادى.

 «تەڭىز كوپىرشىكتەرى» دەپ اتالاتىن تاكسي «ۋبەر» قوسىمشاسىنا ۇقساس. ول تەك شاھارلارداعى وزەن، سۋ ارناسى سياقتى ايدىندا عانا جۇرۋگە ارنالعان. ءبىراق قازىر تەبونىڭ جوسپارىن پاريجدە جۇزەگە اسىرۋعا سەنا وزەنىندە جۇرەتىن كەمەلەرگە قويىلعان جىلدامدىق شەكتەۋى كەدەرگى. سەبەبى، ول قاتتى جۇرمەسە، سۋ بەتىنەن كوتەرىلىپ ۇشا المايدى. دەگەنمەن ونەرتاپقىش بۇل ماسەلەنىڭ وڭ شەشىلەتىنىنە سەنىمدى. سونداي- اق مۇنداي تاكسي پاريج عانا ەمەس، سان- فرانسيسكو، دۋباي سياقتى قالالارعا ءتيىمدى ءارى قاجەت ەكەنىن ايتادى.

 الەن تەبو، ياحتاشى، ونەرتاپقىش:

- وزەندە ءجۇرۋ ءتارتىبى ىڭعايلى ءارى ءتيىمدى بولۋى كەرەك. مىسالى، بىزدە ەلەكتروموبيلدەرگە قاتىستى تالاپتار وڭتايلاندىرىلعان. مۇنى سۋدا جۇرەتىن كولىكتەرگە دە جاساۋعا بولادى. ايتالىق، قوزعالتقىشتى قۋاتتاندىراتىن ارنايى تۇراقتار كەرەك.

www.24.kz