وزبەكستاننىڭ باس پروكۋرورى جارتى ميلليارد دوللار جەپ قويعان
ەكس- پروكۋروردىڭ ءىستى بولىپ قامالعانىنان بولەك دەنساۋلىعى سىر بەرىپ، قاتاڭ رەجيمدەگى اۋرۋحاناعا ءتۇستى. كۇنى ەرتەڭ قاتاڭ رەجيمدەگى اباقتىنىڭ تورىندە وتىراتىنىنا دا كۇمان قالماعان سياقتى.
راشيد قادىروۆ تاشكەنتتەگى جۇرت اراسىنا «سانگورود» دەپ اتالىپ كەتكەن قاتاڭ رەجيمدەگى اۋرۋحاناعا وسىدان ەكى اپتا بۇرىن تۇسكەن. ەكس- پروكۋروردىڭ قان قىسىمى قاتتى كوتەرىلىپ كەتكەن كورىنەدى.
راشيد قادىروۆ «ك گ ب» - نىڭ شەكپەنىنەن شىققان كادر. ول 2000 -جىلدان باستاپ باس پروكۋرور لاۋازىمىنا ءتورت رەت تاعايىندالىپ، باس- اياعى بۇل ورىندا 15 جىل تاپجىلماستان وتىرعان. قادىروۆ ۋاقتىسىندا يسلام كاريموۆتىڭ ەڭ سەنىمدى سەرىكتەرىنىڭ ءبىرى بولعان. 2015 -جىلدىڭ كوكتەمىندە، ياعني يسلام كاريموۆ پرەزيدەنتتىك مەرزىمىنە اقىرعى رەت سايلانعاننان كەيىن قادىروۆ كەنەتتەن وتستاۆكىگە كەتتى. ونىڭ قىزمەتتەن شەتتەتىلۋىن ساراپشىلار كلانارالىق تارتىستارداعى جەڭىلىسىمەن بايلانىستىرعان. ەكس- باس پروكۋروردى العاشقىدا زەينەتكەرلىككە شىقتى دەدى، كەيىننەن ونىڭ كونستيتۋتسيالىق سوتتىڭ سۋدياسى بولعاندىعى ايتىلدى. وسىدان كەيىن قادىروۆ تۋرالى ەل اۋزىندا ءتۇرلى «اڭىز- اڭگىمەلەر» شىعا باستادى.
اقپارات قۇرالدارى ەكس- پروكۋروردىڭ قىزمەتتەن كەتۋىن ۇلى الىشەر قادىروۆپەن بايلانىستىردى. كىشى قادىروۆ بۇل كەزدە وزبەكستاندا ءىرى دۇكەندەر جەلىسىنىڭ جانە ەلگە مەديتسينالىق بۇيىمداردى جەتكىزەتىن كومپانيانىڭ باسشىسى رەتىندە بەلگىلى بولاتىن. وعان اكەسىنىڭ لاۋازىمىن پايدالانىپ، باسەكەلەستەرىن نارىقتان ىعىستىردى جانە مەملەكەتتەن ءىرى كولەمدە تاپسىرىستار الدى دەگەن ايىپتار تاعىلدى. وسى كەزدەرى لاتۆيادا قادىروۆتار وتباسىنا تيەسىلى ءىرى جىلجىمايتىن مۇلەكتەردىڭ بارى بەلگىلى بولدى. باس پروكۋراتۋرانىڭ باسقارعان جىلدارى راشيد قادىروۆتىڭ 1,5 ميلليارد دوللارلىق اكتيۆتەردى يەلەنگەنى اشكەرەلەندى.
قادىروۆتىڭ تۇتقىنعا الىنعانى بيىل اقپان ايىندا بەلگىلى بولدى. ونىڭ ۇلى الىشەر شەتەلگە قاشىپ كەتتى. قادىروۆپەن بىرگە باس پروكۋراتۋراداعى تاعى بىرنەشە لاۋازىمدى شەندىنىڭ قولىنا كىسەن سالىندى. بيىل 19 - مامىردا ءاندىجان وبلىسىنا بارعان ساپارىندا پرەزريدەنت شاۆكات ميرزيايەۆ الداعى 2-3 ايدىڭ كولەمىندە ەكس- باس پروكۋروردىڭ ۇلتتىق تەلەارنا ارقىلى حالىقتان كەشىرىم سۇرايتىنىن ءمالىم ەتتى.
- قازىر باس پروكۋرور (دالىرەگى ەكس- باس پروۋرور، رەد. ) ءوزىنىڭ سىبايلاستارىمەن بىرگە تۇرمەدە وتىر. بىرنەشە ميلليون دوللارلاپ قايتارىپ جاتىر (دالىرەگى ىشكەن- جەگەندەرىن قايتا قۇسىپ جاتىر، رەد. ) ەندى 2-3 ايدان كەيىن مەن ونىڭ تەلەديدار ارقىلى بارلىق كىنالارىن مويىنداۋىن قامتاماسىز ەتەمىن. ويتكەنى ول بارلىق جەردە سىبايلاستىق جاساعان. ءار اۋدان پروكۋرورىنان 30-40 مىڭ دوللاردان العان. ول ناعىز ۇرى بولعان. سول سەبەپتى پروكۋراتۋرا ورگاندارىنداعى كادرلاردىڭ 70 پايىزى قۋىلدى. مەن ول جەرگە ادال ازاماتتاردى الىپ كەلدىم. ەگەر كىمدە كىم ساتقىندىق جاساسا، ولار دا وسىلاردىڭ كەبىن قۇشادى، - دەدى پرەزيدەنت.
راشيد قادىروۆقا قىلمىستىق كودەكستىڭ ءۇش بابى بويىنشا: بوپسالاۋ، قىزمەت بابىن اسىرا پايدالانۋ جانە پارا الدى دەگەن ايىپتار تاعىلعان. ىشكى ىستەر مينيسترلىگى ونىڭ ۇلى الىشەرگە حالىقارالىق ىزدەۋ جاريالادى. كىشى قادىروۆقا الاياقتىق جانە بوپسالاۋ باپتارى بويىنشا ايىپ تاعىلعان. بۇگىنگى كۇنى اكەلى- بالالى قادىروۆتاردىڭ ۇستىنەن جارتى ميلليارد دوللار كولەمىندەگى قارجىنى ءوندىرۋ جونىندە تالاپ ارىز بەرىلگەن.
بيىل ناۋرىزدا شاۆكات ميرزيايەۆ ۇلتتىق قاۋىپسىزىدك قىزمەتىن مەملەكەتتىك قاۋىپسىزدىك قىزمەتى دەپ قايتا قۇردى.
- ۇلتتىق قاۋىپسىزدىك قىزمەتى باسشىلارىنىڭ 20 پايىزى ۇرىلار بولاتىن. ءبىراق قاراپايىم قىزمەتكەرلەر اراسىندا ادال ازاماتتار از ەمەس. مەن ولاردى باسپانامەن قامتاماسىز ەتىپ، جالاقىلارىن كوتەرەمىن، - دەدى پرەزيدەنت. ميرزيايەۆ ەلدەگى مۇعالىمدەردىڭ جالاقىلارىن 10 ەسەگە دەيىن كوتەرەتىنىن، الايدا ءدال قازىر ەل ەكونوميكاسى مۇنى كوتەرە المايتىنىن ءمالىم ەتتى.
http://www.oinet.kz