استانادا مەملەكەتتىك رامىزدەر كۇنىنە وراي «كوك تۋدىڭ جەلبىرەگەنى» اتتى اكسيا وتەدى

استانا. قازاقپارات - 27 - مامىردا استانالىق ساياباقتا قازاقستان رەسپۋبليكاسى مەملەكەتتىك رامىزدەرى كۇنىنە وراي «كوك تۋدىڭ جەلبىرەگەنى» اتتى تانىمدىق ءىس- شارا وتكىزىلەدى، دەپ حابارلايدى ەلوردا اكىمدىگىنىڭ رەسمي سايتى قالالىق تىلدەردى دامىتۋ جانە ارحيۆ ءىسى باسقارماسىنا سىلتەمە جاساپ.

شارانىڭ ماقساتى - تۇرعىنداردىڭ تۋ، ەلتاڭبا، گيمن تۋرالى تۇسىنىكتەرىن نىعايتۋ. رامىزدەردىڭ پايدا بولۋى جانە تاريحتاعى ماڭىزى جايلى تۇسىنىكتەردى دامىتۋ. قازاقستان رەسپۋبليكاسىنىڭ مەملەكەتتىك رامىزدەرىن جان- جاقتى ءتۇسىندىرۋ ارقىلى ادامداردىڭ بويىندا پاتريوتتىق سەزىمدى قالىپتاستىرۋ، تۋعان جەرىنە، ەلىنە دەگەن سۇيىسپەنشىلىككە باۋلۋ، ۇلتتىق نىشاندارىنا زور قۇرمەت، شىنايى سەزىم، ۇلتتىق رۋح تۇرعىسىندا قاراۋعا داعدىلاندىرۋ.

كورەرمەندەردىڭ نازارىنا كونسەرتتىك باعدارلاما ۇسىنىلادى، وندا قازاق ەستراداسىنىڭ بەلگىلى انشىلەرى ەدىل قۇسايىنوۆ، يبراگيم ەسكەندىر، دوس، قۇرماش ماحان ونەر كورسەتەدى.

سونىمەن قاتار، كورەرمەندەرمەن سۇراق- جاۋاپ رەتىندە ۆيكتورينا ويناتىلىپ، دۇرىس جاۋاپ بەرگەندەرگە سىيلىقتار تابىستالادى.