قازالىدا جۇمباعى اشىلماعان ۇستاحانا بار
تەمىردەن ءتۇرلى تۋىندى مەن زەرگەرلىك بۇيىم جاسالاتىن كيەلى ۇستاحانا جالەن ەرىمبەت ۇلىنىكى ەكەن. ول كىسى ەل اۋزىندا «جالەن اتا» دەپ اتالىپ كەتكەن. قۇپيا سىردى بۇككەن ۇستاحانانىڭ يەسى 1902-1982 -جىلدارى ءومىر سۇرگەن.
بولكول اۋىنىڭ تۇرعىنى، ۇستا ءمىناجات قانيەۆتىڭ ايتۋىنشا، جالەن جاستايىنان ۇلكەن دۇكەن ۇستاعان ۇستا اناربەك ەلبەسباي ۇلىنىڭ بالعا ۇرۋشىسى جانە شاكىرتى بولعان.
«كەلە- كەلە جاكەڭنىڭ قولىنىڭ ەپتىلىگى، شەبەرلىگى اناربەك ۇستاعا ۇناعان كورىنەدى. اناربەكتىڭ ءناجاۋ، ماحان دەگەن ەكى بالاسى بولعان. ەكەۋى دە اكەسىنە جۋىماي، قارا دۇكەنگە يە بولىپ قالۋعا ىڭعاي تانىتپاپتى. سونىمەن، قارا دۇكەن جالەن اتاعا بۇيىرىپ، التىن- كۇمىستەن اشەكەي بۇيىمدار، ات ابزەلدەرىن جاسايتىن زەرگەرگە اينالادى»، - دەيدى ءمىناجات قاريا.
جالەن ۇستا قايتىس بولعاننان كەيىن قارا دۇكەنگە بالاسى ساحيت يەلىك قىلعان. ول دا اسقان شەبەر، زەرگەر ادام بولعان.
«ول كىسىنىڭ جاساعان بۇيىمدارى قازىرگە كەزدە مۇراجايلارعا قويىلىپ، كوپشىلىكتىڭ نازارىنا ۇسىنىلعان. ساحيت اعامىز كوزى ءتىرى كەزىندە اكەسى جالەن اۋليە جاتقان اۋىلدىڭ باتىسىنداعى «الدامجار» بەيىتىنىڭ قاسىنان ورىن الىپ، جاكەڭە زيارات ەتىپ كەلگەندەرگە ارناپ، تۇنەۋحانا سالدى. جانىندا سۋ ساقتايتىن قۇدىعى، سارايى، اس ازىرلەيتىن شايلاسى بار. تاعى ءبىر ارنايى بولمەگە جاكەڭ تۇتىنعان قارا دۇكەننىڭ قۇرالدارى قويىلعان. بولمەنىڭ ەسىگىنىڭ ماڭدايشاسىندا «امانات» دەگەن جازۋ بار. ول جازۋدا ايتارلىقتاي ماعىنا جاتىر. سەبەبى، امانات - ءساحيتتىڭ كەنجە بالاسىنىڭ اتى. كەلەشەكتە قارا دۇكەنگە يە بولاتىن اتا جولىن ۇستايتىن وسى بالا بولادى- اۋ دەگەن ۇلكەن ءۇمىت ارتقان بولۋى كەرەك»، - دەيدى ءمىناجات قاني ۇلى.
ونىڭ ايتۋىنشا، ساحيتتىڭ بولجامى، ويلاعان ارمانى ءدال كەلىپ، بۇگىندە اماناتى قارا دۇكەنگە يە بولىپ، اكەسىنىڭ جولىن قۋدى.
ال امانات ۇستا جالەن اتاسىنىڭ كوزىنە جانارى قىپ- قىزىل وت بولىپ جۇرەتىن ءبىر ءۇيىر جىلقى مەن جىلان كورىنەتىنىن ايتادى. ول جىلاندى اكەسى ساحيت كورگەن ەكەن.
«ءبىزدىڭ ۇيگە ىشىمدىك ىشكەن ادام كەلسە، الدىنان ۇزىن قارا جىلان اتىپ شىعىپ، ىسىلداپ تۇرىپ الادى. كەزىندە سول كەرەمەتتى كورگەن ادام ءاپ- ساتتە تالىپ تا قالاتىن. ۇستاحانا ءىسىن بىزگە تاستاۋعا بولمايدى، ءبىزدىڭ ماقساتىمىز - كيەلى ورىندى تازا ۇستاپ، كورىك باسىپ، بالعا ۇرىپ، ءتوس سوعۋ، سول ارقىلى ەلگە قىزمەت قىلۋ. بۇل «قارا دۇكەننىڭ» ىشىندە ادام بولماسا دا كەي مەزگىلدەرى دۇرسىلدەگەن، تارس- تۇرس ەتكەن داۋىس شىعىپ جاتادى»، - دەيدى امانات.
سونىمەن قاتار، جالەن ۇستانىڭ نەمەرەسى ءلاززات جالەنوۆانىڭ ايتۋىنشا، اتاسىنىڭ ۇستاحاناسى پەرى اۋناعان جەرگە سالىنعان كورىنەدى.
«ۇستالاردىڭ جۇمىس ورىنىن حالىق «قارا دۇكەن» دەپ اتايدى. اتام ءارۋاق قونعان كىسى. جىن- پەرىلەردى جۇمسايتىن بولعان. قالىڭ قامىستىڭ اراسىنا ءبىر قولى جوق بولسا دا ءوزى كىرىپ كەتىپ، پىشەن ءشوبىن ورادى ەكەن. سوندا وعان پەرىلەر كومەكتەسەتىن كورىنەدى. راسىندا كورىك باساتىن ۇستالىق ونەر كەز كەلگەن جانعا بۇيىرا بەرمەيتىن كيەلى ءىس قوي. اتامىزدىڭ ءبىر قولى بولماعان، سوعان قاراماستان شەبەر ۇستا بولعان. تەمىردەن ءتۇرلى بۇيىمداردى جاساپ شىعاراتىن. زەرگەرلىك ونىمدەرى دە وتە ادەمى»، - دەيدى ءلاززات جالەنوۆا.
جالەن اتا دا، ونىڭ بالاسى ساحيت ۇستا دا ومىردەن وتكەنىمەن، قارا دۇكەننىڭ كيەسى جويىلعان جوق.
«قارا دۇكەنگە دەرتىنە شيپا ىزدەگەن جاندار ءالى كۇنگە دەيىن كەلىپ تۇرادى. ساحيت اعامىزدىڭ زايىبى 70 جاستاعى ون بالانىڭ اناسى كۇلاش ەم ىزدەگەندەرگە انالىق اق باتاسىن بەرىپ، حالىققا قىزمەت ەتۋدە»، - دەيدى ءمىناجات قاريا.
اۆتور: سارسەنقۇل نازار