وتاندىق شىعارمالار الەمنىڭ التى تىلىنە اۋدارىلادى

None
None
استانا. قازاقپارات - ەلباسىنىڭ باستاماسى «رۋحاني جاڭعىرۋ» باعدارلاماسى اياسىندا قازاق قالامگەرلەرىنىڭ شىعارمالارى الەمنىڭ التى تىلىنە اۋدارىلاتىن بولدى. تارجىمامەن الەمگە تانىمال وقۋ ورىندارىنىڭ ماماندارى اينالىسپاق.

 شەت تىلدەرىنە اۋدارىلعان شىعارمالار تەك كىتاپ تۇرىندە عانا ەمەس، ەلەكتروندى جانە اۋديو نۇسقادا شىعارىلادى. پرەزيدەنت اكىمشىلىگىنىڭ باستاماسىمەن قولعا الىنعان اۋدارما جوباسىنا قانشا اۆتوردىڭ ەڭبەگى ەنەدى؟

 بىرىككەن ۇلتتار ۇيىمىنىڭ التى تىلىنە اۋدارىلاتىن انتولوگيانىڭ ءبىرىنشى تومى -  پروزاعا، ەكىنشىسى زاماناۋي پوەزياعا ارنالماق. الەم تىلدەرىنە ءتارجىمالاناتىن شىعارمالاردىڭ تىزىمىنە تاۋەلسىزدىك جىلدارىندا ەڭبەك ەتكەن قالامگەرلەردىڭ شىعارمالارى ەنەدى. 500 بەتتەن تۇراتىن ەكى تومدىق كىتاپتىڭ ءارقايسىسىنا 30 شاقتى اۆتوردىڭ اتى كىرمەك. اكادەميالىق باسىلىمدار الەمنىڭ جەتەكشى ۋنيۆەرسيتەتتەرى مەن عىلىمي ورتالىقتارى، سونداي- اق كىتاپحانالارعا تەگىن تاراتىلادى. ال نارىقتىق باسىلىمداردىڭ ەلەكتروندى جانە اۋديو نۇسقالارى دا جاسالماق.

 ايدا بالايەۆا، ق ر پرەزيدەنتى اكىمشىلىگى ىشكى ساياسات ءبولىمىنىڭ مەڭگەرۋشىسى:

 - شاعىنداۋ، قالىڭ وقىرمانعا ارنالعان نارىقتىق باسىلىم دايىندالادى. ول كىتاپ ساتاتىن جەرلەر مەن «امازون» سياقتى ونلاين فورمالار ارقىلى جاپپاي ساتىلىمعا شىعارىلادى. نارىق الىپ كەتەتىندەي، سول شەتەلدىك وقىرماندارعا قىزىقتى اۆتورلاردى انىقتاۋعا سەپتىگىن تيگىزەدى دەپ ويلايمىن. بۇل جەردە سول اۆتورلارمەن كەزدەسۋ، ءسوزىمنىڭ باسىندا ايتتىم عوي، مادەني قارىم- قاتىناستى نىعايتىپ، ونى كەڭەيتۋ.

 بۇگىندە كوميسسيا قۇرىلىپ، جوبا جەتەكشىلەرى انىقتالعان. قۇرامىندا پرەزيدەنت اكىمشىلىگىنەن باستاپ، جازۋشىلار وداعىنىڭ مۇشەلەرى دە بار. ۇيىمداستىرۋشىلاردىڭ ايتۋىنشا، اعا بۋىننان 17 قالامگەر، 45 جاستان جوعارى ورتا بۋىن وكىلدەرىنەن 11 جازۋشى تاڭدالعان. پوەزيا جانرىندا جاستارعا دا دەن قويىلعان.

الىبەك اسقاروۆ، ق ر مەملەكەتتىك سىيلىعىنىڭ لاۋرەاتى، جازۋشى:

- جالپى ءبىزدىڭ قازاق ادەبيەتىندەگى ءبىر ۇلكەن ورنىن تولتىرا الماي جۇرگەن كەلەڭسىزدىك دەيمىز بە، كەمشىلىك دەيمىز بە؟ سول نەبىر ءىنجۋ- مارجان جاقسى شىعارمالاردى شەتەلگە تانىتۋ. وزىمىزدە عانا بىلەمىز، شەتەلگە تانىتۋ جاعى وتە اۋىر، قيىن جاعداي ەدى. سوعان بايلانىستى وسى ەلباسىنىڭ «رۋحاني جاڭعىرۋ» ماقالاسى اياسىندا قازىر ۇلكەن قالامگەرلەر اراسىندا سەرپىلىس بار.

 قازاق اۆتورلارىن اۋدارۋمەن كەمبريدج ۋنيۆەرسيتەتى، گەرمانيادا گيەتە، ال رەسەيدە پۋشكين اتىنداعى ينستيتۋتتىڭ بىلىكتى ماماندارى اينالىسپاق. يسپان تىلىندەگى انتولوگيامەن سەرۆانتاس، فرانسۋز تىلىمەن فرانسۋزدار اليانسى، ال قىتاي تىلىندە جارىق كورەتىن وقۋلىقتاردى كونفۋتسيي ينستيتۋتىنىڭ ماماندارى اۋدارادى.

سماعۇل ەلۋباي، جازۋشى، كينودراماتۋرگ:

- كىتاپ تاراتۋدىڭ، اۋدارۋدىڭ، شىعارۋدىڭ، ناسيحاتتاۋدىڭ كاسىبي ادامدارى -  ادەبي اگەنتتىكتەر. قازاقستاندا جۇمىس ىستەيتىن التى ءتىل دەپ وتىرمىز عوي. سول التى تىلدەن التى اگەنتتى تابا الساق، ولار سۇمدىق كومەكتەسكەن بولار ەدى. ءبىراق بۇل باستاما تەك ەكى توممەن شەكتەلمەيدى.

 پرەزيدەنت اكىمشىلىگىنىڭ قولداۋىمەن ءارى قاراي جالعاساتىن اۋقىمدى شارانىڭ كەلەسى اۋدارمالارىنا وسى جولى تىزىمگە ىلىنبەگەن اۆتورلاردىڭ شىعارمالارى ەنگىزىلەدى. «رۋحاني جاڭعىرۋ» باعدارلاماسى قولعا الىنعان ءبىر جىل كولەمىندە ونداعان كىتاپ وزگە تىلگە اۋدارىلىپ، «100 جاڭا ەسىم» انىقتالدى. ودان بولەك لاتىن قارپىنە كوشۋ ۇسىنىسى دا قابىلداندى. الداعى ۋاقىتتا «ادەبي ولكەتانۋ» جوباسى شەڭبەرىندە ارنايى شىعارماشىلىق توپتار قۇرىلىپ، وڭىرلەرگە ەكسپەديتسياعا اتتانادى.

www.24.kz

سوڭعى جاڭالىقتار