قىزىلوردادا اباي قۇنانبايەۆ مەكتەپ ءبىتىردى
قازاقتىڭ ۇلى اقىنىمەن ەسىمى دە، تەگى دە بىردەي جاس ورەن قاشاندا سول ارداقتى اتقا كىر كەلتىرمەۋگە تىرىسادى. ءاردايىم ءوزىن قىرلارىمەن تانىتۋعا كۇش سالادى. ونىڭ اتاسى قۇنانباي نەمەرەسى دۇنيەگە كەلگەندە ويلانباستان اباي ەسىمىن قويعان.
«اباي اتامىزدىڭ حالقىمىز ءۇشىن وتە قادىرلى ەكەنىن جاقسى بىلەمىن. بۇل مەن ءۇشىن ۇلكەن جاۋاپكەرشىلىك جۇكتەيدى. ۇيدەگى ۇلكەندەر ول جايىندا ءجيى ايتىپ وتىرادى. مەنىڭ ەسىمىم مەن تەگىمدى العاش ەستىگەندەر تاڭعالىس بىلدىرەدى. قايتالاپ سۇرايتىندارى دا كەزدەسەدى. سول سەنىمدى اقتاۋعا كۇش سالامىن»، - دەيدى جاس تۇلەك.
اباي الدىنا ۇلكەن ماقسات قويىپ وتىر. ءوزى ەنەرگەتيكا سالاسىندا قىزمەت ەتكىسى كەلەدى. جالپى، بۇل ماماندىق يەلەرى اۋىلدىق جەرلەردە سيرەك كەزدەسەدى. سوندىقتان اباي كەلەشەكتە تۋعان اۋىلىنا قىزمەت ەتكىسى كەلەدى.
سىر وڭىرىندە قازاقتىڭ اتاقتى ازاماتتارىمەن ەسىمى دە، تەگى دە ءبىر ازاماتتار كوپتەپ كەزدەسەدى. ولاردىڭ قاتارىندا ىبىراي التىنسارين، شوقان ءۋاليحانوۆ، بيبىگۇل تولەگەنوۆا، مۇقاعالي ماقاتايەۆ، راقىمجان قوشقاربايەۆ، مۇحتار شاحانوۆ، ءمادينا ەراليەۆا، مەيرامبەك بەسپايەۆ سىندى جاستار كوپ.
بۇگىن قىزىلوردا وبلىسىندا 7113 جاس تۇلەك مەكتەپ ءبىتىردى. ولاردىڭ 4821- ءى ۇلتتىق ءبىرىڭعاي تەستىلەۋ سىناعىنا قاتىسۋعا نيەت ءبىلدىرىپ وتىر. تۇلەكتەردىڭ اراسىندا 343- ءى «التىن بەلگىگە» ۇمىتكەر بار.
ءادىلجان ۇمبەت