ازاماتتاردىڭ بارلىق ساناتتارىنا ارنالعان ارزان پاتەرلەر ساتىلا باستادى

استانا. قازاقپارات - «نۇرلى جەر» تۇرعىن ءۇي قۇرىلىسى باعدارلاماسى وپەراتورلارىنىڭ ءبىرى - «بايتەرەك ديەۆەلوپمەنت» ا ق ازاماتتاردىڭ بارلىق ساناتتارى ءۇشىن قولجەتىمدى تۇرعىن ءۇيدى ساتۋعا شىعارادى.

  بۇل تۋرالى قازاقپارات كومپانيانىڭ باسپا ءسوز قىزمەتىنە سىلتەمە جاساپ حابارلايدى.

بۇگىنگى كۇنى اقتوبە، قوستاناي، قىزىلوردا، پاۆلودار، تاراز، ورال، شىمكەنت، ەكىباستۇز قالالارىندا دايىن تۇرعىن ۇيلەر ساتىلىپ تا جاتىر. كەلەشەكتە بۇلارعا باسقا وڭىرلەر دە قوسىلا الادى.

«باستاپقىدا «نۇرلى جەر» باعدارلاماسى بويىنشا سالىنعان تۇرعىن ۇيلەر تۇرعىن ءۇي قۇرىلىس جيناق بانكىنىڭ سالىمشىلارىنا ارنالعان ەدى. «بايتەرەك ديەۆەلوپمەنت» ا ق جىلجىمايتىن مۇلىك وبەكتىلەرىن وتكىزۋ قاعيدالارىنا سايكەس جارتى جىلدان كەيىن قالعان پاتەرلەر نارىقتىق شارتتارمەن ساتۋعا شىعارىلادى جانە بۇل تۇرعىن ءۇيدى كەز كەلگەن قازاقستاندىق ازامات ساتىپ الا الادى»، - دەپ ناقتىلادى «بايتەرەك ديەۆەلوپمەنت» ا ق باسقارما ءتوراعاسىنىڭ ورىنباسارى اسقاربەك وسەربايەۆ.

 شارشى مەتر قۇرىلىسىنىڭ قۇنى - تۇراقتى. استانا، الماتى، اتىراۋ جانە اقتاۋ قالالارى ءۇشىن ول شارشى مەترى 200 مىڭ تەڭگەدەن، باسقا قالالار ءۇشىن - 180 مىڭ تەڭگەدەن اسپايدى. كەيبىر وڭىرلەردە تۇرعىن ءۇيدى ساتىپ الۋشىلار باعدارلامامەن بەلگىلەنگەن پارامەترلەردەن تومەن باعامەن ساتىپ الا الادى. مىسالى، شىمكەنتتە اۋقىمى 40 ش. م. ءبىر بولمەلى پاتەردى 7 ميلليون تەڭگەگە ساتىپ الۋعا بولادى. ورالدا ۇقساس پاتەردىڭ قۇنى 5,6 ميلليون تەڭگەدەن، قوستانايدا - 5 ميلليون تەڭگەدەن، پاۆلوداردا - 6,3 ميلليون تەڭگەدەن باستالادى. بارلىق تۇرعىن ۇيلەر تازا ارلەنگەن جانە جايلىلىقتىڭ ءۇشىنشى سىنىبىنا جاتادى.

«بۇل رەتتە ۇسىنىس جەكە تۇلعالارعا دا، زاڭدى تۇلعالار دا تارالادى. ءوز قىزمەتكەرلەرىن تۇرعىن ۇيمەن قامتاماسىز ەتۋگە مۇددەلى كەز كەلگەن ۇيىم digital.baiterek.gov.kz ونلاين- پلاتفورماسىندا «قولجەتىمدى تۇرعىن ءۇي» ءبولىمى ارقىلى پاتەر ساتىپ الۋ ءۇشىن ءوتىنىم جولداي الادى»، - دەپ تولىقتىردى ا. وسەربايەۆ.

ساتىپ الۋشىلارعا تولەم قابىلەتتىلىگىنەن باسقا قويىلاتىن نەگىزگى تالاپتار جەكە تۇلعالار ءۇشىن - قازاقستان رەسپۋبليكاسى ازاماتتىعىنىڭ بولۋى؛ زاڭدى تۇلعالار ءۇشىن - قازاقستان رەسپۋبليكاسى اۋماعىندا تىركەلۋى جانە ءوز قىزمەتىن جۇزەگە اسىرۋى بولىپ تابىلادى.

 پاتەردى ءوز قاراجاتتارىنىڭ ەسەبىنەن نەمەسە ەكىنشى دەڭگەيدەگى بانكتەردىڭ يپوتەكالىق قارىزدارىن تارتۋ جولىمەن ساتىپ الۋعا بولادى. قازىرگى ۋاقىتتا «نۇرلى جەر» بويىنشا يپوتەكانى كومپانيانىڭ سەرىكتەس- بانكتەرى: ا ت ف- بانك، ۆ ت ب، سبەربانك، Centrcredit ۇسىنادى. تۇرعىن ءۇي قۇرىلىس جيناق بانكىندە جيناعى بار سالىمشىلار تۇرعىن ۇيگە بۇرىنعىشا قول جەتكىزە الادى.