بالىق شارۋاشىلىعىنا ارنالعان دەربەس اگەنتتىك قۇرۋ قاجەت - سەناتور
بۇل تۋرالى سەناتتا بالىق شارۋاشىلىعىن دامىتۋ ماسەلەسىنە ارنالعان وتىرىستا دەپۋتات سارسەنباي ەڭسەگەنوۆ ءمالىم ەتتى، دەپ حابارلايدى قازاقپارات ءتىلشىسى.
«ەلىمىزدە بالىق ونىمىنە سۇرانىس جوعارى. بۇل سالانى دامىتۋ مۇمكىندىگى دە زور. ەندەشە، «وسى سالانىڭ ورنىقتى دامۋىنا، باسەكەگە قابىلەتتى بولۋىنا، يمپورتتى الماستىرىپ، ەكسپورتتى ۇلعايتۋىنا نە كەدەرگى؟» دەگەن سۇراقتىڭ تۋىنداۋى زاڭدى. مەنىڭ ويىمشا، بۇعان جۇيەلى تۇردە شەشۋدى قاجەت ەتەتىن بىرنەشە سەبەپتەر بار. بىرىنشىدەن، بالىق رەسۋرستارىن مەملەكەتتىك باسقارۋدىڭ ءتيىمدى جۇيەسى جوق. تاۋەلسىزدىك جىلدارىندا بالىق جونىندە ورتالىق مەملەكەتتىك ورگان بىرنەشە رەت قۇرىلىمدىق وزگەرىستەرگە ۇشىرادى. قازىرگى ۋاقىتتا بۇل سالا قر اشم ورمان شارۋاشىلىعى جانە جانۋارلار دۇنيەسى كوميتەتىنە بىرىكتىرىلگەن. «بالىق» دەگەن ءسوزدىڭ كوميتەت اتاۋىندا جوق ەكەنىن بايقاپ وتىرعان شىعارسىزدار»، - دەپ توقتالدى سەناتور.
ونىڭ پايىمىنشا، بالىق رەسۋرستارىن باسقارۋ جونىندە ورتالىق مەملەكەتتىك ورگاننىڭ تۇراقتى بولماۋى، ونىڭ قازىرگى ۋاقىتتاعى مارتەبەسىنىڭ تومەندىگى اتالعان سالادا ناتيجەلى مەمساياساتتى جۇرگىزۋگە قولبايلاۋ بولۋدا.
«مەن ۇكىمەتكە بالىق شارۋاشىلىعىنىڭ الەۋمەتتىك- ەكونوميكالىق ماڭىزدىلىعىن ەسكەرە وتىرىپ، ءوز الدىنا دەربەس اگەنتتىك قۇرۋ قاجەتتىگىن ايتقان بولاتىنمىن. بۇگىندە دە وسى پىكىردەمىن. وسى ورايدا بالىق شارۋاشىلىعىنا جاۋاپتى ورتالىق دەربەس مەملەكەتتىك ورگان قۇرۋ تۋرالى جينالىستىڭ حاتتامالىق شەشىمىنە ەنگىزۋ تۋرالى ۇسىنىس جاسايمىن»، - دەپ اتاپ ءوتتى سارسەنباي ەڭسەگەنوۆ.
بۇدان بولەك، بالىق شارۋاشىلىعىن دامىتۋعا نەگىزدەلگەن باعدارلاما كەرەكتىگىن العا تارتتى.
«ق ر اگروونەركاسىپتىك كەشەنىن دامىتۋدىڭ 2017-2021 -جىلدارعا ارنالعان مەمباعدارلاماسى 29 بەتتەن تۇراتىن اۋقىمدى قۇجات. وسى قۇجاتتا بالىق شارۋاشىلىعىنىڭ جاي-كۇيى ءۇش-اق ابزاتستان تۇراتىن اكۆاوسىرۋ ماسەلەسىمەن شەكتەلگەن. الداعى وسى مەملەكەتتىك باعدارلامانىڭ اياسىندا نەمەسە ءوز الدىنا بولەك ارنايى جوسپار قابىلداۋ قاجەت دەپ ويلايمىز»، - دەدى دەپۋتات.