قازاقستان بالىعى وننان استام ەلگە ەكسپورتتالادى

استانا. قازاقپارات - قازاقستاننان ەكسپورتتالاتىن بالىق ونىمىندەرىنىڭ ساپاسى ەۋروپالىق وداقتىڭ قويىلاتىن جوعارعى تالاپتارىنا سايكەس كەلەدى.

بۇل تۋرالى پارلامەنت سەناتىندا قر اۋىل شارۋاشىلىعى ۆيتسە-ءمينيسترى ەرلان نىسانبايەۆ ءمالىم ەتتى، دەپ حابارلايدى قازاقپارات ءتىلشىسى.

«بالىق شارۋاشىلىعىن جۇرگىزۋ جانە وڭدەۋ مۇمكىندىگىن پايدالانۋ ناتيجەسىندە بالىق ونىمدەرىن ەكسپورتى قامتاماسىز ەتىلدى. بۇگىنگى تاڭدا 17 قازاقستاندىق كاسىپورىننىڭ ەكسپورتتالاتىن بالىق ونىمىندەرىنىڭ ساپاسى ەۋروپالىق وداقتىڭ قويىلاتىن جوعارعى تالاپتارىنا سايكەس كەلەدى. سوڭعى جىلدارى ولار وزدەرىن جاقسى جاعىنان كورسەتىپ، وسى نارىقتا اياعىنان تىك تۇردى دەۋگە بولادى. سونىمەن قاتار، بالىق ءونىمى ەكسپورتىنىڭ نارىعى قازاقستان مەن قىتايدىڭ ۆەتەريناريالىق سەرتيفيكاتتىن كەلىسىمدەپ الۋى ارقاسىندا كەڭەيىپ كەلەدى. بۇل رەتتە قحر- نىڭ تىزىمىنە 52 وتاندىق ءوندىرۋشى ەنگىزىلگەن»، - دەپ توقتالدى ۆيتسە- مينيستر.

بۇدان باسقا، بالىق ءونىمى 10 نان استام مەملەكەتكە (اۋستريا، گەرمانيا، گرۋزيا، كانادا، قىرعىزستان، ليتۆا، نيدەرلاندى، پولشا، رەسەي، رۋمىنيا، تاجىكستان، وزبەكستان، ۋكراينا، چەحيا) ەكسپورتتالۋدا.

ە. نىسانبايەۆتىڭ سوزىنە قاراعاندا، 2017 -جىلى بالىق ءونىمىنىڭ يمپورتى وسىنىڭ الدىنداعى جىلدارمەن سالىستىرعاندا ءبىرشاما ازايدى.

«يمپورت قۇرامىندا تەڭىز جانە مۇحيت بالىقتارى (مايشاباق، سكۋمبريا، اقسەركە، البىرت، ءنالىم) جانە تەڭىز ونىمدەرى (كريەۆەتكا، كالمار، ميديا، تەڭىز قىرىققاباتى) باسىم. ولار ءبىزدىڭ نارىقتا سۇرانىسقا يە بولىپ وتىر، ويتكەنى ىشكى سۋ ايدىندارىندا اۋلانبايدى»، - دەدى ول.

اتاپ ايتقاندا، قازاقستاندا بالىق شارۋاشىلىعىنىڭ دامىتۋعا ىشكى سۋ ايدىندارىنىڭ كولەمى 3 ميلليون گەكتاردان استام (كاسپي تەڭىزىن قوسپاعاندا) قولايلى جاعدايلار بار. بالىق شارۋاشىلىعىنىڭ تابىس جانە حالىقتى جۇمىسپەن قامتۋ، ەكسپورتتى ارتتىرۋ الەۋەتى، بيولوگيالىق ارتۇرلىلىكتىڭ جاڭارىپ وتىراتىن كوزى رەتىندە ماڭىزى زور.