قازاق تىلىندەگى گولليۆۋد فيلمدەرى رەسەيلىك پورتالعا جۇكتەلدى

None
None
استانا. قازاقپارات - قازاق تىلىنە دۋبلياجدالعان گولليۆۋد فيلمدەرى Ivi.ru ونلاين- كينوتەاترىندا قولجەتىمدى بولادى، دەپ حابارلايدى قازاقپارات ءتىلشىسى.

«بولاشاق» كورپوراتيۆتىك قورىنىڭ باسپا ءسوز قىزمەتىنەن حابارلاعانداي، ىنتىماقتاستىق اياسىندا كوپتەگەن تانىمال فيلمدەردى قازاق تىلىنە دۋبلياجداۋ جوسپارلانعان جانە بۇل فيلمدەر قازاقستاندا عانا ەمەس، وزگە ەلدەردە دە قولجەتىمدى بولادى.

«تانىمال فيلمدەردى قازاق تىلىندە كورۋ ارقىلى شەت مەملەكەتتەردە تۇراتىن قازاق بالالارى انا ءتىلىن ۇيرەنەدى. قازاق ءتىلدى كونتەنتتى قولجەتىمدى ەتۋ ءۇشىن بارلىق شارالاردى اتقارىپ جاتىرمىز. «بولاشاق» قورىمەن قازاق ءتىلدى كونتەنتتى الەمنىڭ كەز كەلگەن تۇپكىرىندە، كەز كەلگەن قۇرىلعى ارقىلى قولجەتىمدى ەتۋ مۇمكىندىكتەرىن قاراستىرۋدامىز»، - دەدى Ivi.ru ونلاين- كينوتەاترىنىڭ حالىقارالىق دامۋ بويىنشا ديرەكتورى ارتەم ەگورەنكوۆ.

ەسكە سالا كەتسەك، 2011 -جىلدان باستاپ، «بولاشاق» كورپوراتيۆتىك قورىنىڭ ءتوراعاسى، «بولاشاق» قاۋىمداستىعىنىڭ قۇرمەتتى مۇشەسى باۋىرجان بايبەكتىڭ باستاماسىمەن گولليۆۋدتىق فيلمدەردى قازاق تىلىنە دۋبلياجداۋ جوباسى قولعا الىندى. 7 جىلدا قور 23 كينوكارتينانىڭ قازاقشا دۋبلياجىن ىسكە اسىردى.

«وزىڭنەن باستا» جوباسى ارقىلى قازاق ءتىلى Sony Pictures-تەگى جەتىنشى تۇركى ءتىلى، Walt Disney-دەگى 39 -ءتىل اتانىپ، الەم بويىنشا DVD، Blu-Ray, iTunes جانە ونلاين- كينوتەاترلاردا كورسەتىلەتىن گولليۆۋدتىق فيلم تىلدەرىنىڭ ۇزدىك جەتىلىگىنە ەندى.

«بولاشاق» كورپوراتيۆتىك قورىنىڭ ديرەكتورى دينارا ءشايجۇنىسوۆانىڭ ايتۋىنشا، بيىل جاس كورەرمەندەر ءۇشىن قازاق تىلىنە دىبىستالعان ءتورت فيلمنىڭ تانىستىرىلىمى وتەدى. اتاپ ايتقاندا، 14 -ماۋسىم كۇنى «سۋپەروتباسى 2»، 12 -شىلدە كۇنى - «مونسترلار دەمالىستا 3» انيماتسيالىق فيلمدەرى جارىققا شىعادى، 2 -قاراشادا - «شەلكۋنچيك جانە ءتورت پاتشالىق ءفيلمى جانە 22 -قاراشا كۇنى كورەرمەندەر «رالف ينتەرنەتكە قارسى» مۋلتفيلمىن تاماشالاي الادى.

  

سوڭعى جاڭالىقتار