ايكا فيلمىنىڭ رەجيسسەرى «وبلىسقا سىڭىرگەن ەڭبەگى ءۇشىن» مەدالىمەن ماراپاتتالدى

شىمكەنت. قازاقپارات - بۇگىن وڭتۇستىك قازاقستان وبلىسىنىڭ اكىمى جانسەيىت تۇيمەبايەۆ كانن كينوفەستيۆالىنەن كەيىن كوپشىلىككە تانىلعان «ايكا» فيلمىنىڭ رەجيسسەرى سەرگەي دۆورسەۆويمەن كەزدەستى.

ەلىمىزدىڭ كينەماتوگرافيا سالاسىن دامىتۋعا ۇلەسىن قوسىپ جۇرگەن جانە ونىڭ الەمدىك دەڭگەيدە تانىمال بولۋىنا قوسقان ۇلەسى ءۇشىن كينورەجيسسەر سەرگەي دۆورسەۆويعا ءوڭىر باسشىسى جەرلەستەرىنىڭ اتىنان شىنايى العىسىن جەتكىزىپ، «وبلىسقا سىڭىرگەن ەڭبەگى ءۇشىن» مەدالىمەن ماراپاتتادى، دەپ حابارلايدى قازاقپارات ءتىلشىسى.

كەزدەسۋ بارىسىندا ايماق باسشىسى رەجيسسەردى قازاقستان مەن رەسەي اراسىنداعى مادەني بايلانىستاردى نىعايتۋ جولىنداعى ەڭبەگىنە ساتتىلىك تىلەدى.

«ءسىز تۇسىرگەن «ايكا» فيلمى 71- كانن كينوفەستيۆالىندە الەمدىك دەڭگەيدەگى ەڭ ۇزدىك 20 كارتينانىڭ قۇرامىندا قازىلار القاسىنىڭ، كينو سىنشىلار مەن ەۋروپانىڭ تالعامپاز كورەرمەنىنىڭ جوعارى باعاسىنا يە بولدى. ءسىزدىڭ كاسىبي شەبەرلىگىڭىزدىڭ جانە رەجيسسەرلىك دەڭگەيىڭىزدىڭ جوعارى بولۋىنىڭ ارقاسىندا قازاقستاندىق سامال ەسلياموۆا ۇزدىك ايەل ءرولى ءۇشىن جوعارى ماراپاتقا يە بولدى. مۇنداي جاعداي، پوستكەڭەستىك ەلدەر اراسىنان شىققان ءارتىستىڭ وسىنداي ماراپاتقا يە بولۋى كانن فەستيۆالى تاريحىندا بۇرىن-سوڭدى بولماعانىن ەسكەرسەك بۇل ۇلكەن وقيعا!»، - دەدى جانسەيىت قانسەيىت ۇلى.

ءوز كەزەگىندە سەرگەي دۆورسەۆوي دا وبلىس اكىمدىگى تاراپىنان كورسەتىلىپ جاتقان قۇرمەت پەن قوشەمەت ءۇشىن العىسىن ءبىلدىرىپ، الداعى ۋاقىتتا قازاقستاننىڭ كينەماتوگرافيا سالاسىنىڭ دامۋى جولىندا ايانباي ەڭبەك ەتەتىنىن سەنىممەن جەتكىزدى. سونىمەن قاتار وڭتۇستىك وڭىرىندە كينويندۋستريانى دامىتۋعا ەرەكشە كوڭىل ءبولىنىپ، جان-جاقتى قولداۋ كورسەتىلىپ جاتقانىنان حابارى بار ەكەنىن ايتىپ ءوتتى.

 

وسى رەتتە ايماق باسشىسى وبلىستا بۇگىندە ونعا جۋىق كينوستۋديانىڭ بار ەكەنىن ايتىپ، سولاردىڭ ءبىرى حالىقارالىق فەستيۆالداردىڭ جەڭىمپازى، جاس ۇرپاقتى تاربيەلەۋگە ارنالعان قازاق تىلىندەگى 50 گە جۋىق انيماتسيالىق فيلم تۇسىرگەن «ساق» كينوستۋدياسىن اتاپ ءوتتى.

«ەلباسىنىڭ «بولاشاققا باعدار: رۋحاني جاڭعىرۋ» ماقالاسى اياسىندا تاريحي-مادەني مۇرالاردى ناسيحاتتاپ، جاستارعا پاتريوتتىق تاربيە بەرۋ ماقساتىندا 2017 -جىلى «وڭتۇستىك فيلم» مەن «ساق» كينوستۋدياسى بىرلەسىپ «كونە جەتىگەننىڭ سىرى» اتتى 10 سەريالى تەلەحيكايا، «كيەلى قازىعۇرت»، «وتىراردى قورعاۋ»، «كۇش اتاسى - قاجىمۇقان» اتتى انيماتسيالىق جانە «ۇلى جىبەك جولىنداعى ەسكەرتكىشتەر» دەرەكتى فيلم ءتۇسىرىلدى. ال وسى جىلدىڭ سوڭىنا دەيىن «تولە ءبي» كوپسەريالى فيلمى مەن «ورداباسى - بىرلىكتىڭ تۋى»، «كونە تۇركىستان»، «وقسىز وقيعاسى» اتتى انيماتسيالىق فيلمدەر تۇسىرىلەدى»، - دەدى وبلىس اكىمى.

 

ايتا كەتەيىك، سەرگەي دۆورسەۆوي 1962 -جىلى شىمكەنت قالاسىندا دۇنيەگە كەلگەن. نيكيتا ميحالكوۆتىڭ «نيكا» سىيلىعىنىڭ لاۋرەاتى. الەمدىك دەڭگەيدەگى مامانداردى مويىنداتقان كينونى تۇسىرگەن ول بۇعان دەيىن، «تراسسا»، «ۆ تەمنوتە» دەرەكتى فيلمدەر مەن قىسقا مەتراجدى «سچاستە»، «حلەبنىي دەن» كينو تۋىندىلارىن ءتۇسىرىپ، كوپتەگەن حالىقارالىق فەستيۆالدار مەن بايقاۋلاردىڭ قاتىسۋشىسى اتانعان. ال 2008 -جىلى «تيۋلپان» فيلمى كانن كينوفەستيۆالىندە «ەرەكشە كوزقاراس» اتالىمى بويىنشا ماراپاتتالعان.