شىعىس قازاقستاندا ءداستۇرلى حالىقتىق سپورت ويىندارى باستالدى
سپورتتىق ويىنداردىڭ اشىلۋ سالتاناتىنا قاتىسقان وبلىستىڭ اكىمى دانيال احمەتوۆ كيىز ءۇي قالاشىعى مەن ەتنواۋىلدى ارالاپ، ءارتۇرلى ەتنوس وكىلدەرىنىڭ سپورتتىق ويىندارىن تاماشالادى. قالاشىققا اقشاڭقان ءۇيىن تىككەن ءار اۋدان حالىقتىڭ تىنىسىنان سىر شەرتەر تۇرمىستىق زاتتاردى، ۇلتتىق كيىمدەر مەن زەرگەرلىك بۇيىمداردى نازارعا ۇسىنۋدا.
مىسالى، سەمەيلىكتەر قازاقتىڭ «كەستە تىگۋ»، «ءجۇن ساباۋ»، «ءجۇن ءيىرۋ» سياقتى تۇرمىستىق كورىنىستەرىن، تاتار ۇلتىنىڭ «قۇدا توي» ءراسىمىن دايىنداپ اكەلگەن. تارباعاتاي اۋدانى قازاق حالقىنىڭ بۇركىتپەن اڭ اۋلاۋ ونەرىن كورسەتتى.
«جاڭا عانا قازاقتىڭ تۇساۋكەسەر راسىمىنە قاتىسىپ، تاتارشا كەلىن بەرۋ، ورىس ۇلتىنىڭ قوناق كۇتۋ ءداستۇرىن تاماشالادىم. بۇل، ەڭ ءبىرىنشى، قازاقستان حالقىنىڭ تاتۋلىعىن كورسەتەدى. ءبىزدىڭ باستى قۇندىلىعىمىز دا وسى، سونى ساقتاۋىمىز كەرەك» - دەدى دانيال احمەتوۆ.
حالىقتىق سپورت ويىندارىنىڭ ايشىقتى تۇستارىنىڭ ءبىرى - كيىز ءۇي فەستيۆالى. بيىل ول «ءبىر شاڭىراق استىندا» دەگەن تاقىرىپپەن وتۋدە. وبلىستىڭ 17 ولكەسىنەن 17 كيىز ءۇي تىگىلگەن. ال نەگىزگى سايىس سپورتتىڭ 21 تۇرىنەن بولادى. حالىقتىق سيپاتقا يە بۇل سايىس مەكتەپ وقۋشىلارىن دا قامتىعان. بۇگىن 1200 وسكەمەندىك بالا شاحمات، اسىق اتۋ، ارقان تارتۋ، سان ءتۇرلى ەستافەتا ويىندارىندا باق سىناستى.
وبلىس اكىمىنىڭ جۇلدەسىنە ۇيىمداستىرىلعان سايىس ءتورت كۇن بويى جالعاسادى. شارانى ۇيىمداستىرۋشىلاردىڭ ايتۋىنشا، شىعىس قازاقستان ەلىمىزدەگى وبلىستىق دەڭگەيدەگى وليمپيادا ىسپەتتەس ويىندار وتكىزەتىن جالعىز ءوڭىر.
اۆتور: ەسىمجان ناقتىباي
