سولتۇستىك كورەيا ءوزىنىڭ جالعىز يادرو پوليگونىن جارىپ جىبەردى

پحۋنگەري. قازاقپارات - بەيسەنبى كۇنى سولتۇستىك كورەيا جالعىز يادرو پوليگونىن بۇزىپ، يادرولىق الەۋەتىن جويۋعا العاشقى قادام جاسادى، دەپ حابارلايدى رەنحاپ اگەنتتىگى.

جەرگىلىكتى ۋاقىت بويىنشا تاڭعى 11 شاماسىندا پحۋنگەري پوليگونىنىڭ سولتۇستىك بولىگىندەگى No.2 جەراستى جولى جارىلدى. قالعان ەكى تۋننەل پحەنيان ۋاقىتىمەن كۇندىزگى 2:17-دە جويىلدى. سونداي- اق كازارما عيماراتتارى، شولۋ مۇنارالارى جانە پوليگون اۋماعىنداعى باسقا دا نىساندار جارۋ جولىمەن جويىلدى.

پحەنياننىڭ شاقىرۋىمەن دەمونتاجداۋ راسىمىنە ا ق ش، قىتاي، رەسەي جانە ۇلى بريتانيا تەلەارنالارىنىڭ وكىلدەرى مەن جۋرناليستەر قاتىستى.

پوليگوننىڭ بۇزىلۋىنا كۋا بولعان جۋرناليستەردىڭ ايتۋىنشا، قوپارۋ جۇمىستارى كەشە كەشكىسىن 4:17-دە توقتاتىلعان. №1 تۋننەلدىڭ دەمونتاجدالۋى تۋرالى ازىرگە اقپارات جوق.

وڭتۇستىك كورەيا ۇكىمەتى بۇل وقيعانى جىلى قابىلداپ، كورەي تۇبەگىن يادرودان تازارتۋ پروتسەسىنىڭ ارى قاراي جالعاسۋىنا ءۇمىت ءبىلدىردى.

«ءبىز بۇل وقيعا الداعى ۋاقىتتا تۇبەكتى يادرودان تولىقتاي تازارتۋدىڭ باستاماسى بولادى دەگەن ويدامىز»، - دەپ مالىمدەدى وڭتۇستىك كورەيا سىرتقى ىستەر مينيسترلىگىنىڭ رەسمي وكىلى.

سولتۇستىك كورەيا بۇقارالىق اقپارات قۇرالدارى بۇل وقيعا تۋرالى ازىرگە ءۇنسىز وتىر. پوليگوندى بۇزۋ شاراسىنا مەملەكەت باسشىسى كيم چەن ىننىڭ بارعان- بارماعانى تۋرالى اقپارات جوق.