ۋكراينا ت م د اياسىنداعى شارتتاردى توقتاتتى

استانا. قازاقپارات - ۋكراينا ءۇشىن ت م د اياسىندا جەكەلەگەن حالىقارالىق شارتتاردىڭ ارەكەتىن توقتاتۋ تۋرالى جارلىق جاريالاندى. ءتيىستى قۇجات ۋكراينا پرەزيدەنتى پەتر پوروشەنكونىڭ رەسمي سايتىندا جاريالاندى.

«ۋكراينا كونستيتۋتسياسىنىڭ 107-بابىنا سايكەس: «تاۋەلسىز مەملەكەتتەر دوستاستىعى اياسىندا قول قويىلعان ۋكراينا ءۇشىن جەكەلەگەن حالىقارالىق شارتتاردىڭ ارەكەت ەتۋىن توقتاتۋ تۋرالى» 2018 -جىلدىڭ 2 - مامىرىنداعى ۋكراينا ۇلتتىق قاۋىپسىزدىك جانە قورعانىس كەڭەسىنىڭ شەشىمىن قولدانىسقا ەنگىزۋگە قاۋلى ەتەمىن. وسى جارلىق جاريالانعان كۇننەن باستاپ كۇشىنە ەنەدى»، -دەپ جازىلعان پوروشەنكو قول قويعان قۇجاتتا.

بۇل قۇجاتقا 19-  مامىر كۇنى قول قويىلعان. ءدال سول كۇنى پوروشەنكو ت م د- نىڭ وكىلەتتى ورگاندارىنىڭ مۇشەلەرىنە قاتىستى ءوز ويىن اشىق بىلدىرگەن ەدى. - ەندى ول جەردە ەشتەڭە جوق، ءبىز بىرگە ەۋروپاعا قادام باسامىز، - دەدى ۋكراينا پرەزيدەنتى.

تاۋەلسىز مەملەكەتتەر دوستاستىعى 1991 -جىلدىڭ جەلتوقسان ايىندا قۇرىلعانىن ايتا كەتەيىك. ءتيىستى كەلىسىمگە رەسەي، بەلارۋس جانە ۋكراينا باسشىلارى قول قويعانى بەلگىلى. سودان كەيىن بالتىق تەڭىزى جاعالاۋىنداعى ەلدەردەن باسقا، بۇرىنعى ك س ر و- داعى وداقتاس مەملەكەتتەر دە وسى ۇيىمنىڭ قۇرامىنا كىرگەن ەدى.

ايتا كەتەيىك، ۋكراينا ت م د جارعىسىنا قول قويماعان، سوندىقتان ول ۇيىمنىڭ قۇرامىندا بولعانىمەن، ونىڭ زاڭدى مۇشەسى بولعان جوق.

بالجان حالىق

https://aikyn.kz