تۇرىك كومپانياسى قازاقستاندا بروندى ماشينالاردى شىعاراتىن بولدى

استانا. قازاقپارات - «قازاقستان ينجينيرينگ» حولدينگى مەن تۇركيانىڭ «وتوكار» كومپانياسى سەرىكتەستىك تۋرالى مەموراندۋمعا قول قويدى. سەرىكتەستىك قازاقستان اۋماعىندا بىرلەسە وتىرىپ، بروندى ماشينالاردى قۇراستىرۋعا جول اشىپ وتىر، دەپ حابارلايدى قازاقپارات ءتىلشىسى.

 قول قويىلعان قۇجات اياسىندا قازاق- تۇرىك بىرلەسكەن كاسىپورىنى قازاقستان اۋماعىندا كولىك قۇرالدارىن، سونىڭ ىشىندە بروندى ماشينالاردى جاڭعىرتۋ، جوندەۋ، سونىمەن قاتار جوبالاۋ، قۇراستىرۋ جانە تاسىمالداۋ جۇمىسىن جۇزەگە اسىراتىن بولادى.

«تەحنيكالىق- ەكونوميكالىق نەگىزدەمەسى جانە ق ر- دا بروندى ماشينالاردىڭ ءوندىرىسى بويىنشا بىرلەسكەن بيزنەس- جوسپارى بويىنشا «قازاقستان ينجينيرينگپەن» جاسالعان بۇل مەموراندۋم ءبىزدىڭ قازاقستانمەن بىرلەسە جۇمىس جۇرگىزۋ نيەتىمىزدى بەكەمدەي تۇسەدى»، - دەيدى «وتوكار» كومپانياسىنىڭ باس ديرەكتورى سەردار گەرگيۋچ «KADEX-2018» بەسىنشى حالىقارالىق كورمەسىندە قۇجاتقا قول قويۋ راسىمىنەن سوڭ.

ول بروندى ماشينالار  قازىردىڭ وزىندە قازاقستاندا قولدانىستا ەكەنىن ەسكە سالدى.

«وسىلايشا، قۇجات قازاقستان رەسپۋبليكاسىنىڭ قارۋلى كۇشتەرى ءۇشىن بروندى ماشينالاردى بىرلەسە جاساۋعا قاراي باعىتتالعان العاشقى قادام بولىپ وتىر»، - دەدى ول.

ەسكە سالا كەتسەك، «KADEX-2018»  بەسىنشى حالىقارالىق كورمەسى باستالعان كۇنى (كەشە) «وتوكار» كومپانياسىنىڭ باس ديرەكتورى سەردار گەرگيۋچ كومپانيانىڭ بروندى ماشينا جاساۋ تەحنولوگياسىن قازاقستانداعى وندىرىسكە ەنگىزۋگە دايىن ەكەنىن ءمالىم ەتكەن بولاتىن.

ءدال سول كۇنى كورمە اياسىنداعى سەسسيادا «وتوكار» كومپانياسىنىڭ بيزنەستى دامىتۋ بويىنشا ديرەكتورى تامەر سيركالي تۇركيالىق اسكەري بروندى دوڭگەلەكتى كولىكتەردىڭ الەۋەتى تۋرالى ايتىپ بەرگەن ەدى.

اۆتور: ايان بەكەن ۇلى