قازاقستاندا تەرروريزمگە قارسى «ءبىرىڭعاي دابىل تۇيمەشەگى» بولادى
«2016 -جىلى الماتى مەن اقتوبەدە بولعان وقيعالاردان كەيىن تەرروريزمگە قارسى «ءبىرىڭعاي دابىل تۇيمەشەگى» دەگەن باستاما قولعا الىندى. بۇگىندە ىشكى ىستەر ورگاندارىنا قاراستى بارلىق مەكەمەلەردى اتالعان جۇيەگە قوسۋ شارالارى اياقتالىپ جاتىر. بۇل - باستاپقى كەزەڭ. ەكىنشى كەزەڭدە مەملەكەتتىك ورگانداردىڭ كەزەكشىلىك بولىمدەرىن دە ءبىر جۇيەگە قوسۋ ماسەلەسى قارالاتىن بولادى. ال ءۇشىنشى كەزەڭدە جەرگىلىكتى اتقارۋشى ورگاندارعا قاراستى مەكەمەلەر «ءبىرىڭعاي دابىل تۇيمەشەگىنە» قوسىلادى» ، - دەيدى ورتالىق ماماندارى.
ق ر تەرروريزمگە قارسى ورتالىق شتاب باسشىنىڭ ورىنباسارى گەرمان ديدەنكونىڭ ايتۋىنشا، بۇگىندە رەسپۋبليكا بويىنشا 16 مىڭ نىساننىڭ تەرروريستىك قاۋىپسىزدىگىن قامتاماسىز ەتىپ وتىرۋ قاجەت. «ءبىرىڭعاي دابىل تۇيمەشەگىن» باسقاندا بارلىق نىساندار تەرروريستىك قاۋىپ جايىندا بىلەتىن بولادى. ارينە، ول ءۇشىن ءبارىن ءبىر جۇيەگە قوسۋ قاجەت» ، - دەيدى گ. ديدەنكو.
ايتا كەتەيىك، V حالىقارالىق «KADEX-2018» قارۋ- جاراق پەن اسكەري تەحنيكا كورمەسى اياسىندا تەرروريزمگە قارسى ورتالىق، ءورت قاۋىپسىزدىگى مەن توتەنشە جاعدايلار قىزمەتتەرى كاسىپكەرلەرمەن كەزدەسىپ، ءوز جوسپارلارىمەن ءبولىستى. قازىرگى زاڭنامانى جان- جاقتى ءتۇسىندىرىپ، بيزنەستى قوعامدىق قاۋىپسىزدىك سالاسىنداعى شارالارعا قاتىسۋعا ۇندەدى.