مەرەيلى وتباسى: استانانىڭ ەڭ ۇلگىلى جانۇيالارى انىقتالدى
ەلوردالىق قاتىسۋشىلار اراسىندا بىرلىگى جاراسقان، اينالاسىنا سىيلى دارىگەرلەر، ۇستازدار، ونەرپازدار، سپورتشىلار، اسكەريلەر جانە كاسىپكەرلەر وتباسى باق سىنادى. ولاردىڭ اراسىنان sms/ينتەرنەت ارقىلى كوپ داۋىس جيناعان وتباسىلار جەڭىمپاز اتاندى.
داۋىس بەرۋ ناتيجەسىنە سايكەس، «مەرەيلى وتباسى» ۇلتتىق بايقاۋى استانا قالالىق كەزەڭىنىڭ جۇلدەلى ءۇشىنشى ورىنى وتەۋىلوۆتەر مەن ۇدەربايەۆتار وتباسىنا بەرىلدى. نۇركەن وتەۋىلوۆ پەن ونىڭ جارى اينۇر بولات قىزى - رەسپۋبليكاعا تانىمال ارتىستەر. ولاردىڭ قوس ۇلى دا كينو سالاسىنا اتسالىسىپ كەلەدى، كىشى ۇلى اقارىس كينوتەاترلاردا كورسەتىلەتىن كوپتەگەن مۋلتفيلمدەرگە دۋبلياج جاساپ ۇلگەردى. جەڭىمپازدارعا العىس حات مەن كاسىبي فوتوسۋرەتتەرى جيناقتالعان ديسك جانە 100 مىڭ تەڭگەلىك سەرتيفيكات تابىس ەتىلدى.
ەكىنشى ورىندى ۇستازدىقتى تۋ ەتكەن سمايلوۆتار مەن كوپ بالالى ايتقاليەۆتەر وتباسى جەڭىپ الدى. ولارعا العىس حاتتار مەن 200 مىڭ تەڭگەلىك سەرتيفيكاتتى استانا قالالىق قوعامدىق كەڭەسىنىڭ جانە ارداگەرلەر كەڭەسىنىڭ ءتوراعاسى سانسىزباي ەسىلوۆ تابىستادى. سانسىزباي سەيىتجان ۇلى وسىدان 20 -جىل بۇرىنعى استاناداعى كۇندەردى ەسكە الدى.
«بۇل وتە ماڭىزدى ۇلكەن شارا. «مەرەيلى وتباسى» بايقاۋى العاش ۇيىمداستىرىلعاندا العاشقى جەڭىمپاز وتباسىلار تاڭ قالاتىن ەدى. ەندى مىنە، داستۇرگە اينالىپ، جىلداعى مەرەكەگە اينالدى. وسىدان 20 -جىل بۇرىن ءا. جاقسىبەكوۆ استانا قالاسىنىڭ اكىم بولىپ تۇرعان كەزدە ەكى رەت ەلباسىنىڭ الدىندا قالانىڭ دامۋى جونىندە ەسەپ بەرەتىنبىز. شامامەن كوكتەمدە ءبىراز سوگىس ەستىپ، باسىمىز تومەن ءتۇستى، كوڭىل- كۇيىمىز جوق. سوندا ەلباسى بىزگە قاراپ: «جىگىتتەر، سەندەر نەگە مۇڭايىپ قالدىڭدار؟ استانانى سالامىز، ەشقايدا كەتپەيمىز. ءبىراق، ەڭ باستى مىندەت - استانانىڭ تۇرعىندارىن تاربيەلەپ، ءبىرتۇتاس ەل بولۋ دەدى. بۇگىنگى شارا دا سول يدەياعا باعىتتالعان»، - دەدى سانسىزباي ەسىلوۆ سالتاناتتى ماراپاتتاۋدا.
سونداي-اق، قالالىق بايقاۋدا دارىگەرلەر مەن اسكەريلەر وتباسى توپ جارىپ، رەسپۋبليكالىق «مەرەيلى وتباسى» بايقاۋىنا جولداما الدى.
اسىلجان ەرەكەشوۆ - كەڭەس وداعىنىڭ جانە تاۋەلسىز قازاقستاننىڭ بىلىكتى دارىگەرى ابۋباكىر ەرەكەشيەۆتىڭ ۇلى، استاناداعى №1 پەريناتالدىق ورتالىقتىڭ حيرۋرگى بولىپ قىزمەت ەتەدى. ول جۇبايى مانيرا ەرەكەشيەۆامەن الماتىداعى مەديتسينالىق ۋنيۆەرسيتەت قابىرعاسىندا تانىسىپ، شاقىراق كوتەرگەن. ولاردىڭ ۇلكەن ۇلى ايان بۇگىندە اتا- اناسىنىڭ ءىزىن جالعاپ، س. اسفەندياروۆ اتىنداعى قازاق ۇلتتىق مەديتسينا ۋنيۆەرسيتەتىندە ءبىلىم الىپ جاتىر.
تاعى ءبىر جەڭىمپاز وتباسى، 4 بالانى ءوسىرىپ وتىرعان عاني جانە اسەل باۋبەرىكوۆتەر اسكەري ماماندار. وتباسىندا ءۇشىنشى بالا تۋعان سوڭ، سەرجانت اسەل باۋبەرىكوۆا اسكەري قىزمەتتى توقتاتىپ، بالالار تاربيەسىنە كوڭىل ءبولۋدى ۇيعارعان.
«ءبىزدىڭ ۇيدە تەمىردەي ءتارتىپ ورناعان جانە بىلىمگە باسا ءمان بەرىلەدى. كەشكى اس ۋاقىتىندا بالالار ساباعى، ۇيىرمەدەگى جەتىستىكتەرى بويىنشا «ەسەپ بەرەدى» . تۇسىنبەگەن تاقىرىپتارى بولسا، ءۇي- ءىشى بولىپ تالقىلاپ، شەشىمىن تابامىز. عاني ماسكەۋدە ءۇش جىل ءبىلىم الدى جانە بۇل جىلدارى بالالار ماسكەۋ مەكتەپتەرىندە ۇزدىك ناتيجە كورسەتىپ، «رەسەي بىلگىشتەرى» بايقاۋىندا توپ جاردى. ءقازىر دە ءتۇرلى جەتىستىكتەرىمەن قۋانتىپ كەلەدى» ، - دەيدى اسەل.
ايتا كەتەيىك، داستۇرگە اينالعان «مەرەيلى وتباسى» ۇلتتىق بايقاۋى مەملەكەت باسشىسىنىڭ ۇسىنىسىمەن 2014 -جىلدان بەرى وتكىزىلىپ كەلەدى.