الماتىدا قىزىلعا بويالعان وزەن سۋىن تەكسەرۋ ناتيجەسى جاريالاندى

الماتى. قازاقپارات - الماتىدا ۇلكەن الماتى وزەنىنىڭ قىزىل تۇسكە بويالۋىن قۇزىرلى ورگاندار تۇسىندىرە الماي وتىر، دەپ حابارلايدى قازاقپارات ءتىلشىسى.

«قازگيدرومەت» ر م ك قىزىل تۇسكە بويالعان ۇلكەن الماتى وزەنى سۋىن زەرتتەۋ قورىتىندىسىن جاريالادى. زەرتحانا ماماندارى قالالىق ەكولوگيا دەپارتامەنتىنىڭ وكىلدەرىمەن بىرلەسە وتىرىپ وزەن سۋىنان سىناما العان بولاتىن.

سۋ وزەننىڭ باستالعان تۇسى - المااراسان اڭعارىنان، ورتا تۇسى - ق. ساتبايەۆ كوشەسىنىڭ بويىنان، تومەنگى تۇسى - ت. رىسقۇلوۆ داڭعىلى ماڭىنان الىنعان بولاتىن.

جەلىدە تارالعان ۆيدەو وزەننىڭ ورتا تۇسىندا - ساتبايەۆ كوشەسىنىڭ ماڭىندا تۇسىرىلگەن بولاتىن.

«سۋدىڭ ءيىسى جوق بولاتىن. اناليز بارىسىندا ءتۇسى وزگەرگەن جوق. نەگىزگى كورسەتكىشتەر سۋدىڭ تەمپەراتۋراسى، وتتەكتىك قۇرامى، ءتۇسى، مولدىرلىگى قالىپتى»، - دەدى «قازگيدرومەت» ر م ك الماتى بولىمشەسىنىڭ حيميالىق تالداۋ ءبولىمىنىڭ باسشىسى ايجان نۇكەنوۆا.

ونىڭ ايتۋىنشا، المااراسان اڭعارىندا ەشقانداي زياندى زاتتاردىڭ كورسەتكىشتەن جوعارىلاۋى اڭعارىلماعان.

ال، ساتبايەۆ كوشەسىنىڭ تۇسىندا تەمىردىڭ كورسەتكىشى رۇقسات ەتىلگەن شەكتى كورسەتكىشتەن 1,4 جوعارى بولعانى بەلگىلى بولدى.

«ال رىسقۇلوۆ كوشەسى ماڭىندا الىنعان سۋدان نيتريتتى ازوت رۇقسات ەتىلگەن شەكتى كورسەتكىشتەن 1,5، تەمىر - 2,8، مىس - 1,2، مارگانەتس - 1,6 كورسەتكىشكە ارتىق ەكەنى انىقتالدى. سۋدان امموني تۇزى، فوسفات، كاربونات، مۇناي قالدىقتارى تابىلعان جوق. ءبىراق، بۇل ادەتتەگى الماتى وزەنىنىڭ تالداۋىنا ۇقسايدى. جوعارىدا ايتىلعاندار سۋدى قىزىل تۇسكە بويادى دەپ ناقتى ايتا المايمىن»، - دەدى ايجان نۇكەنوۆا.

قالالىق ەكولوگيا دەپارتامەنتى دە سۋدىڭ اشىق قىزى تۇسكە بويالۋىنا نە اسەر ەتكەنىن ناقتى ايتا الماي وتىر.

قالالىق قوعام دەنساۋلىعىن قورعاۋ دەپارتامەنتىنىڭ باسشىسى ايزات مولداقاسىموۆا دا سۋ سىناماسىندا زياندى توكسيندى زاتتار تابىلماعانىن ايتتى.

ايتا كەتۋ كەرەك، ۇلكەن الماتى وزەنىنىڭ قىزىل تۇسكە بويالعانى تۇرعىنداردى تاڭ قالدىردى. اتالعان ۆيدەو الەۋمەتتىك جەلى ارقىلى تاراپ كەتكەن بولاتىن.