كوپبالالى وتباسىلارعا «نۇرلى جەر» بويىنشا كەڭ كولەمدى پاتەر بەرىلۋى مۇمكىن
بۇل تۋرالى بۇگىن ماجىلىستەگى «نۇرلى جەر» تۇرعىن ءۇي قۇرىلىسى باعدارلاماسىن ىسكە اسىرۋ بارىسى» تاقىرىبىندا ءوتىپ جاتقان دوڭگەلەك ۇستەل بارىسىندا ق ر ينۆەستيسيالار جانە دامۋ ۆيتسە-ءمينيسترى قايىربەك وسكەنبايەۆ ايتتى، دەپ حابارلايدى قازاقپارات ءتىلشىسى.
دوڭگەلەك ۇستەل بارىسىندا دەپۋتات ءۋاليحان قاينازاروۆ «نۇرلى جەر» باعدارلاماسى اياسىندا سالىناتىن تۇرعىن ءۇيدىڭ شارشى مەترى 80 نەن اسپاۋى قاجەت دەگەن تالاپ بار ەكەندىگىن ەسكە سالدى.
«80 شارشى مەتر 2 ارى كەتكەندە 3 بولمەلى پاتەر. بۇل 1 نەمەسە 2 بالاسى بار وتباسىعا جارايدى. ال 4-5 بالاسى بار وتباسىلارعا نە ىستەيمىز؟ سوندىقتان 80 شارشى مەترمەن شەكتەلمەي ماسەلەن 110 شارشى مەترگە ۇلعايتۋ قاجەت شىعار. بۇل ماسەلەنى قازىر شەشپەسەك الدىمىزدان شىعا بەرەدى»، - دەدى ءۋاليحان قاينازاروۆ.
ءوز كەزەگىندە، ۆيتسە-مينيستر كوپبالالى وتباسىلار ءۇشىن شارشى مەتر قايتا قاراستىرىلاتىندىعىن ايتتى.
«جالپى، بۇل اتالعان قارجىعا ناقتى قانشا پاتەر سالاتىندىعىمىزدى ايقىنداۋ ءۇشىن وسىنداي شەكتەۋ ەنگىزگەن ەدىك. ءبىز كوپبالالى وتباسىلارعا مۇمكىنشىلىك بەرگەنىمىز دۇرىس شىعار»، - دەدى قايىرىبەك وسكەنبايەۆ.