قازاقستاندا قانشا ادام باسپاناعا مۇقتاج
بۇل تۋرالى بۇگىن ماجىلىستەگى «نۇرلى جەر» تۇرعىن ءۇي قۇرىلىسى باعدارلاماسىن ىسكە اسىرۋ بارىسى» تاقىرىبىندا ءوتىپ جاتقان دوڭگەلەك ۇستەل بارىسىندا ق ر ينۆەستيتسيالار جانە دامۋ ۆيتسە-ءمينيسترى قايىربەك وسكەنبايەۆ ايتتى، دەپ حابارلايدى قازاقپارات ءتىلشىسى.
جيىندا ءماجىلىس دەپۋتاتى ومارحان وكسىكبايەۆ ۆيتسە-مينيستردەن قازاقستاندا قانشا ادام تۇرعىن ۇيگە مۇقتاج ەكەندىگىن سۇراعان بولاتىن.
«باسپاناعا مۇقتاج ءار ادامعا دەيىن ناقتى بىلەمىز. جەرگىلىكتى اتقارۋشى ورگانداردىڭ مالىمەتىنە سايكەس، بۇگىنگى كۇنى 465091 ادام پاتەر كەزەگىندە تۇر. ماسەلەن، اقمولا وبلىسىندا 21681، اقتوبە وبلىسىندا 27796 ادام بار. ونىڭ ىشىندە مۇگەدەكتىگى نەمەسە الەۋمەتتىك جاعدايىنىڭ تومەندىگى بويىنشا تىركەلگەندەر تۋرالى دا ناقتى مالىمەت قولىمىزدا»، - دەپ جاۋاپ بەردى ۆيتسە- مينيستر.
دەگەنمەن، ونىڭ ايتۋىنشا، باسپاناعا مۇقتاج رەتىندە تىزىمدە تۇرعان ادامدارعا قاتىستى ماسەلەلەر دە بار. ولاردىڭ كەيبىرىندە، ناقتى ايتقاندا 35094 ادامنىڭ ج س ن 2-3 رەت تىركەلگەن. بۇعان قوسا، 96581 ادام پاتەر الىپ ۇلگەرگەن.
«ال تۇرعىن ءۇي قۇرىلىس جيناق بانكى» سالىمشىلارىنىڭ سانى - 1 ميلليون 96 مىڭ ادام. ولار دا كەزەكتە تۇرعان سوڭ پاتەرگە مۇقتاجدار قاتارىنا جاتقىزىپ وتىرمىز. مۇنان بولەك، 1 ميلليوننان استام ادام جەر ۋچاسكەسىن تالاپ ەتۋدە. ولاردى دا ەسەپكە الدىق. سوندا 2,5 ميلليون ادام پاتەرگە مۇقتاج بولىپ شىعادى. ال ولاردى قالاي باسپانامەن قامتاماسىز ەتەمىز دەگەنگە كەلسەك، «نۇرلى جەر» باعدارلاماسى اياسىندا 15 -جىل ىشىندە 1,5 ميلليون پاتەر سالامىز دەگەن جوسپارىمىز بار»، - دەدى قايىربەك وسكەنبايەۆ.