استانا مەن الماتىدا تۇرعىن ءۇي قۇرىلىسى باسەڭدەدى

None
None
استانا. قازاقپارات - اعىمداعى جىلى رەسپۋبليكا بويىنشا 12,1 ميلليون شارشى مەتر تۇرعىن ءۇيدى پايدالانۋعا بەرۋ جوسپارلانعان.

بۇل تۋرالى بۇگىن ماجىلىستەگى «نۇرلى جەر» تۇرعىن ءۇي قۇرىلىسى باعدارالماسىن ىسكە اسىرۋ بارىسى» تاقىرىبىندا ءوتىپ جاتقان دوڭگەلەك ۇستەل بارىسىندا ق ر ينۆەستيتسيالار جانە دامۋ ۆيتسە-ءمينيسترى قايىربەك وسكەنبايەۆ ايتتى، دەپ حابارلايدى قازاقپارات ءتىلشىسى.

«اعىمداعى جىلى 12,1 ميلليون شارشى مەتر باسپانا تاپسىرۋدى قامتاماسىز ەتۋ جوسپارلانسا، ونىڭ ىشىندە 1 ميلليون شارشى مەتر جەكە جانە 7 ميلليون شارشى مەتر كوپپاتەرلى ۇيلەر بار. بيۋدجەتتىك قاراجات ەسەبىنەن شامامەن 22 مىڭ پاتەر نەمەسە 1,3 ميلليون شارشى مەتر تاپسىرىلاتىن بولادى. 2018 -جىلى باعدارلامانى ىسكە اسىرۋعا رەسپۋبليكالىق بيۋدجەتتەن 148,6 ميلليارد تەڭگە قاراستىرىلعان»، - دەدى ول.

ۆيتسە-ءمينيستردىڭ اتاپ وتۋىنشە، قارجىلاندىرۋدىڭ نەگىزگى بولىگى، ناقتى ايتقاندا 69,8 ميلليارد تەڭگە تۇرعىن ءۇي قۇرىلىسى اۋداندارىنا ينجەنەرلىك كوممۋنيكاتسيا جۇيەلەرىن جەتكىزۋگە، 26,9 ميلليارد تەڭگە جەرگىلىكتى اتقارۋشى ورگاندار جالعا بەرەتىن تۇرعىن ۇيلەرگە، 24 ميلليارد تەڭگە «قازاقستان تۇرعىن ءۇي قۇرىلىس جيناق بانكى» سالىمشىلارىنا كرەديت بولۋگە، 20 ميلليون تەڭگە اپاتتىق تۇرعىن ۇيلەردى بۇزۋعا جانە ىلكى جوبالارعا قاراستىرىلعان. ال 7,9 ميلليارد تەڭگە جەكە قۇرىلىسشىلارداعى حالىقتىڭ يپوتەكالىق قارىزدارىن سۋبسيديالاۋعا باعىتتالاتىن بولادى.

«اعىمداعى جىلدىڭ 4 ايىندا ستاتيستيكالىق مالىمەتتەرگە سايكەس، رەسپۋبليكا بويىنشا بارلىق قارجىلاندىرۋ كوزدەرى ەسەبىنەن 3,6 ميلليون شارشى مەتر نەمەسە 31 مىڭ 442 تۇرعىن ءۇي پايدالانۋعا بەرىلدى. ونىڭ ىشىندە 26,7 مىڭ شارشى مەتر بيۋدجەت قارجىسى ەسەبىنەن سالىندى. تۇرعىن ءۇي قۇرىلىسى 274,8 ميلليارد تەڭگەگە ينۆەستيتسيالاندى. وتكەن جىلدىڭ وسى كەزەڭىمەن سالىستىرعاندا، تۇرعىن ءۇي كولەمىنىڭ ارتۋى رەسپۋبليكانىڭ 13 ايماعىندا بايقالادى. استانا، الماتى قالالارى مەن  قىزىلوردا وبلىسىندا تۇرعىن ءۇي قۇرىلىسى قارقىنى باسەڭدەگەن»، - دەدى ق. وسكەنبايەۆ.

سونىمەن قاتار، ونىڭ دەرەگىنشە، 2017 -جىلى بولىنگەن 80,9 ميلليارد تەڭگە ەسەبىنەن تۇرعىن ءۇي قۇرىلىسىن جۇرگىزۋ اۋداندارىندا 3,7 مىڭ شاقىرىم كوممۋنالدىق جەلى سالىنعان. اعىمداعى جىلى رەسپۋبليكالىق بيۋدجەتتەن ءدال وسى باعىتقا 69,8 ميلليارد تەڭگە جۇمسالاتىن بولادى.

سوڭعى جاڭالىقتار