ەلىمىزدە بالالار قاي وبلىستا ەڭ كوپ دۇنيەگە كەلۋدە

استانا. قازاقپارات - قازاقستان وڭىرلەرىنىڭ ىشىندە تۋۋدىڭ ەڭ جوعارى دەڭگەيى ماڭعىستاۋ وبلىسىندا بايقالىپ وتىر.

بۇل تۋرالى قازاقپارات ۇ ە م باسپا ءسوز قىزمەتىنە سىلتەمە جاساپ حابارلايدى.

ستاتيستيكا كوميتەتىنىڭ حابارلاۋىنا قاراعاندا، قازاقستان وڭىرلەرىنىڭ ىشىندە 2017 -جىلى تۋۋدىڭ ەڭ جوعارى دەڭگەيى ماڭعىستاۋ وبلىسىندا (1000 تۇرعىنعا شاققاندا 29,74 تۋعاندار)، استانا قالاسىندا (28,23) جانە وڭتۇستىك قازاقستان وبلىسىندا (27,20) بايقالدى. ەڭ تومەنگى كورسەتكىش سولتۇستىك قازاقستان (13,17)، پاۆلودار (15,91) جانە شىعىس قازاقستان (15,98) وبلىستارىندا كورىنىس تاپقان.

«تۋۋدىڭ جالپى كوەففيسيەنتى 1000 ادامعا 2017 -جىلى 21,64 تۋعانداردى قۇرادى، قالالىق مەكەندەردە - 21,94 (2007 ج. - 21,27)، اۋىلدىق مەكەندەردە - 21,22 (2007 ج. - 20,25) قۇرادى. ەلدىڭ وڭىرلەرى بويىنشا ەڭ جوعارى تۋۋدىڭ جيىنتىق كوەففيسيەنتى ماڭعىستاۋ (3,78)، وڭتۇستىك قازاقستان (3,62) وبلىستارىندا، ال ەڭ تومەن دەڭگەيلەرى الماتى قالاسى (1,67) مەن قوستاناي (1,73) وبلىسىندا بايقالدى»، - دەلىنگەن كوميتەتتىڭ حابارلاماسىندا.