لەنيننەن اۋماي قالعان اباي ەسكەرتكىشى: ستەپنوگورسك اكىمى تۇسىنىك بەردى
ەسكە سالا كەتەيىك، الەۋمەتتىك جەلىدە ستەپنوگورسك قالاسىنداعى №6 -مەكتەپ- گيمنازياسىنىڭ اۋماعىندا تۇرعان اباي قۇنانباي ۇلىنىڭ بيۋست- ەسكەرتكىشىنە قاتىستى ۆيدەو تاراعان بولاتىن. ۆيدەو اۆتورى ا. قۇنانباي ۇلىنىڭ بيۋستىن لەنينگە ۇقساتىپ، وسىعان جول بەرگەن ادامداردى سىنعا الدى.
ونىڭ ايتۋىنشا، مۇنىڭ الدىندا بۇل جەردە ۆلاديمير لەنيننىڭ ەسكەرتكىشى تۇرعان. كەيىن باسىنا تاقيا كيگىزىپ، ابايعا ۇقساتا سالعان. اۆتوردىڭ پىكىرىنە جەلى قولدانۋشىلارى قوسىلىپ، وزدەرىنىڭ نارازىلىقتارىن بىلدىرۋدە.
وسىعان بايلانىستى قالا اكىمى ءانۋار كۇمپەكەيەۆ تۇسىنىك بەردى. شاھار باسشىسىنىڭ سوزىنشە، الەۋمەتتىك جەلىدە داۋعا ىلىككەن بيۋستىڭ ورناتىلعانىنا 40 جىلعا جۋىقتاعان. ابايدىڭ بيۋستىنە دەيىن مەكتەپتىڭ الدىندا ەشقانداي ەسكەرتكىش بولماعان.
«ستەپنوگورسك قالاسىنىڭ №6 -ورتا مەكتەبى 1977 -جىلى اشىلدى. ونىڭ اشىلۋى 31 -تامىزدا ءوتتى، قاز س ر و حالىققا ءبىلىم بەرۋ مينيسترلىگىنىڭ شەشىمىمەن مەكتەپكە ا. قۇنانباي ۇلىنىڭ ەسىمى بەرىلگەن. مەكتەپ ەكى كورپۋستان (باستاۋىش جانە جوعارى بلوك) تۇرادى، 2000 وقۋشىعا ەسەپتەلگەن. ەكى جىلدان كەيىن الماتى قالاسىندا اتاقتى جازۋشى جانە اقىنعا بيۋست قۇيىلدى. 1979 -جىلى قازان ايىندا بيۋست ستەپنوگورسك قالاسىنا جەتكىزىلىپ، ساۋلەتشىلەردىڭ جوسپارلاۋى بويىنشا №6 -ورتا مەكتەپتىڭ الدىنا ورناتىلعان»، - دەپ ءمالىم ەتتى ءانۋار كۇمپەكەيەۆ قازاقپارات تىلشىسىنە.
اۆتور: اسلان وسپانوۆ