باشقۇرتستان قازاقستان ارقىلى قىتايعا جول سالماق

استانا. قازاقپارات - باشقۇرتستان پاۆلودار ارقىلى قىتايعا جول سالماق.

بۇل تۋرالى پاۆلودار وبلىسىنىڭ اكىمى بولات باقاۋوۆپەن وتكەن رەسمي كەزدەسۋ بارىسىندا باشقۇرتستان رەسپۋبليكاسىنىڭ باسشىسى رۋستەم حاميتوۆ ايتتى، دەپ حابارلايدى pavlodarnews.kz.

رۋستەم حاميتوۆتىڭ ايتۋىنشا، قازاقستان مەن رەسەيدە الىس ەلدەردەن ىسكەري سەرىكتەستەردىڭ ىزدەستىرىلەتىنى جاسىرىن ەمەس. الايدا، تاجىريبە كورسەتكەندەي، كورشى مەملەكەتتەرمەن سەرىكتەس بولۋ الدەقايدا ءتيىمدى.

«قازاقستان - ءبىزدىڭ ەڭ جاقىن كورشىمىز پاۆلودار وبلىسى وزدەرى نيەت تانىتىپ، قىزىقتى ۇسىنىستاردى ورتاعا سالعانى اسا ماڭىزدى. ەرتىس وڭىرىندە اكتاس پەن تۇزدىڭ كولەمدى شوعىرلارى بارىن جاقسى بىلەمىز. سونىمەن قاتار، ۇلكەن جەڭىلدىكتەرى قاراستىرىلعان بۇل ايماق ارقىلى ءبىزدىڭ كاسىپكەرلەر قىتايعا جول توسەپ جاتىر. بۇل - كورشىمىزدىڭ بىردەن- ءبىر ارتىقشىلىعى. قىتاي حالىق رەسپۋبليكاسىمەن اگرووندىرىس ونىمدەرىن جانە اۋىلشارۋاشىلىق تاۋارلارىن جەتكىزۋ بويىنشا جۇمىستاردى جۇزەگە اسىرۋ جوسپاردا بار. بۇل تۇرعىدا پاۆلودار وبلىسى بىزگە كومەك قولىن سوزا الادى»، - دەدى مارتەبەلى مەيمان.

ءوز كەزەگىندە بولات باقاۋوۆ كەز كەلگەن سالادا قارىم- قاتىناس ورناتۋعا دايىن ەكەندىگىن جەتكىزدى.

«ءىرى شارۋا قوجالىقتارىنىڭ وكىلدەرى تاۋارلى ءسۇت فەرمالارىنىڭ جانە وسىمدىك شارۋاشىلىعىنىڭ جۇمىسىمەن تانىسۋ ماقساتىندا بىزبەن بىرگە كەلدى. ءىرى كاسىپورىندار مەن شارۋا قوجالىقتاردىڭ اۋىل شارۋاشىلىعى باعىتىنداعى ءوزارا ءتيىمدى جۇمىسىنا ءمان بەرۋ كەرەك. ءبىلىم، عىلىم سالاسىنداعى سەرىكتەستىك بويىنشا جوعارعى وقۋ ورىندارىنىڭ ورتاق ناتيجەلى ەڭبەگىن اتاپ وتكىم كەلەدى. 2015-2018 -جىلدارى س. تورايعىروۆ اتىنداعى پ م ۋ-دىڭ 35 ماگيسترانتى ۋفا مەملەكەتتىك مۇناي- تەحنيكالىق ۋنيۆەرسيتەتىندە تاجىريبەدەن وتكەن»، -  دەدى بولات باقاۋوۆ.

ايتا كەتەيىك، بولات باقاۋوۆتىڭ باشقۇرتستانعا جاساعان جۇمىس ساپارى بارىسىندا ەكى مەموراندۋمعا قول قويىلدى. ءبىرىنشى كەلىسىم «پاۆلودار» ارنايى ەكونوميكالىق اۋماعى مەن باشقاريا مۇناي- حيميا وڭدەۋ ينستيتۋتى اراسىندا جاسالسا، ەكىنشىسى پاۆلودار وبلىسىنىڭ كاسىپكەرلىك پالاتاسى مەن باشقۇرتستان رەسپۋبليكاسىنىڭ ساۋدا ونەركاسىپتىك پالاتاسى اراسىندا جۇزەگە استى.