الماتى وبلىسىندا جىر الىبى جامبىلعا ەسكەرتكىش ورناتىلدى

تالدىقوران. قازاقپارات - الماتى وبلىسى جامبىل اۋدانىنىڭ ورتالىعى ۇزىناعاش اۋىلىندا «رۋحاني جاڭعىرۋ» باعدارلاماسى شەڭبەرىندە جىرشى، جىراۋ جامبىل جابايەۆتىڭ ەڭسەلى ەسكەرتكىشى اشىلدى، دەپ حابارلايدى قازاقپارات الماتى وبلىس اكىمىنىڭ باسپا ءسوز قىزمەتىنە سىلتەمە جاساپ.

ەسكەرتكىشتىڭ اشىلۋ سالتاناتىنا وبلىس اكىمى اماندىق باتالوۆ، اۋدان جۇرتشىلىعى مەن ارداگەرلەرى قاتىستى.

وبلىس اكىمى ا. باتالوۆ ءوز قۇتتىقتاۋىندا: «رۋحاني جاڭعىرۋ» باعدارلاماسى اياسىندا جاستارعا ۇلگى بولارلىق ۇلكەن جۇمىستار اتقارىلۋدا. بۇگىن ۇلى بابامىز، ماقتانىشىمىز - جامبىل اقىننىڭ ەڭسەلى ەسكەرتكىشى مەسەناتتاردىڭ قولداۋىمەن، اسكەربەك ابايەۆ اعامىز باستاعان ازاماتتاردىڭ ۇيىتقى بولۋىمەن اشىلدى. وسىنداي ەسكەرتكىشتى ەڭ الدىمەن استانا قالاسىندا، كەيىن كيەۆتە، بەلگرادتا ورناتتىق. بۇگىن، مىنە، دەمەۋشىلەردىڭ كومەگىمەن يگى ءىس جامبىل اۋدانىندا جالعاسىپ وتىر.

ەلباسىنىڭ «رۋحاني جاڭعىرۋ» باعدارلاماسى وسىنداي يگى ىستەرگە ۇلكەن سەرپىن بەردى. قاراساي، الاكول اۋداندارىندا، تالدىقورعاندا وسى باعىتتا ءىرى-ءىرى جوبالار قولعا الىنىپ جاتىر. ونىڭ ىشىندە دەنە شىنىقتىرۋ - ساۋىقتىرۋ كەشەندەرى، وليمپيادالىق ستاندارتپەن سالىناتىن باسسەين، جەڭىل اتلەتيكا مانەجى سياقتى سپورت نىساندارى بار. مۇنداي باستامالار بارلىق اۋداندا اتقارىلا باستادى. جۋىردا وبلىسقا كەلگەن ساپارىندا ەلباسىمىز وڭىردەگى اتقارىلىپ جاتقان ىستەرگە وڭ باعا بەردى. وسى بەرىلگەن باعادا جامبىل اۋدانى حالقىنىڭ ۇلەسى زور دەپ بىلەمىن. بىرلىگىمىز بەكەم بولسىن، بابامىزدىڭ ەسكەرتكىشى قۇتتى بولسىن، - دەدى.

سونىمەن قاتار وبلىس باسشىسى ءوز سوزىندە اۋىلدىڭ جولدارىن جوندەۋگە، اباتتاندىرۋعا قولداۋ كورسەتىلىپ وتىرعانىن دا تىلگە تيەك ەتتى. مۇنان سوڭ «تۋعان جەرگە تاعزىم» قورىنىڭ ءتوراعاسى اسكەربەك ابايەۆ ءسوز الدى.

«اۋداننىڭ قاستەك اۋدانى بولىپ قۇرىلعانىنا 90 جىل، جامبىل اتاۋى بەرىلگەنىنە 80 جىل تولىپ وتىر. وسى مەرەيلى داتاعا وراي اۋدان ورتالىعىنا جامبىل بابا ەسكەرتكىشىن ورناتۋ تۋرالى كوپشىلىك باستاما كوتەرىپ، اۋداندىق ءماسليحات دەپۋتاتتارى ۇسىنىس ايتىپ، بۇل ۇسىنىس وبلىس باسشىسى تاراپىنان قولداۋ تاپتى. ءسويتىپ «تۋعان جەرگە تاعزىم» قورى قۇرىلدى. قورعا قارجى جيناقتاپ، وسى ەسكەرتكىشتىڭ اشىلۋىنا ۇيىتقى بولعان ازاماتتارعا، قولداۋ بىلدىرگەن وبلىس باسشىلىعىنا العىس ايتامىن»، - دەدى ءا. ابايەۆ.

وسى مازمۇنداس ىزگى تىلەگىن تۇڭعىش وليمپيادا چەمپيونى، كاسىپكەر جاقسىلىق ۇشكەمپىروۆ تە ارنادى. قۇتتىقتاۋ تىلەكتەردەن سوڭ ەسكەرتكىشتىڭ جابۋى اشىلىپ، شاشۋ شاشىلىپ، سالتانات اۋدان ونەرپازدارىنىڭ كونتسەرتىنە ۇلاستى.

ەستەرىڭىزگە سالار بولساق، اقىننىڭ قولىندا دومبىراسىن ۇستاپ تۇرعان ەڭسەلى ەسكەرتكىشىنىڭ اۆتورى - قازبەك جارىلعاپوۆ. قولا ءمۇسىن «تۋعان جەرگە تاعزىم» قوعامدىق قورىنىڭ قارجىسىنا تۇرعىزىلعان. «اقىندار مەن باتىرلار ەلى» پاركىمەن بىرگە تۇتاس كەشەندى قۇراپ تۇرعان ەسكەرتكىش ۇزىناعاشتىڭ كىرە بەرىسىندە ورناتىلعان. بۇل پاركتىڭ قۇرىلىسىن «ارنايى قۇرىلىس كومپانياسى» ج ش س جۇرگىزىپ، بۇل جۇمىستارعا قوردىڭ 60,4 ميلليون تەڭگەگە جۋىق قارجىسى جۇمسالعان.