گوللانديا پورتىندا «رايىمبەك باتىر» مەن «ناۋرىزباي باتىر» كەمەلەرى سۋعا ءتۇسىرىلدى

استانا. قازاقپارات - سەيسەنبىدە روتتەردام تەڭىز پورتىندا بۋكسيرلەردى سۋعا ءتۇسىرۋدىڭ سالتاناتتى ءراسىمى ءوتتى، دەپ حابارلايدى قازاقپارات نيدەرلاندتاعى ق ر ەلشىلىگىنە سىلتەمە جاساپ.

قازاقستاندىق كومپانيانىڭ تاپسىرىسىمەن «De Hoop International Lobith» گوللاندىق كەمە جاسايتىن ورىندا جاسالعان «رايىمبەك باتىر» مەن «ناۋرىزباي باتىر» بۋكسيرلەرى مۇز قاتاتىن كاسپي تەڭىزىنىڭ سولتۇستىك بولىگىندە جۇزۋگە ارنالعان.

تەڭىز بۋكسيرلەرى قازاقستاندىق بايراقپەن روتتەردام پورتىنان رەسەي فەدەراتسياسىنىڭ ىشكى سۋ جولدارى ارقىلى كاسپي تەڭىزىنە، قازاقستاندىق باۋتينو پورتىنا جول تارتادى.

گوللانديالىق كومپانيا قازاق باتىرلارىنىڭ اتىمەن اتالاتىن التى تەڭىز بۋكسيرىن جاساعان، ولاردىڭ قاتارىندا «قابانباي باتىر»، «قاراساي باتىر»، «بوگەنباي باتىر» جانە «وتەگەن باتىر» بار.

تەڭىز كەمەلەرى كاسپي تەڭىزىنىڭ سولتۇستىك- شىعىس سەكتورىنداعى پرورزا تۇبەگى ماڭايىنداعى كەمە جۇزەتىن ارنا ارقىلى «تەڭىزشيەۆرويل» كومپانياسىنىڭ ءۇشىنشى زاۋىتىنىڭ قۇرىلىسىنا ارنالعان ءىرى گاباريتتى جۇكتى تاسىمالداۋ ءۇشىن پايدالانىلادى. اتالمىش زاۋىت - الەمدەگى قازاقستاننىڭ مۇناي ءوندىرىسى سالاسىنا ارنالعان ءىرى ينفراقۇرىلىمدىق قۇرىلىس جوباسى، بىلايشا ايتقاندا، بولاشاق كەڭەيتۋ جوباسى. ساراپشىلاردىڭ باعالاۋىنشا، قۇرىلىس اياقتالعان بويدا مۇناي ءوندىرۋ 2022 - جىلدان باستاپ جىلىنا 10 ميلليون تونناعا ارتادى.

نيدەرلاندتاعى قازاقستان ەلشىسى ماعجان يلياسوۆتىڭ ايتۋىنشا، «Caspian Offshore Construction»  قازاقستاندىق كومپانياسىنىڭ فلوتىن كەڭەيتۋ كاسپي تەڭىزىنىڭ قازاقستاندىق بولىگىن دامىتۋدا ۇلكەن ءرول اتقارادى. تەڭىز بۋكسيرلەرى جانە كەمە جۇزەتىن ارنانى پايدالانۋ ارقىلى جۇك تاسىمالىنىڭ ۋاقىتشا شىعىنىن ءبىرشاما تومەندەتۋگە بولادى، سەبەبى جوبا اقتاۋ، باۋتينو جانە اتىراۋ وزەن پورتىنا توقتاماي، اينالما جولدى پايدالانۋعا مۇمكىندىك بەرەدى.

شاراعا نيدەرلاندتاعى قازاقستان ەلشىلىگىنەن، جوبا كومانداسى، سونداي- اق، 60 استام قازاقستان مەن گوللانديا تاراپىنان سەرىكتەس كومپانيالاردىڭ وكىلدەرى قاتىستى.