اقبەرەن ەلگەزەك قازاقستاندا «ادەبيەت اكادەمياسىن» قۇرۋدى ۇسىندى

استانا. قازاقپارات - ق ر مادەنيەت جانە سپورت ءمينيسترى ارىستانبەك مۇحامەدي ۇلىنىڭ توراعالىعىمەن ق ر ۇلتتىق اكادەميالىق كىتاپحانادا وتىزعا تارتا جاس اقىندار مەن جازۋشىلاردىڭ قاتىسۋىمەن جاستار كەڭەسىنىڭ فورۋمى ءوتتى، دەپ حابارلايدى قازاقپارات ءتىلشىسى.

ايتا كەتسەك، ۇلتتىق ادەبيەت پەن اقىندىق ونەردى قولداۋ جانە ناسيحاتتاۋ ماقساتىندا ق ر مادەنيەت جانە سپورت مينيسترلىگى جانىنان جاستار كەڭەسى قۇرىلعان بولاتىن. جاستار كەڭەسى - ونەر جانە ادەبيەت سالاسىندا ادىستەمەلىك- ساراپتامالىق جۇمىستى جۇزەگە اسىراتىن كونسۋلتاتيۆتىك- كەڭەستىك ورگان بولىپ تابىلادى.

بۇدان كەيىن مادەنيەت جانە سپورت ءمينيسترى، جاستار كەڭەسىنىڭ ءتوراعاسى ارىستانبەك مۇحامەدي ۇلىنىڭ بۇيرىعىمەن جاستار كەڭەسى ءتوراعاسىنىڭ ورىنباسارى بولىپ اقبەرەن ەلگەزەك، ال كەڭەستىڭ حاتشىسى بولىپ باۋىرجان قاراعىز ۇلى بەكىتىلگەنى حابارلانعان ەدى.

بۇگىن وتكەن كەڭەستىڭ العاشقى فورۋمىندا «جاستار ادەبيەتىنىڭ بۇگىنگى جاي- كۇيى»، «رۋحاني جاڭعىرۋ» باعدارلاماسى اياسىندا وتاندىق ادەبيەتتەردى شەتەلگە ناسيحاتتاۋ» سىندى وزەكتى ماسەلەلەر كوتەرىلىپ، جاس اقىن- جازۋشىلار ءوز ۇسىنىس- پىكىرلەرىن جەتكىزدى.

 «مينيسترلىك جاس قالامگەرلەردى قولداۋ ماقساتىندا جىل سايىن «جاس تولقىن» سەرياسىمەن جاس بۋىنداردىڭ ەڭبەكتەرىن جارىققا شىعارىپ وتىرادى. وسى جىلى اتالمىش سەريامەن قۋات قيىقبايدىڭ «بەيۋاقىت» جانە باعاشار تۇرسىنباي ۇلىنىڭ «ءتىل مەن جۇرەك» سىن ماقالالارى شىعارىلدى.  ق ر «مادەنيەت تۋرالى» زاڭىنا وزگەرىستەر ەنگىزىپ، قوعامدىق ماڭىزى بار ادەبيەتتى ساتىپ الۋ، باسىپ شىعارۋ جانە تاراتۋ قاعيدالارىن بەكىتىلگەن ەدى. وسى رەتتە، 2017 -جىلعا قوعامدىق ماڭىزى بار ادەبيەتتى ساتىپ الۋ بويىنشا كوميسسيالاردىڭ شەشىمىمەن 52 شىعارما ساتىپ الىندى»، - دەدى ۆەدومستۆو باسشىسى.

قوعامدىق ماڭىزى بار ادەبيەتتى ساتىپ الۋدىڭ نەگىزگى ماقساتى جازۋشىلارعا قالاماقى تولەي وتىرىپ، جاڭا تاقىرىپتا، جاڭا باعىتتا شىعارمالاردى شىعارۋ، جاس قالامگەرلەردىڭ تولقىنىن ارتىرۋ بولىپ تابىلادى.

جيىندا «جاستار ادەبيەتىنىڭ بۇگىنگى جاي- كۇيى» جايلى قازاقستان جازۋشىلار وداعى ءتوراعاسىنىڭ ءبىرىنشى ورىنباسارى اقبەرەن ەلگەزەك ءسوز تىزگىنىن الدى.

«جاستار ادەبيەتىنىڭ جەتىستىكتەرى تۋرالى ايتتىق. الايدا، جاستاردىڭ بارلىعى تالانتتى بولعانمەن، ءبارى گەني ەمەس. شىعارماشىلىق ادامىنا ءومىرباقي كەمەلدەنۋ قاجەت، ىزدەنۋ قاجەت. سول سەبەپتەن، مەن قازاقستاندا جوعارى وقۋ ورنىنداي مارتەبەسى بار «ادەبيەت اكادەمياسىن» قۇرۋدى ۇسىنامىن. بۇل اكادەميادا ءمۇيىزى قاراعايداي، كلاسسيك قالامگەرلەرىمىزدىڭ شەبەرحانالارى جۇمىس ىستەپ تۇرسا... قازىرگى تەحنولوگيالاردى پايدالانا وتىرىپ، جاقىن جانە الىس شەتەل ينتەللەكتۋالدارىنىڭ ونلاين لەكسيالارى تاراتىلىپ وقىتىلسا، اكادەميادا تەگىن اعىلشىن جانە وزگە دە الەم تىلدەرى كۋرستارى جۇمىس ىستەپ تۇرسا دەيمىز. سودان كەيىن. ماسەلەن، تىنىشتىقبەك ابدىكاكىم  ۇلىنىڭ نەمەسە ەسەنعالي راۋشانوۆ، نە قابدەش جۇمادىلوۆ پەن بەكسۇلتان نۇرجەكەنىڭ شەبەرحانالارىنا تۇسكەن جاس قالامگەرلەرگە ورتاق لەكسيالار ءجۇرىپ تۇرسا دەگەن تىلەك بار. بۇل جالعىز ادەبيەتكە عانا ەمەس، جالپى قوعام ساناسىنىڭ ينتەللەكتۋالدىق دامىپ- وسۋىنە سالىنعان زور ينۆەستيتسيا بولار ەدى»، - دەدى ول.

اقبەرەن ەلگەزەكتىڭ ۇسىنىسىنا ۆەدومستۆو باسشىسى تاراپىنان قولداۋ تابىلىپ، پرەزيدەنت اكىمشىلىگىمەن بىرلەسە جۇمىستار اتقارۋعا ۋادە ەتىلدى. سونداي- اق، جيىندا جازۋشىلار وداعىنىڭ استانا قالالىق فيليالىنىڭ ديرەكتورى باۋىرجان قاراعىز ۇلى دا ءسوز الىپ، ءوز ۇسىنىستارىن جەتكىزدى.

اۆتور: ايان بەكەن ۇلى