تاياۋدا ەلىمىزدە قاي جولدار اقىلى بولادى

 استانا. قازاقپارات - ەلوردادا حالىق الدىنداعى ەسەپتىك كەزدەسۋدە ينۆەستيتسيالار جانە دامۋ ءمينيسترى جەڭىس قاسىمبەك الداعى ىسكە قوسىلاتىن اقىلى جولدار تۋرالى ايتىپ بەردى، دەپ حابارلايدى قازاقپارات ءتىلشىسى.

«جولدارعا اقىلى جۇيەنى ەنگىزۋ جۇمىستارى جالعاسۋدا. بۇگىندە ءبىرىنشى اقىلى جول جۇيەسى «استانا- شۋچينسك» ارالىعىندا جۇمىس ىستەپ تۇر. سايكەسىنشە، ول جولدى كۇتىپ ۇستاۋعا قاجەتتى بارلىق شىعىنداردى وتەپ كەلەدى جانە قوسىمشا تابىستى الىپ كەلۋدە. 2018 -جىلدىڭ ەكىنشى جارتىجىلدىعىندا «استانا- تەمىرتاۋ» ، «الماتى- قاپشاعاي» ، «الماتى- قورعاس» ۋچاسكەلەرىندە اقىلى جۇيە ىسكە قوسىلادى» ، - دەدى مينيستر سۇراقتارعا جاۋاپ بەرە وتىرىپ.

جەڭىس قاسىمبەك وسىعان دەيىن بۇل جۇمىستار بيىلعى ءبىرىنشى توقساندا اياقتالاتىنى جوسپاردا بولعانىن ەسكە سالىپ ءوتتى.

«الايدا ءتۇرلى تەحنيكالىق جاعدايلارعا بايلانىستى «الماتى- قورعاس» ءبىرىنشى ۋچاسكەسىن الداعى ءبىر جارىم ايدا ىسكە قوسۋدى جوسپارلاپ وتىرمىز. ال قالعان ەكى ۋچاسكە تامىز جانە قىركۇيەك كەزىندە ىسكە قوسىلادى. جالپى 2022 -جىلعا قاراي اقىلى جولدار 7 مىڭ شاقىرىمدى قۇرايدى، سونداي- اق وسى جۇيە ارقىلى جىلىنا 40 ميلليارد تەڭگە جينالماق. بۇل ءوز كەزەگىندە اۆتوموبيل جولدارىنىڭ بارشا رەسپۋبليكالىق جەلىسىن نورماتيۆتىك تۇرعىدا كۇتىپ ۇستاۋعا مۇمكىندىك بەرەدى» ، - دەپ ءتۇيدى مينيستر.