ۋاقىت - ءومىردى جاسايتىن ماتەريال

 استانا. قازاقپارات - سۇلەيمەن پاتشانىڭ ساقيناسىنىڭ سىرتىندا «ءبارى وتكىنشى»، - دەگەن ءسوز بار ەكەن. قينالعاندا، قايعى باسقاندا سونى كورىپ ءوزىن- ءوزى جۇباتادى ەكەن.

 ءبىر كۇنى جازۋدى وقىپ، جۇبانۋدىڭ ورنىنا ىزاسى كەلىپ، ساقيناسىن الىپ، لاقتىرىپ جىبەرگەندە، ساقينانىڭ ىشكى جاعىندا تاعى ءبىر جازۋ بارىن بايقايدى. ساقينانى الىپ، وقىپ قاراسا: «بۇل دا وتەدى»، - دەگەن ءسوز ەكەن. اشى مىسقىلمەن سۇلەيمەن پاتشا ساقينانى قايتا كيىپتى جانە بۇدان بىلاي قولىنان تاستاماعان ەكەن دەسەدى. نازارلارىڭىزعا مىرزاگەلدى كەمەلدىڭ «ابزالدىق الىپپەسىنەن» ۋاقىتقا قاتىستى تامسىلدەردى ۇسىنامىز.

جاڭا كۇنگە جەڭەتىنىڭە سەنىمدى كۇرەسكە، جاڭا ومىرگە كىرگەندەي جارقىن كوڭىلمەن كىر. «اعارىپ اتقان ءاربىر تاڭ قيىندىقتان شىعۋ جولىن كورسەتەدى»، - دەپتى ومار حايام.

 • دۇرىس پايدالانا بىلگەندەرگە ءومىر قىسقا ەمەس. دۇرىس پايدالانا بىلمەگەندەرگە ۋاقىت جەتپەي قالعان سياقتى بولادى. تىعىرىققا تىرەلدىم دەپ تۇڭىلگەندەر - وزىنە بەرىلگەن ۋاقىتتى وزدەرى قىسقارتىپ جۇرگەندەر. ومىردەن ءوش العىسى كەلگەندەر وزىنە ءوزى قول جۇمسايدى، وزىنە ءوزى نارازى ادامدار ومىردەن ءوش العىسى كەلگەندەي ەتىپ جۇمىس ىستەيدى.

 • ادامزات تاريحىنداعى ەڭ العاشقى فيلوسوفيالىق تراكتاتتاردىڭ ءبىرى - ەگيپەت پاپيرۋسىنا جازىلعان «ومىردەن تۇڭىلگەن ادامنىڭ ءوزىنىڭ رۋحىمەن اڭگىمەسى» دەپ اتالاتىن شىعارما. بۇندا ادام ءوزىنىڭ رۋحىمەن سويلەسىپ، وعان: بۇل ءومىر ناشار، سوندىقتان مەن وزىمە- ءوزىم قول جۇمساپ، تەزىرەك جوعارعى ومىرمەن قاۋىشسام، - دەيدى. وعان رۋحى: تومەندە قالاي بولسا، جوعارىدا دا سولاي، - دەپ جاۋاپ قاتادى. دەمەك، جوعارعى جاقتا جاقسى بولۋى ءۇشىن، تومەنگى جاق دامىعان بولۋى كەرەك. جوعارىدا، اسپاندا، ەڭ تومەننەن ءوسىپ جەتىلمەگەن ەشتەڭە جوق.

 • بۇل وتە ەرتە زامانعى اقىل. ونىڭ بەلگىلى بولعانىنا ءۇش مىڭداي جىل بولدى. بۇگىن بۇل اڭگىمەنى ەسكە ءتۇسىرۋ ارقىلى ءبىز ءارقاشان ءوزىمىزدىڭ دامۋ مۇمكىندىگىمىزدەن اسىپ تۇسۋگە ۇمتىلعان اسىعىستىعىمىزدىڭ نەگىزسىزدىگىن ەسكە ءتۇسىرۋىمىز كەرەك. ءبىر كۇنىڭ وتكەنىنە وكىنەتىن جاعدايعا جەتكەندە عانا ءومىردىڭ قادىرىن سەزىنە باستادىم دە. جەتىستىك دەگەن ۇلگەرۋ دەگەن ءسوز.

 • « ءومىر ويىن سياقتى، بىرەۋ كۇرەسۋ ءۇشىن كەلەدى، بىرەۋ ساۋدالاسۋ ءۇشىن، ال ەڭ باقىتتىلارى قاراپ تۇرۋ ءۇشىن»، - دەپتى پيفاگور.

 • بىزدە ۋاقىتتى بوسقا ءولتىرۋ دەگەن قىلمىس بار، ول قىلمىستىڭ ەڭ كوپ تاراعان ءتۇرى.

 • «ۋاقىت - ءومىردى جاسايتىن ماتەريال. ول شىركىن اقسۇيەكتىكتى مويىندامايدى. حانعا دا، قاراعا دا بەرىلەتىن مەرزىم - تاۋلىگىنە 24 ساعات. ادامنىڭ بوسقا كەتكەن ءاربىر ءساتى وتقا جاققان اقشامەن تەڭ، كىسىنىڭ كىسىلىگى ۋاقىتتى سەزىنۋدەن باستالادى»، - دەپتى بيزنەستى ناسيحاتتاۋشى انگليالىق كەسسون.

زامانا - سوققان جەل. ماعىنالى ءومىر سۇرگىڭ كەلسە وعان جەلكەن بول. جەلكەن بولۋ، ۇدايى جەلدىڭ وتىندە تۇرۋ - ايتۋعا عانا وڭاي. وعا
 مىقتىلىق كەرەك. جاي ماتا جەلكەن بولا المايدى.

 • ءومىر ءسۇرۋ تاقتايداي تەگىس جولدىڭ باسىنان سوڭىنا شىعۋ ەمەس، ونىڭ بۇرىلىس- بۇلتالاڭى، وتكەل بەرمەس اسۋلارى، قيىن قىستاۋ كەزەڭدەرى ءومىرىڭنىڭ قۋانىشتى ساتتەرىمەن ارالاسىپ، ساپىرىلىسىن جاتاتىن نارسە.

 • ادامنىڭ تۋۋى مەن ءولۋىن ەڭ قىسقا سوزبەن بەينەلە دەسە، مەن ايتار ەدىم: ءسۇت، سيا، قان. ءسۇت - كەلۋ، ياعني، تۋماق؛ سيا - ءبىلۋ، تانۋ، ياعني، ءومىر سۇرمەك؛ قان - ءبىتۋ، ياعني، ولمەك. نەمەسە، تاڭنىڭ اتۋى، كۇنى بويعى ءومىر، كۇننىڭ باتۋى.

 • بارلىق جامان نارسەلەردى ەكى ءتۇرلى جولمەن ەمدەۋگە بولادى: ءبىرىنشىسى - ۋاقىت، ەكىنشىسى - ۇندەمەۋ. وتكەنگە قاراپ باسىڭدى ي، ەرتەڭگە قاراپ بىلەگىڭدى سىبان، - دەگەن.

 • ءومىر مەيرام ەمەس، سوندىقتان ومىردە ىلعي كوڭىلدى بولا بەرۋ مۇمكىن ەمەس. ءبىز تاڭدانۋمەن، ۇمىتتەنۋمەن، سۇيۋمەن ءومىر سۇرەمىز. ءومىر زاڭى - الدا اتقاراتىن ءىس كوپ، كورەتىن قىزىق كوپ.

 • ءومىر سۇرقاي دەيمىز ءبىز. ءومىردى سۇرقاي ەتەتىن ءوزىمىز. «وتكەنىڭنەن قىزۋلى وت الۋىڭ دا، ورتەنىپ بىتكەن كۇل الۋىڭ دا مۇمكىن»، - دەگەن جورەس.

 • ۋاقىت ءوتىپ بارا جاتىر دەيمىز ءبىز. تالمۋدتا: «ۋاقىت ءوتىپ بارا جاتقان جوق، ۋاقىت توقتاپ تۇر، ءبىز ءوتىپ بارا جاتىرمىز»، - دەيدى. ناق وسى ويدى ليەۆ تولستوي بىلاي ايتىپتى: «دۇنيەدە ءجۇرمىن دەپ ويلاما، دۇنيەدەن ءوتىپ بارامىن دەپ ويلا».

وزىنە ءوزى جانى اشىمايتىن ادامعا كومەكتەسۋدىڭ پايداسى جوق. «ساتىلاپ كوتەرىلگىسى كەلمەيتىن ادامدى ونىمەن سۇيرەتىپ شىعارا المايسىڭ»، - دەگەن ەندريۋ كارنەگي. ساعان باسپالداق ۇسىنسا، ونىمەن كوتەرىپ شىعارمادى دەمە. باسپالداقپەن كوتەرىلۋگە جۇرەگى داۋالامايتىنداردىڭ ودان ءتۇسۋى ءتىپتى دە قيىن بولادى.

 • ايناعا وكپەلەمە. ۇرپاعىڭ - ايناداعى ءوزىڭ. ۇرپاعىڭا بۇگىن ەككەنىڭدى بىرنەشە جىلداردان كەيىن الاسىڭ: مىنەز، تاعدىر، كەلەشەك.

بالالارىڭا جاردەم بەرە تۇرىپ، ولاردى وزدەرىنە وزدەرى جاردەم بەرۋىن تالاپ ەت، ايتپەسە ولاردا كەدەرگىنى بۇزۋ قابىلەتى تاباندىلىق، مىنەزدىلىك بولماي قالادى. بايقايسىڭ با، قۇس بالاپاندارىنا اۋزىمەن تاماق بەرەدى، ءبىراق ءوز بەتىمەن ۇشۋدى ۇيرەتۋ ءۇشىن كوتەرىپ ۇشىپ، بيىككە شىققاندا تاستاپ جىبەرەدى.

 • ومىردە جەڭىس پەن جەڭىلىس كەزەك كەلەدى. جەڭسەڭ، ارينە، جاقسى. جەڭگەن جاقتىڭ جاراسى تەزىرەك جازىلادى.

 • الەكساندر ماكەدونسكي مەن ديوگەن ەكەۋى اريستوتەلدىڭ شاكىرتتەرى بولعان. ماكەدونسكي جەڭىمپاز پاتشا بولدى، ديوگەن تاركى دۇنيە بولىپ، بوشكەنى باسپانا ەتتى. كەزەكتى جورىققا اتتانىپ بارا جاتقاندا ماكەدونسكي ديوگەننىڭ بوشكەسىنىڭ جانىنا توقتاپ، «نە تىلەگىڭ بار ايت، ورىنداپ كەتەيىن«، - دەپتى. «كۇننىڭ كوزىن قالقالاماي بىلاي تۇرشى»، - دەپتى ديوگەن. «ەگەر مەن الەكساندر بولماسام، ديوگەن بولار ەدىم»، - دەگەن ەكەن سوندا ماكەدونسكي سەرىكتەستەرىنە. داڭقتىڭ، اتاقتىڭ، جاۋلاپ العان جەردى ساقتاپ قالۋدىڭ مىندەتى مەن جاۋاپكەرشىلىك سالماعى پاتشانىڭ وزىنە وڭاي سوقپايتىنىن وسىدان بىلۋگە بولادى. جەڭىستىڭ باقىتىمەن بىرگە سورى دا بار.

ءومىر باقي ءبىز ەكى قاتەرلى كۇشتىڭ قاراماعىندا بولامىز: بىرەۋى ءولىم، ەكىنشىسى - ادامداردىڭ پىكىرى.

سەنى ەشكىم ىزدەمەي قوياتىن جاعدايدان ساقتان. ۇيىڭدە تەلەفونىڭ مەن ەسىگىڭنىڭ شىلدىرى ەستىلمەي، ساعاتتىڭ شىلدىرى عانا ەستىلسە، سول جامان.

 • جاسىڭ ۇلعايعان سايىن اينالايىن دەگەن ءسوزدى كوپ ايت، سوندا سۇيكىمدى بولاسىڭ. ءبىراق «اينالايىنىڭ» شىن بولسىن، شىن بولماسا ءبارىبىر سەزىپ قويادى، الداي سالامىن دەپ ويلاما. قارتايا ءبىلۋ دە ونەر. قازىنا بوپ قارتايۋ بار، قازىمىر بوپ قارتايۋ بار.

 • ءوزىڭنىڭ قاجەتتى ەكەنىڭدى سەزىن، ءبىراق قاجەتتى ەكەنمىن دەپ ءوزىڭ عانا ويلاپ جۇرمە. تىپتەن قاجەتسىز ادامدار بولمايدى، بەلگىلەنگەن مەرزىمگە دەيىن عانا قاجەتتى ادامدار بولادى.

بۇلاقتىڭ سۋىن ءىشىپ بولىپ جونىنە كەتىپ بارا جاتقانداردى كورىپ ويلادىم: ادامدى دا وسىلاي پايدالانىپ بولىپ، جونىمىزگە كەتىپ جاتادى ەكەنبىز- اۋ دەپ.

 • بەندجامين فرانكلين كۇندەلىكتى ۇساق تىرشىلىكتىڭ مىناداي 13 ءپرينتسيپىن ۇستانادى ەكەن: ۇستامدىلىق، ۇندەمەستىك، ءتارتىپ، تاۋەكەل، قابىلەتتىلىك، اشىقتىق، ادىلدىك، تيىمدىلىك، شامانى ءبىلۋ، تازا تابەتتىلىك، تىنىشتىق، نيەت تازالىعى، قاراپايىمدىلىق.

 • «ءوز ويلارىڭدى قاناتىم دەپ ەسەپتە، تىلەگىڭدى ۇرپاعىم دە»، - دەيدى قىتاي ناقىلى.

 

Massaget.kz