قازاقستان عارىش سالاسىن دامىتۋ ستراتەگياسىن ازىرلەۋگە كىرىستى
ق ر قورعانىس جانە ايەروعارىش ونەركاسىبى ۆيتسە- ءمينيسترى مارات نۇرعوجيننىڭ ايتۋىنشا، ءبىرىنشى باعىت بويىنشا قازاقستان زىمىران ۇشىرۋ قىزمەتتەرىنىڭ الەمدىك نارىعىنا كىرۋى كەرەك.
«وسى ورايدا ەكولوگيالىق جاعىنان قاۋىپسىز «بايتەرەك» اتتى زىمىران كەشەنىن قۇرۋ جوسپارلانىپ وتىر. اتالعان كەشەن بايقوڭىر عارىش ايلاعىنداعى «زەنيت- م» نىساندارى نەگىزىندە قۇرىلادى. بۇدان بولەك، جەڭىل جانە وتە جەڭىل ساناتقا جاتاتىن زىمىران تاسىعىشتار جاسالادى»، - دەدى م. نۇرعوجين قازعارىشتىڭ 25 جىلدىعىنا ارنالعان فورۋمدا. اتالعان شارا V حالىقارالىق «KADEX-2018» قارۋ- جاراق پەن اسكەري تەحنيكا كورمەسى اياسىندا ءوتتى.
ستراتەگيانىڭ ەكىنشى باعىتى - عارىش ارقىلى بايلانىس پەن حابار تاراتۋ قىزمەتتەرىن كەڭەيتۋ. سونىڭ اياسىندا كورشى ەلدەردىڭ بايلانىس وپەراتورلارىنا ترانسپوندەرلەردى جالعا بەرۋ جوسپارلانىپ وتىر. بۇدان بولەك، KazSat-2R مەن KazSat-3Rجەر سەرىكتەرى قۇراستىرىلادى. اتالعان اپپاراتتار 2023-2029 -جىلدارى پايدالانۋعا بەرىلەدى دەگەن جوسپار بار.
«ءۇشىنشى باعىتقا سايكەس، جەردى قاشىقتان زونداۋ قىزمەتتەرىن كەڭەيتۋ كەرەك. ەندىگى كەزەكتە، گەوپورتالدار مەن گەسوسەرۆيستەردى قۇرۋ ارقىلى اقپاراتتىق قىزمەت كورسەتۋگە كوشكەن ماڭىزدى. وسىعان بايلانىستى KazGeoSat-تىڭ ەكى جەر سەرىگى جاسالادى. ولار قازىرگى اپپاراتتاردى كەز كەلگەن ۋاقىتتا الماستىرا الادى. سونداي- اق، 2023 -جىلعا دەيىن KazSat-1 رادارلىق جەر سەرىگىن قۇراستىرىپ شىعارۋ جوسپارلانىپ وتىر. ءسويتىپ، عارىش سالاسىنداعى قىزمەت كورسەتۋدىڭ الەمدىك نارىعىنا شىعۋىمىز قاجەت»، - دەپ اتاپ كورسەتتى م. نۇرعوجين.
ستراتەگيانىڭ ءتورتىنشى باعىتى عارىش تەحنيكاسىن ءوز جەرىمىزدە قۇراستىرۋدى كوزدەيدى. اتالعان مىندەتكە سايكەس، وتاندىق ماتەريالداردىڭ كولەمىن 55 پروتسەنتكە جەتكىزۋ كەرەك. شەت ەلدەردەن تاپسىرىس الۋ قاراستىرىلىپ وتىر. بەسىنشى باعىت اياسىندا قازاقستان عارىش كەڭىستىگىن زەرتتەۋدىڭ جاھاندىق جوسپارىنا اتسالىساتىن بولادى. وسىعان وراي، ديامەترى 10 مەتر بولاتىن اۆتوماتتى تەلەسكوپتى ورناتۋ جوسپارلانعان.
التىنشى باعىتقا سايكەس، سپۋتنيكتىك ناۆيگاتسيا قىزمەتتەرى كەڭەيەتىن بولادى. سونىڭ اياسىندا گەودەزيا مەن كارتوگرافياعا ارنالعان قوسىمشالار جاسالادى.
ايتا كەتەيىك، اعىمداعى جىلى قازاقستاننىڭ جاڭا ەكى جەر سەرىگى عارىشقا ۇشىرىلادى. «جىلدىڭ سوڭىندا تاعى ەكى جاڭا جەر سەرىگىن عارىشقا ۇشىرايىن دەپ وتىرمىز. اتالعان اپپاراتتاردى قازاقستان مەن ۇلى بريتانيا ماماندارى قۇراستىردى. بۇگىندە اتالعان جوبا 98 پروتسەنتكە دايىن. سونىڭ ارقاسىندا قازاقستاندىق مامانداردىڭ بەس بىردەي جاڭالىعى سىناقتان وتەدى. ول مامانداردىڭ بارلىعى ەۋروپا مەن رەسەيدەن تاجىريبە جيناقتاپ قايتقان»، - دەپ اتاپ كورسەتتى م. نۇرعوجين.
اۆتور: ارمان اسقاروۆ