پۋتين ايتقان ەرەكشە زىمىرانداردىڭ سىناعى ءساتسىز اياقتالدى
بۇل تۋرالى ا ق ش- تىڭ CNBC تەلەارناسى حابارلاعان.
تەلەارنانىڭ حابارلاۋىنشا، ەڭ ۇزاق ۇشتى دەگەن زىمىراننىڭ ءوزى شامامەن 35 شاقىرىم عانا ۇشقان. زىمىرانمەن بايلانىس ءۇزىلىپ، جەرگە قۇلاعان. امەريكانىڭ بارلاۋ قىزمەتىندەگى بەلگىسىز اقپارات كوزىنە سۇيەنگەن تەلەارنا سىناق كەزىندە يادرولىق قوندىرعىنىڭ ىسكە قوسىلماعانىن ايتادى. اقپارات كوزىنىڭ مالىمەتىنشە، قۇراستىرۋشىلار دايىن ەمەس ەكەنىن ايتسا دا، كرەمل سىناقتى جۇرگىزۋدى اسىقتىرعان.
پۋتين 2018 -جىلى 1- ناۋرىزدا فەدەرالدىق كەڭەستە جولداۋ جاساپ، رەسەي قارۋلى كۇشتەرى تاياۋدا «امەريكالىق زىمىراننان قورعانىس جۇيەسىنەن اينالىپ وتەتىن» جاڭا يادرولىق قاناتتى زىمىراندارمەن جابدىقتالاتىنىن مالىمدەگەن.
پۋتيننىڭ سوزىنشە، قاناتتى زىمىران وقتۇمسىقتى الەمنىڭ كەز كەلگەن نۇكتەسىنە اپارا الادى جانە اۋە شابۋىلدارىنان وزدىگىنەن قورعانا الادى.
بۇعان دەيىن پۋتيننىڭ جاڭا يادرولىق قارۋ- جاراق تۋرالى ايتقاندا 11 جىل بۇرىنعى كومپيۋتەرلىك روليك كادرلارى پايدانىلعانى دا بەلگىلى بولعان. «سارمات» بالليستيكالىق زىمىرانىنان وقتۇمسىعىنىڭ بولىنگەنى كورسەتىلگەن كادرلار 2007 -جىلى «ءبىرىنشى ارنا» تەلەارناسىندا كورسەتىلگەن «ۋدارنايا سيلا» باعدارلاماسىندا قولدانىلعان.
ب ا ق اقپاراتىنشا، پۋتيننىڭ مالىمدەمەسىنە قاراماستان «سارمات» سىناقتىڭ باستاپقى كەزەڭدەرىنەن ءوتىپ جاتىر.
«ازاتتىق» جاڭالىقتارى