تۇركيانىڭ بروندى ماشينا وندىرەتىن كومپانياسى قازاقستانعا تەحنولوگياسىن ەنگىزۋگە نيەتتى
بۇل تۋرالى «KADEX-2018» V حالىقارالىق كورمەسىندە «وتوكار» كومپانياسىنىڭ باس ديرەكتورى سەردار گەرگيۋچ ءمالىم ەتتى، دەپ حابارلايدى قازاقپارات ءتىلشىسى.
«ەڭ الدىمەن، «KADEX-2018» كورمەسىنە قاتىسىپ وتىرعانىمىزدى قازاقستان تاراپىنىڭ بىزگە كورسەتكەن ۇلكەن قۇرمەتى دەپ بىلەمىز. «وتوكار» - بروندى ماشينالاردى ءوندىرۋشى بولىپ تابىلادى. ونىمدەرىنىڭ ءبىرقاتار تۇرلەرى بار. كومپانيا ماشينالارىنىڭ سالماعى - 3-60 تونناعا دەيىن جەتەدى. دوڭگەلەكتەرىنىڭ فورماسى - 4-4, 6-6, 8-8-دىك قالىپتا. وتوكار - «كوچ» حولدينگىنە ەنەتىن جەكە كومپانيا. قازىرگى ۋاقىتتا «وتوكار» ءوندىرىپ جاتقان بروندى ماشينالار 25 ەلدىڭ، اتاپ ايتقاندا افريكانىڭ، امەريكانىڭ، پارسى شىعاناعىنان باستاپ، ازيا ەلدەرىنىڭ اسكەري قۇرىلىمدارىندا بار. ءدال قازىرگى تاڭدا پارسى شىعاناعى ايماعىندا «وتوكار» ءوزىنىڭ جەرگىلىكتى كومپانيالارىن قۇرىپ، 8-8-دىك بروندى ماشينالاردى شىعارۋدا»، - دەيدى كومپانياسى باس ديرەكتورى.
سەردار گەرگيۋچتىڭ ايتۋىنشا، وتوكارلىق بروندى ماشينالار كوپ بولماسا دا، قازاقستانعا جەتكىزىلىپ جاتىر. ناقتىراق ايتقاندا، كومپانيانىڭ «كوبرا-2» تەحنيكاسى قازاقستاننىڭ قارۋلى كۇشتەرىندە 5 جىلدان بەرى قولدانىلىپ كەلەدى. كورمەلەردە عانا ەمەس، شىنايى ەكسترەمالدى جاعدايدا ماشينالارىمىزدىڭ جوعارى دەڭگەيدە قىزمەت ەتىپ جاتقانىن اتاپ وتكىمىز كەلەدى»، - دەيدى ول.
ول سونىمەن قاتار، تۇركيا مەن قازاقستان گەوگرافيالىق تۇرعىدا الىستا جاتقانىمەن، كومپانيا ءۇشىن ءبىزدىڭ ەلدە ءبىرشاما الەۋەت بارىن اتاپ ءوتتى.
«ءبىزدىڭ نەگىزگى ماقسات - تەحنولوگيالاردى بەرۋ ارقىلى قازاقستان اۋماعىندا ماشينالاردىڭ جەرگىلىكتى دەڭگەيدە وندىرىلۋىنە قول جەتكىزۋ. «كوچ» حولدينگى قازاقستان ەكونوميكاسىنا ينۆەستيتسيا سالۋدى كوزدەيدى.
«ءبىزدىڭ «كوبرا-2» تەحنيكاسى الەمدە ۇلكەن سۇرانىسقا يە. تۇتىنۋشىلارىمىز رازى. ءبىزدىڭ ونىمدەرىنىڭ ءوندىرىسى مەن ساتىلىمىمەن شەكتەلمەيمىز. ماشينالارىمىز ءارتۇرلى كليماتتىق جاعدايدا الەمنىڭ تۇكپىر- تۇكپىرىندە قولدانىستا. العاشقى قادام رەتىندە قازاقستان اۋماعىندا دوڭگەلەكتەرىنىڭ قالپى 8-8-دىك بروندى ماشينالاردى ءوندىرۋدى جوسپارلاپ وتىرمىز. قازىرگى ۋاقىتتا قازاقستان باسشىلىعىنداعى جاۋاپتى وكىلدەرمەن كەلىسسوزدەر جۇرگىزىلۋدە. قازاقستاندا جوعارى بىلىكتى ينجەنەرلەر جەتكىلىكتى»، - دەيدى سەردار گەرگيۋچ.
ەسكە سالا كەتسەك، استانادا بۇگىن ەلباسى نۇرسۇلتان نازاربايەۆتىڭ قاتىسۋىمەن «KADEX-2018» V حالىقارالىق كورمەسى اشىلدى. V حالىقارالىق «KADEX-2018» قارۋ- جاراق جانە اسكەري- تەحنيكالىق مۇلىك كورمەسى 26 - مامىرعا دەيىن جالعاسادى. كورمەگە رەسەي، بەلارۋس، قىرعىزستان، ارمەنيا، تۇركيا، يوردانيا، ازەربايجان، يزرايل، يتاليا سىندى 40-تان استام ەلدەردىڭ وكىلدەرى قاتىسادى. بەلارۋس، بەلگيا، بولگاريا، برازيليا، گەرمانيا، يزرايل، ءۇندىستان، يسپانيا، يتاليا، ق ح ر، نيدەرلاندى، ر ف، ا ق ش، سەربيا سياقتى الەمنىڭ 28 ەلىنىڭ 318 كاسىپورنى ءوز ونىمدەرىن ۇسىنادى.
اۆتور: ايان بەكەن ۇلى