مينيستر اتىراۋ ليفت شاحتاسىنداعى قايعىلى وقيعاعا پىكىر ءبىلدىردى

استانا. قازاقپارات - ق ر ينۆەستيتسيالار جانە دامۋ ءمينيسترى جەڭىس قاسىمبەك اتىراۋدا ليفت شاحتاسىندا جاسوسپىرىمدەردىڭ قازا تابۋ وقيعاسىنا قاتىستى پىكىر ءبىلدىردى، دەپ حابارلايدى قازاقپارات.

«ول جەردە 14 جانە 15 جاستاعى ەكى جاس ءوسپىرىم بولدى. بۇل ليفت تۇرعىن ۇيدە جابىق تۇرعان. ءبىزدىڭ مينيسترلىككە قاراستى كوميتەت وندىرىستەگى ليفتىلەردىڭ تەتىكتەرىنە جاۋاپتى. ال تۇرعىن ۇيلەرگە قاتىستىلار وبلىس اكىمدىكتەرىنىڭ جاۋاپكەرشىلىگىندە. دەگەنمەن دە بولعان وقيعاعا بايلانىستى اتىراۋ وبلىسى اكىمدىگىمەن بۇل ماسەلەنى قاراستىرىپ جاتىرمىز. ليفتى جابىق تۇرعان، بالالار قانداي سەبەپتەرمەن ليفتىگە كىرگەندىگى تەكسەرىلۋدە. قازىرگى كەزدە اكىمدىك بولەك كوميسسيا قۇردى، ءبىز ءوز تاراپىمىزدان قولداۋ شارالارىن جاساپ جاتىرمىز»، - دەپ اتاپ ءوتتى مينيستر پارلامەنتتە تىلشىلەردىڭ ساۋالىنا جاۋاپ بەرە وتىرىپ.

وسى ورايدا، ج. قاسىمبەك كوميسسيا اتالعان قايعىلى وقيعا بويىنشا كىنالىلەردى انىقتايتىنىن اتاپ ءوتتى.

ەستەرىڭىزگە سالا كەتەيىك، قايعىلى جاعداي الماگۇل شاعىن اۋدانىنداعى №19 -ۇيدە 21 -مامىر كۇنى كەشكىسىن بولعان. 14 جاستاعى ەكى جاس ءوسپىرىم 15-قاباتتا جۇمىس ىستەمەي تۇرعان جۇك تاسيتىن ليفتىنىڭ ەسىگىنە كىرگەن. سول ساتتە ەكەۋى دە شاحتاعا قۇلاپ كەتكەن. ولاردىڭ ءبىرى وقيعا ورنىندا كوز جۇمدى. ەكىنشىسى اۋرۋحاناعا جەتكىزىلىپ، ول جانساقتاۋ بولىمىندە كوز جۇمدى.

قايعىلى وقيعا بولعان ۇيدەگى جۇك ليفتىسىنە 2012 -جىلى دەمونتاج جاسالعان، ەسىكتەرى دانەكەرلەنگەن. اتىراۋدا ليفت شاحتاسىندا جاسوسپىرىمدەردىڭ قازا تابۋ وقيعاسىن تەرگەۋ باستالدى.