الەمدەگى بۇگىنگى احۋال بارلىق ەلدەردى قورعانىس قابىلەتىن نىعايتۋعا ماجبۇرلەۋدە - ق ر پرەزيدەنتى
بۇل تۋرالى بۇگىن V حالىقارالىق «KADEX-2018» قارۋ-جاراق جانە اسكەري-تەحنيكالىق مۇلىك كورمەسىنىڭ اشىلۋ سالتاناتىندا ەلباسى نۇرسۇلتان نازاربايەۆ ايتتى، دەپ حابارلايدى قازاقپارات ءتىلشىسى.
«وزدەرىڭىز دە بىلەتىندەي، ءبىزدىڭ ەلىمىز تاياۋ جانە الىس ەلدەرمەن تاتۋ كورشىلىكتى نىعايتۋعا باعىتتالعان بەيبىت سۇيگىشتىك ساياسات جۇرگىزىپ كەلەدى. دەگەنمەن، الەمدەگى بۇگىنگى جاعداي بارلىق ەلدەردى قورعانىس قابىلەتىن نىعايتۋعا ماجبۇرلەپ وتىر. ءبىز دە ۇ ق ش ۇ اياسىندا ءدال وسىنى جاساۋعا ۇمتىلامىز»، - دەدى نۇرسۇلتان نازاربايەۆ.
مەملەكەت باسشىسىنىڭ اتاپ وتۋىنشە، قارۋلى كۇشتەردىڭ قورعانىس سالاسىن دامىتۋ مەملەكەت باسىمدىعىنىڭ ءبىرى سانالادى. بۇل رەتتە، ورتالىق ازيا وڭىرىندەگى جالعىز سانالاتىن KADEX حالىقارالىق كورمەسى قورعانىس سالاسىن جۇزەگە اسىرۋدا نەگىزگى رولگە يە بولىپ وتىر.
«وسى جىلداردىڭ ىشىندە ول اۋقىمدى وقيعانىڭ، قورعانىس الەۋەتىن نىعايتۋ مەن ەلدەر اراسىنداعى اسكەري- ونەركاسىپتىك ىنتىماقتاستىقتى دامىتۋدىڭ ءتيىمدى الاڭدارىنىڭ بىرىنە اينالدى. جاڭا تەحنولوگيالىق ءداۋىر قاۋىپسىزدىكتى قامتاماسىز ەتۋدە دە، ەكونوميكانى ودان ءارى جاڭعىرتۋدا دا اتالعان سالانىڭ ايرىقشا ماڭىزدىلىعىن ايقىندايدى»، - دەدى ەلباسى.
وسى رەتتە، قازاقستان پرەزيدەنتى «KADEX-2018» قارۋ-جاراق جانە اسكەري- تەحنيكالىق مۇلىك كورمەسى العاش رەت قر قورعانىس جانە اەروعارىش ونەركاسىبى مينيسترلىگىنىڭ قامقورلىعىمەن ءوتىپ جاتقانىن ەسكە سالدى.
«باعدارلاما ءوزىنىڭ فورماتى مەن مازمۇنى جاعىنان بارىنشا تولىققاندى جانە ءبىز بايقاپ وتىرعان جاھاندىق گەوساياسي تۇراقتىلىقتىڭ ءورشۋى جاعدايىندا بارىنشا وزەكتى»، - دەدى نۇرسۇلتان نازاربايەۆ.
ايتا كەتەيىك، ەلوردانىڭ حالىقارالىق اۋەجايىنىڭ اسكەري سەكتورى اۋماعىندا V حالىقارالىق «KADEX-2018» قارۋ- جاراق جانە اسكەري- تەحنيكالىق مۇلىك كورمەسى ءوز جۇمىسىن باستادى.
اشىلۋ راسىمىندە قازاقستان پرەزيدەنتى KADEX كورمەسىنىڭ باستى ەرەكشەلىگىن اتادى.
شارا بارىسىندا وتاندىق 17 كاسىپورىن اسكەري تەحنيكانىڭ 57 بىرلىگى مەن اسكەري ازاماتتىق ماقساتتاعى 162 بۇيىمنىڭ تۇساۋكەسەرىن وتكىزبەك.