استاناداعى قۇيىندى داۋىلدىڭ نەلىكتەن الدىن الا بولجانباعانى بەلگىلى بولدى

استانا. قازاقپارات - سينوپتيكتەر كەشە استانادا بولعان قۇيىندى داۋىلعا نەلىكتەن الدىن الا بولجام جاسالماعانىنا تۇسىنىك بەردى، دەپ حابارلايدى قازاقپارات.

قازگيدرومەتتىڭ 21 -مامىرداعى اۋا رايى بولجامىنا سايكەس (مۇمكىندىك %90)، اقمولا وبلىسىندا، سونىڭ ىشىندە استانا قالاسىندا كۇندىز جاڭبىر، كەي جەرلەردە بۇرشاق، نايزاعاي بولادى، جەل سولتۇستىك- باتىستان 9-14م/س، كەي جەرلەردە 15-20 م/س جىلدامدىقپەن سوعىپ، تۇندە اۋا تەمپەراتۋراسى 10-15، كۇندىز 16-24 گرادۋس بولادى دەپ بولجانعان.

22 -مامىر كۇنى استانا قالاسىندا جەلدىڭ جىلدامدىعى سەكۋندىنا 21 مەترگە جەتتى، اقمولا وبلىسىندا 4-13 م/س، كەي جەرلەردە 15-22 م/س بولدى.

«استانا» مەتەوستانساسىندا جەرگىلىكتى ۋاقىت بويىنشا 13:15-تەن 13:20-عا دەيىن باقىلانعان داۋىلدى جەل، بۇرشاق جانە نوسەر جەرگىلىكتى سيپاتتا بولدى. جەلدىڭ جىلى جانە سۋىق اۋا ماسسالارىنىڭ ءبىر-بىرىمەن سوقتىعۋ سەبەبىنەن كۇشەيىپ، اۋا تەمپەراتۋراسىن 30 مينۋت ىشىندە 25 تەن 16 گرادۋسقا دەيىن كۇرت تومەندەتتى.

جەرگىلىكتى قۇبىلىستار قىسقا مەرزىمدە جانە كۇتپەگەن جەردە اۋماقتىڭ شەكتەۋلى كولەمىندە كۇرت پايدا بولادى. قازگيدرومەتتىڭ قازىرگى تەحنيكالىق جابدىقتالۋى ولاردى بولجاۋدا قيىندىق تۋىنداتتى.

2018-2022 -جىلدارى قازگيدرومەتتى جاڭعىرتۋ اياسىندا زاماناۋي مەتەورولوگيالىق رادارلار ساتىپ الىپ، ورناتۋ كوزدەلگەن. ولار وسىعان ۇقساس جەرگىلىكتى قۇبىلىستاردىڭ پايدا بولۋىن 3-6 ساعات بۇرىن بولجاۋعا جانە حاباردار ەتۋگە مۇمكىن بەرەدى. قازاەروناۆيگاتسيامەن بىرلەسە وتىرىپ، قازاقستاننىڭ بارلىق اۋماعىن 25 راداردان تۇراتىن رادار جەلىسىمەن قامتۋ كوزدەلىپ وتىر.