ەلباسى بيىلعى حالىقارالىق اسكەري-تەحنيكالىق كورمەنىڭ باستى ەرەكشەلىگىن اتادى
بۇل تۋرالى بۇگىن V حالىقارالىق «KADEX-2018» قارۋ-جاراق جانە اسكەري-تەحنيكالىق مۇلىك كورمەسىنىڭ اشىلۋ سالتاناتىندا ەلباسى نۇرسۇلتان نازاربايەۆ ايتتى، دەپ حابارلايدى قازاقپارات ءتىلشىسى.
«حالىقارالىق «KADEX-2018» قارۋ-جاراق جانە اسكەري- تەحنيكالىق مۇلىك كورمەسىنىڭ اشىلۋى قۇتتى بولسىن! بەسىنشى رەت وتكىزىلىپ وتىرعان ايتۋلى شارا بيىلعى جىلى استانانىڭ 20 جىلدىعىمەن تۋرا كەلىپ وتىر. «قازاقستانداعى عارىش كۇندەرى» اتتى فورۋمنىڭ ۇيىمداستىرىلۋى - بيىلعى كورمەنىڭ باستى ەرەكشەلىگى بولىپ تابىلادى. مۇندا الەمدىك عارىش سالاسىنىڭ جەتىستىكتەرىنە ارنالعان ارنايى پاۆيلون اشىلدى»، - دەدى ەلباسى.
قازاقستان پرەزيدەنتى بۇگىندە KADEX قارۋ-جاراق جانە اقپاراتتىق قاۋىپسىزدىك سالاسىنداعى الەمدىك ماڭىزى شاراعا اينالعانىن، وندا الەمنىڭ 28 ەلىنەن كەلگەن 318 كاسىپورىن ءوز ونىمدەرىن ۇسىنىپ وتىرعانىن باسا ايتتى.
«كورمە قوناقتارى قورعانىس- ونەركاسىپ كەشەنىنىڭ، عارىش سالاسىنىڭ سوڭعى جەتىستىكتەرىمەن تانىساتىن بولادى. بۇل رەتتە ەلەكتروندى- جۇيەلى بايلانىس، قارۋ-جاراقتى باسقارۋ ىسىنە باسا ءمان بەرىلگەن. اقپاراتتىق قاۋىپسىزدىك سالاسىن جەتىلدىرۋدىڭ تىڭ جولدارىن زەرتتەۋ ماسەلەسىندە دە نازار اۋدارىلدى. كورمە قازاقستاننىڭ قورعانىس ونەركاسىبىنىڭ الەۋەتىن ارتتىرىپ، ونى جاڭا دەڭگەيگە كوتەرۋگە سەپتىگىن تيگىزەدى دەپ سەنەمىز»، - دەدى نۇرسۇلتان نازاربايەۆ.
مەملەكەت باسشىسى وسى شاراعا قاتىسۋشىلار اراسىنداعى ءوزارا ءتيىمدى كەلىسىمشارتتار جاسالۋىنا تىلەكتەس ەكەندىگىن دە اتاپ ءوتتى.
«كورمەگە قاتىسۋشىلار مەن ۇيىمداستىرۋشىلار جۇمىسىنا زور تابىس تىلەيمىن. ەل ءۇشىن پايدالى، ارىپتەستەر ءۇشىن ءتيىمدى شارانىڭ جوعارى دەڭگەيدە وتەتىندىگىنە سەنەمىن. قازاقستاندىق تاراپ دايىندىق ءۇشىن قولىنان كەلگەن شارانىڭ بارلىعىن جاسادى»، - دەپ اتاپ ءوتتى ق ر پرەزيدەنتى.
ايتا كەتەيىك، ەلوردانىڭ حالىقارالىق اۋەجايىنىڭ اسكەري سەكتورى اۋماعىندا V حالىقارالىق «KADEX-2018» قارۋ- جاراق جانە اسكەري- تەحنيكالىق مۇلىك كورمەسى ءوز جۇمىسىن باستادى.
شارا بارىسىندا 17 وتاندىق كاسىپورىن 57 اسكەري تەحنيكا مەن 162 اسكەري-ازاماتتىق ماقساتتاعى بۇيىمنىڭ تۇساۋكەسەرىن وتكىزبەك.