قىزىلوردانىڭ ءبىرقاتار مەكتەپتەرىندە قوڭىراۋ ورنىنا «اققۋ» كۇيى ويناتىلادى

قىزىلوردا. قازاقپارات - قىزىلوردا قالاسىنىڭ ءبىرقاتار مەكتەپتەرىندە ۇزىلىسكە شىعاردا قوڭىراۋ ورنىنا قازاق كۇيى ويناتىلاتىن بولدى، دەپ حابارلايدى قازاقپارات ءتىلشىسى.

بۇل جاعىمدى جاڭالىق بۇرىننان بەرى ايتىلىپ جۇرگەن ەدى. ەندىگى كەزەكتە سول يگى ءىستىڭ ءساتى ءتۇسىپ وتىر. ءقازىر وبلىس ورتالىعىنداعى №1، 136، 264 ورتا مەكتەپتەردە جاس ورەندەر قوڭىراۋ ورنىنا قازاق كۇيىن ەستيدى.

«بۇل ەلباسىنىڭ «رۋحاني جاڭعىرۋ: بولاشاققا باعدار» باعدارلامالىق ماقالاسى نەگىزىندە قولعا الىنىپ وتىر. وسىلايشا ۇلتتىق قۇندىلىقتاردى دارىپتەپ، وقۋشىلاردىڭ حالىق ونەرىنىڭ تەرەڭ دە ءنارلى قاسيەتتەرىن بويلارىنا سىڭىرۋگە جول اشىلادى»، دەيدى قىزىلوردا قالالىق ءبىلىم ءبولىمىنىڭ باسپا ءسوز مامانى باقىت بەكتىباي قىزى.

كۇندەلىكتى ءۇزىلىس كەزىندەگى قوڭىراۋدى كۇيمەن الماستىرۋ جونىندە ۇسىنىس اتالمىش مەكتەپتەردىڭ ۇجىمى، اتا-انالار كوميتەتىنىڭ مۇشەلەرى جانە قامقورشىلىق كەڭەسى كەلىسىمىمەن جۇزەگە اسىرىلدى.

«جالپى، جاس ورەندەردىڭ بويىندا پاتريوتتىقتى، ەلجاندىلىقتى، وتانسۇيگىشتىكتى دارىپتەۋ ماقساتىندا كوپتگەن ىستەردى قولعا الىپ كەلەمىز. ءبىزدىڭ مەكتەپ وقۋشىلارى اراسىندا ۇلتتىق اسپاپتار وركەسترى قۇرىلدى. وسىنداي وزگە دە ىزگى ىستەرگە كوڭىل ءبولىپ ءجۇرمىز» دەيدى №1 ق. مۇحامەدجانوۆ اتىنداعى مەكتەپ- گيمنازيا ديرەكتورى دانابەك ءابدىرايىموۆ.

قوڭىراۋ ورنىنا قازاقتىڭ «اققۋ» كۇيى تاڭدالىپ الىندى. بولاشاقتا بارلىق مەكتەپتەردە قوڭىراۋ ساتىندە قازاق كۇيلەرى ويناتىلادى دەپ جوسپارلانىپ وتىر.

 

ءادىلجان ۇمبەت