شىلدەدە «حابار» ارناسىنان «عاشىقتار» تەلەحيكاياسى كورەرمەنگە جول تارتادى

استانا. قازاقپارات - «حابار» تەلەارناسىندا جاڭا تەلەحيكايا. شىلدە ايىندا ءىلياس ەسەنبەرلين رومانىنىڭ جەلىسى بويىنشا تۇسىرىلگەن «عاشىقتار» تەلەسەريالى كوپشىلىك نازارىنا ۇسىنىلادى.

ول استانانىڭ 20 جىلدىعى مەن روماننىڭ جارىققا شىققانىنا 50 جىل تولۋىمەن ورايلاستىرىلىپ وتىر.

 ءدال قازىر تەلتۋىندىنىڭ سوڭعى ءتۇسىرىلىم جۇمىستارى ءجۇرىپ جاتىر. ءىلياس ەسەنبەرليننىڭ «عاشىقتار» رومانىندا جاستاردىڭ جالىندى دا ادال ماحابباتى، مورالدىق پەن ادامگەرشىلىك سىندى قۇندىلىقتارى سيپاتتالعان. كارتينانىڭ رەجيسسەرى سامات ءشارىپوۆ وسى قاسيەتتەردى ساقتاي وتىرىپ شىعارماعا بۇگىنگى زامان رەڭىن بەرۋگە تىرىسىپتى. ول جاڭارتىلعان سيۋجەت جەلىسىن ەكرانعا شىققانشا قۇپيادا ساقتاۋدى ءجون كورىپ وتىر.

 گۇلبارشىن ءابۋوۆا، «عاشىقتار» تەلەسەريالىنىڭ ەكىنشى رەجيسسەرى:

- جۇگى اۋىر. رومانعا نەگىزدەلگەننەن كەيىن جۇگى اۋىر بولىپ تۇر. كورەرمەندەرگە ايتارىم كينونى كورىڭىزدەر. ءبىز ماحابباتتى كورسەتەمىز. ماحاببات ءارتۇرلى عوي. شىنايى ماحاببات بولۋى مۇمكىن، ول قۇمارلىق تا بولۋى مۇمكىن. ەكى ماسەلە كوتەرىلەدى. جەڭىل- جەلپى سەريال ەمەس.

 باستى رولدەگى جانتاستى ازات تۇراربەكوۆ، اياۋجاندى گۇلميرا حاسانوۆا، شەرۋبايدى ازات سەيتمەتوۆ سىندى اكتەرلار سومدايدى. وقيعا استانا مەن الماتى قالالارى جانە دە بۋراباي دەمالىس ورنىندا ءوربيدى. قازىر استانادا نەگىزگى كەيىپكەر بازارگۇل مەن ونىڭ عاشىعى ءابىلقاستىڭ كەزدەسۋ ساتتەرىنىڭ ءبىرى ءتۇسىرىلىپ جاتىر.

ەربول ىدىرىسوۆ، اكتەر:

- مەنىڭ سومداپ جاتقان ءرولىم ءابىلقاس دەگەن كەيىپكەردىڭ ءرولى. مەنىڭ كەيىپكەرىم كوبىنىڭ ايتۋى بويىنشا جاعىمسىز. ءبىراق مەن روماندا وندايدى كورىپ تۇرعان جوقپىن. ءوزىنىڭ كورسەتەتىن جاقسى قىرلارى بولادى.

تەلەحيكايا 12 سەريادان تۇرادى. ونىڭ ءتۇسىرىلۋى مەن مونتاجدالۋىنا 30-عا جۋىق مامان جۇمىلدىرىلعان. ۇجىم جاستىق پەن البىرتتىق سەزىمدەرىنە تولى، ادامگەرشىلىكتىڭ بيىك شىڭى سۋرەتتەلگەن شىعارمانى قالاي بەرە العانىن كوپ ۇزاماي تاماشالايتىن بولامىز.

www.24.kz