ۇلتتىق بانك دەپوزيتتەن مەرزىمىنەن بۇرىن اقشا الۋدى شەكتەمەك
ەكىنشى دەڭگەيلى بانك ماسەلەلەرىنىڭ ساراپتاماسىنا ساي، بانك ءۇشىن نەگىزگى قور بوپ سانالاتىن تۇلعالاردىڭ دەپوزيت رەتىندەگى قارجىسى تۇراقسىز ەكەنى ايتىلدى. ياعني ادامدار ءبىر مەزەتتە سالىمدارىن قايتارىپ الاتىن بولسا، وندا بانك ۇلكەن ماسەلەلەرگە تاپ بولادى.
ۇلتتىق بانكتەگىلەر بۇل ءتۇيتكىلدىڭ بىردەن- ءبىر شەشىمى مەرزىمىنەن بۇرىن اقشا الۋ مۇمكىندىگىن وزگەرتۋ دەپ بىلەدى. سوندىقتان سالىمشىلاردىڭ ءوز اقشالارىن دەپوزيت كەلىسىمشارتىندا كورسەتىلگەن مەرزىمنەن بۇرىن الماۋىن جولعا قويۋ كەرەك.
«ازاماتتىق كودەكستە سالىمدى كەز كەلگەن ۋاقىتتا الۋ قۇقىعى بەكىتىلگەن. سالىمدى ەرتە قايتارىپ الۋ قۇقىعى كەلىسىمشارتتاعىداي ورىندالادى. مۇنداي جاعدايدا ازاماتتىق كودەكسكە سايكەس بانك 5 كۇننىڭ ىشىندە سالىمشىعا اقشاسىن قايتارۋى ءتيىس. ءبىز بۇل ازاماتتاردىڭ قۇقىعىن تۇبەگەيلى جويماق ەمەسپىز. بانكتەر تەز ارادا اقشاسىن قايتارىپ الماق بولعاندارعا ايىپپۇل سالا الادى. بۇگىندە كەيبىر بانكتەر بۇعان كىرىسىپ تە كەتكەن. ءبىراق قازىرگى ايىپپۇل مولشەرىنىڭ دەپوزيت نارىعىن قالىپقا كەلتىرە الاتىنداي كۇشى جوق»، - دەدى ۇلتتىق بانكتەگى قارجى تۇراقتىلىعى دەپارتامەنتى اناليزدەر باسقارماسى باسشىسىنىڭ ورىنباسارى دينارا تازەتدينوۆا.
ونىڭ سوزىنشە، ۇلتتىق بانك سالىمشىلارعا اقشالارىن دەپوزيتتىڭ سوڭعى مەرزىمىنە دەيىن ساقتاعاندا ۇتىمدى بولاتىن تاڭداۋدى ۇسىنباق.
«ەكىنشى دەڭگەيلى بانكتەر ەكى ءتۇرلى ءونىم ۇسىناتىن بولدى. ولار - كوميسسياسىز، ايىپپۇلسىز جەدەل تۇردە اقشانى قايتارىپ الۋ قاراستىرىلعان جانە قاراستىرىلماعان تۇرلەرى. ايىپپۇل مەن كوميسسياسىز مەرزىمىنەن بۇرىن قايتارىلاتىن دەپوزيتتەردىڭ سايكەسىنشە ستاۆكاسى تومەن بولادى»، - دەدى دينارا تازەتدينوۆا
سونداي- اق، ۇلتتىق بانكتە بۇگىندە ەكىنشى دەڭگەيلى بانكتەردىڭ دەپوزيت دەڭگەيىنە تاۋەلدىلىگىن جويۋ مۇمكىن ەمەستىگى ايتىلدى.
ارايلىم جولداسباي