سامال ەسلياموۆا: «ايكا» فيلىمى ءۇشىن ۇيالمايسىزدار
«مەن - قازاق قىزىمىن. ءوزىم دە اشىق- شاشىق كينولاردى جاقتىرمايمىن. سەبەبى ءبىزدىڭ بويىمىزدا ار- ۇيات دەگەن سەزىم بار. ەندى، كينودا كەيىپكەردىڭ وبرازىن شىنايى ويناعاندا كەرەك كادرلار بولادى. ونى دا ءتۇسىنۋ كەرەك. دەگەنمەن، شەكتەن شىقپاۋ قاجەت. ءارتىس وسىنى جاقسى ءتۇسىنۋى كەرەك دەپ ويلايمىن. بۇل فيلمدە ونداي كادرلار جوق. سوندىقتان «ايكا» ءۇشىن ۇيالمايسىزدار»، - دەدى س. ەسلياموۆا جۋرناليستەرگە بەرگەن سۇحباتىندا.
ءارتىستىڭ ايتۋىنشا، فيلمنىڭ ەڭ سوڭعى ەپيزودى ونى قاتتى تەبىرەنتتى. ول جەردە بالاسىن تاستاپ كەتكەن انا ءوز قاتەلىگىن تۇسىنەدى. «فيلمدە مەنىڭ كەيىپكەرىم ءوز بالاسىن تاستاپ كەتەدى. ءبىراق ارتىنان ىزدەپ بارادى دا، وزىمەن بىرگە الىپ كەتەدى. بۇل ەپيزود مەنى قاتتى تەبىرەنتتى. ەندى، ءوزىم ءالى تۇرمىسقا شىققان جوقپىن. بالالارىم دا جوق. قۇداي قالاسا، بولادى دەگەن ءۇمىتىم بار. ءبىراق كەز كەلگەن ادام ءۇشىن انانىڭ ورنى بولەك قوي. انا مەن بالا اراسىنداعى قاتىناس قاشاندا ىستىق ءارى جۇرەككە جاقىن. سوندىقتان سوڭعى ەپيزود مەنى قاتتى تولعاندىردى»، - دەپ اتاپ كورسەتتى س. ەسلياموۆا.
فيلم رەجيسسەرى سەرگەي دۆورتسيەۆويدىڭ ايتۋىنشا، فيلمدە بالانى ەمىزگەندە دۋبلەردىڭ كومەگىنە جۇگىنۋگە تۋرا كەلدى. سەبەبى بالانى كادىمگىدەي ەمىزۋ كەرەك ەدى. قالعانىن سامالدىڭ ءوزى ويناپ شىقتى. كانن فەستيۆالىندە شيكى ماتەريال كورسەتىلسە دە، ءادىلقازىلار العاشقى 40 مينۋتتى كورگەننەن كەيىن بىردەن بايقاۋعا قاتىسۋعا رۇقسات بەردى.
«فەستيۆال ديرەكتورى ەكى كۇننىڭ ىشىندە جيناپ بەرسەڭ، قابىلدايمىز دەدى. ءبىز ىلە- شالا فيلمدى جيناۋعا كىرىستىك. ءسويتىپ، ەكى كۇننىڭ ىشىندە دايىنداپ شىقتىق. جارتىلاي دايىن ماتەريال بولسا، سامالدىڭ ارتىستىك شەبەرلىگى ءادىلقازىلاردى بەي- جاي قالدىرمادى. ءالى ەسىمدە، زالدان شىققاننان كەيىن ءبىر ايەل كەلىپ، سامالدى قاتتى قۇشاقتاپ، ءبىراز تۇردى. سويتسە، ءادىلقازىلار القاسىنىڭ ءتورايىمى كەيت بلانشەت ەكەن. ونىڭ ۇندەمەي كەلىپ، سامالدى قاتتى قۇشاقتاعانىنان فيلمنىڭ ۇناعانىن تۇسىندىك. «ايكا» ءبىر- ءبىر جارىم ايدا تولىعىمەن دايىن بولادى. ال كۇزدە پروكاتقا شىعادى»، - دەپ اتاپ كورسەتتى س. دۆورتسيەۆوي.
ايتا كەتەيىك، قازاقستاندىق اكتريسا سامال ەسلياموۆا 71- كانن كينوفەستيۆالىندە «ۇزدىك ايەل ءرولى» اتالىمىندا جەڭىمپاز اتانعان بولاتىن. اتالعان ماراپاتتى ول رەسەيلىك رەجيسسەر سەرگەي دۆورتسيەۆويدىڭ «ايكا» اتتى كارتيناسىنداعى ءرولى ءۇشىن الدى. فيلمدە ماسكەۋگە جۇمىسقا بارعان قىرعىز قىزىنىڭ تاعدىرى جايىندا باياندالادى. بۇگىن سامال ەسلياموۆا استاناعا ۇشىپ كەلدى. اۋەجايدا اكتريسانى قازاق جاستارى مۇقاعالي ماقاتايەۆتىڭ «قازاقستان» اتتى ولەڭىنە جازىلعان انمەن قارسى الدى. «سەن مەنىڭ سۇيەگىم مەن قانىمداسىڭ، جانىمداسىڭ، ۇياتىم، ارىمداسىڭ»، دەپ ءان سالعان جاستاردىڭ كەيبىرى ۇلتتىق ناقىشتاعى كيىم كيىپ كەلگەن.
اۆتور: ارمان اسقاروۆ