ادامزات ءۇشىن اسا قاۋىپتى ءارى ەمى جوق ينفەكتسيا تىركەلدى
اتالعان ۆيرۋس مي قابىنۋىنا، تىنىس جولدارىنىڭ اۋرۋلارىنا الىپ كەلەدى. ءوز كەزەگىندە دۇنيەجۇزىلىك دەنساۋلىق ساقتاۋ ۇيىمى بۇل ۆيرۋستى جاھاندىق ىندەت تۋعىزاتىن ينفەكتسيالار قاتارىنا قوستى.
بۇل تۋرالى Science Alert باسىلىمىنا سىلتەمە جاساپ Stan.kz حابارلايدى.
نيپاح ۆيرۋسى 1999 -جىلى مالايزيادا اۋرۋ تاراعان كەزدە انىقتالعان.
اۋرۋدى جارقانات تۇقىمداستار تاسىمالدايدى. بۇل ينفەكتسيا اۆستراليا، بانگلادەش، ءۇندىستان، قىتاي، تايلاند جانە افريكادا كەزەدەسەدى. اتالعان ينفەكتسيا جارقانات تۇقىمداستاردان باسقا دا جانۋارلارعا جۇعۋى مۇمكىن. سونىمەن قاتار سىلەكەي ارقىلى ادامنان ادامعا جۇعادى ەكەن.
قازىرگى ۋاقىتتا اتالعان يفنەكتسياعا قارسى ءدارى- دارمەك پەن ەكپە جوق. بۇل ۆيرۋستى جۇقتىرعان 40 پايىزدان 75 پايىزعا دەيىن ادامدار قايتىس بولعان.
قازىرگى ۋاقىتتا اتالعان دەرت ءۇندىستاننىڭ كەرالا شتاتىنداعى كوجيكود قالاسىندا تاراعان. تالداۋ ناتيجەلەرى قايتىس بولعان 9 ادامنىڭ ۇشەۋى نيپاح ۆيرۋسىن جۇقتىرعانىن راستادى. سونىمەن قاتار اۋرۋحاناعا تۇسكەن تاعى 25 ادام اتالعان ۆيرۋستى جۇقتىرعان بولۋى ىقتيمال.
اتالعان ۆيرۋسقا شالدىققان ادامدا اۋرۋ بەلگىلەرى بولماۋى مۇمكىن. الايدا كوپ جاعدايدا مي قابىنۋىنا اسقىنادى ەكەن. سونداي- اق ناۋقاستار بۇلشىق ەتتەرىنىڭ السىزدىگىنە، تاماق اۋرۋىنا، دەنە قىزۋىنىڭ جوعارىلاۋىنا شاعىمدانادى. مۇنان كەيىن ورتالىق نەرۆ جۇيەسىنىڭ زاقىمدالۋىنىڭ بەلگىلەرى بايقالىپ، ادام كوماعا ءتۇسۋى مۇمكىن. كەي جاعدايدا وكپە دە زاقىمدالىپ، ادامدا تىنىس جەتكىلىكسىزدىگى بايقالۋى ىقتيمال.
سونىمەن قاتار ادام ينفەكتسيانى ءبىر رەت جۇقتىرىپ، ساۋىققانىمەن، بىرنەشە اي نەمەسە جىل وتكەننەن كەيىن نيپاح ۆيرۋسىن قايتا جۇقتىرۋى مۇمكىن.