شىلدەدەن باستاپ زەينەتاقى تولەمدەرىن تاعايىنداۋ جەڭىلدەتىلەدى
ءمادينا ءابىلقاسىموۆانىڭ ايتۋىنشا، اعىمداعى جىلى «سيفرلىق قازاقستان» باعدارلاماسى اياسىندا دەنساۋلىق ساقتاۋ مينيسترلىگى ءبىرقاتار اۋقىمدى جوبانى ىسكە قوسۋدى جوسپارلاپ وتىر. ونىڭ ءبىرى حالىققا كورسەتىلەتىن قىزمەتتەردىڭ ساپاسىن ارتتىرۋعا ارنالعان الەۋمەتتىك ەڭبەك سالاسىنىڭ ءبىرىڭعاي اقپاراتتىق جۇيەسىن جاڭعىرتۋ بولماق. جوبا اياسىندا ازاماتتاردى زەينەتاقىمەن قامسىزداندىرۋ وڭتايلاندىرىلادى.
«ءار ازامات زەينەتكەرلىك جاسقا جەتكەن كەزدە تولەمنىڭ ءتورت ءتۇرىن مەملەكەتتىك بازالىق زەينەتاقى، جاسىنا بايلانىستى ىنتىماقتى زەينەتاقى، جيناقتالعان زەينەتاقى، مەملەكەتتىك كەپىلدىك الۋعا قۇقىلى. وسى تولەمدەردى الۋ ءۇشىن ازامات بۇگىنگى كۇنى بىرنەشە ينستانسياعا جۇگىنەدى. مىسالى، مەملەكەتتىك كورپوراتسياعا ەكى رەت 2 وتىنىشپەن بازالىق جانە ىنتىماقتى زەينەتاقى تاعايىنداۋ ءۇشىن، ءبىر ايدان سوڭ تاعى دا وتىنىشپەن مەملەكەتتىك كەپىلدىك ماسەلەسى بويىنشا بارادى. ب ج ز ق- عا ءبىر وتىنىشپەن زەينەتاقى تولەمدەرىن تاعايىنداۋ ماسەلەسى بويىنشا جۇگىنەدى. اعىمداعى جىلدىڭ شىلدەسىنەن باستاپ وسى ءتارتىپ ايتارلىقتاي جەڭىلدەيدى»، - دەدى ول.
ونىڭ سوزىنە قاراعاندا، ەندىگى ۋاقىتتا زەينەتكەرلىك جاسقا جەتكەن ازاماتتار زەيناتاقى تولەمدەرىن تاعايىنداۋ ءۇشىن ءبىر جەرگە، «ازاماتتارعا ارنالعان ۇكىمەت» مەملەكەتتىك كورپوراتسياسىنا عانا جۇگىنەتىن بولادى. تولەمدەردىڭ ءۇش ءتۇرىن تاعايىنداۋ جونىندەگى قىزمەتتەردىڭ بارلىق سپەكترى بار بولعانى ءبىر ءوتىنىشتىڭ نەگىزىندە كومپوزيتتىك تۇردە كورسەتىلەدى.
«مەملەكەتتىك ورگانداردىڭ اقپاراتتىق جۇيەلەرىندەگى مالىمەتتەر اۆتوماتتى تۇردە پايدالانىلىپ، كوپ قۇجات تالاپ ەتىلمەيدى. ال مەملەكەتتىك كەپىلدىك تولەمى ءوتىنىش بەرمەي جۇرگىزىلەدى. ياعني، تولەم مولشەرى اۆتوماتتى تۇردە ەسەپتەلىنەدى جانە قىزمەت الۋشىنىڭ شوتىنا اۋدارىلادى. تولەمدەردىڭ بارلىق تۇرلەرى ءبىر ۋاقىتتا جانە ءبىر بانك شوتىنا جۇرگىزىلەدى. ال قازىر تولەمدەر ءارتۇرلى كوزدەردەن الىنادى جانە الۋشىنىڭ ءارتۇرلى شوتىنا اۋدارىلادى. بۇل جاڭالىق زەينەتكەرلىك جاسقا جەتكەن ادامداردىڭ شامامەن 70 پايىزىنا قاتىستى بولادى»، - دەدى مينيستر.
اۆتور: مارلان جيەمباي