قازاقستاندىق سپورتشىلار كەلەسى پاراليمپياداعا بارماي قالۋى مۇمكىن - كوليادين

استانا. قازاقپارات - قازاقستان تاريحىنداعى تۇڭعىش پاراليمپيادا جەڭىمپازى الەكساندر كوليادين قارجىلاندىرۋدىڭ بولماۋىنان سپورتشىلار كەلەسى پاراليمپياداعا بارا الماي قالۋى مۇمكىن ەكەندىگىن ايتتى.

بۇل جايلى ول «Qazsport» قوناقتا» اتتى باعدارلامانىڭ تىكەلەي ەفيرىندە ايتتى، دەپ حابارلايدى قازاقپارات «SPORTINFORM» س ا ا- عا سىلتەمە جاساپ.

الەكساندر كولياديننىڭ ايتۋىنشا، رەيتينگتى ۇپايلارعا يە بولىپ، پاراليمپيادالىق ليتسەنزيانى الۋ ءۇشىن پاراليمپياداشىلاردا حالىقارالىق سايىستارعا بارا الاتىنداي مۇمكىندىك جوق.

«كۋبوكتىق ۇپايلارعا يە بولۋ ءۇشىن حالىقارالىق سايىستاردا باق سىناۋ كەرەك. ال ەگەر كۋبوكتىق ۇپايلار الەم چەمپيوناتىنا جول اشاتىن ەسىك دەسەك، سايكەسىنشە ول ارقىلى وليمپياداعا دا ليتسەنزيا بەرىلەدى. ءبىراق، الەم كۋبوگى سەكىلدى حالىقارالىق سايىستارعا شىعاتىن مۇمكىندىگىڭ بولماسا، سەن ءتيىستى ۇپايدى الا المايسىڭ دا، چەمپيوناتقا دا، وليمپياداعا دا بارا المايسىڭ. سىزدەر، نەلىكتەن ەكى جىل ءۇزىلىس بولدى دەپ سۇرادىڭىز؟ ونىڭ ءبارى مەنىڭ قولىمدا ەمەس ەدى، قارجىلاندىرۋدىڭ بولماۋىنان. حالىقارالىق سايىستارعا بارا الماعاندىقتان، ۇلكەن ۇزىلىستەر بولىپ تۇرادى. مىنە، قيىندىق قايدا جاتىر. ءبارى دە قارجىلاندىرۋعا بايلانىستى»، - دەدى «Qazsport-تا قوناقتا» باعدارلاماسىنا بەرگەن سۇحباتىندا الەكساندر كوليادين.

سونىمەن بىرگە، چەمپيون پاراليمپيادالىق قۇرامانىڭ رەزەرۆى تۇرعىسىنان دا ماسەلە بارىن جاسىرمادى. قازىرگى ۋاقىتتا پاراليمپيادالىق مەدالعا يە بولعانداردىڭ ورتاشا جاسى 45-50 دە. ونىڭ ايتۋىنشا، قازاقستاندا جاس پاراليمپياداشىلارعا سپورتتىق كارەرا قۇرۋ ءۇشىن ايتارلىقتاي جاعداي جاسالماعان. سونىمەن قاتار، الەكساندر ەلىمىزدە پاراليمپياداشىلاردى دايىندايتىن باپكەرلەر از ەكەنىن اتاپ ءوتتى.

«جاس جىگىتتەر تاجىريبە الىپ، ولاردى سپورتقا تارتارلىق جاعداي جاسالسا دەيمىز. بىزدە اۋىستىراتىن ادام جوق. ەگەر بەلگىلى ءبىر پاراليمپياداشى جاراقات الىپ قالسا، ونىڭ ورنىنا اپاراتىن كەلەسى سپورتشى جوق. بىرەۋ جارىستان شىعىپ قالادى دا، اقىرى ەستافەتا دا جوق بولىپ شىعادى. ەستافەتا جوق - دەمەك، كوماندا دا جوق. جاس سپورتشىلار بارشىلىق، ءبىراق بىزدە ولار جاتتىعا الاتىنداي ينفراقۇرىلىم بار دەپ ايتا المايمىز. باپكەرلەرىمىز مۇلدە جوق. پاراليمپياداشىلار تۋرالى ايتىپ وتىرمىن. بۇل رەتتە مۇلدە بولەك قۇرىلىم، باسقا ەموتسيونالدىق جانە فيزيكالىق مۇمكىندىكتەر كەرەك. بۇل سپورتتا كەزىندە قايعىدان وتكەن ادامدار جۇرگەندىكتەن، ەرەكشە امال قاجەت»، - دەيدى چەمپيون.

سۇحباتىنىڭ سوڭىندا «پاراليمپيادا-2018» جەڭىمپازى وكىنىشپەن قازاقستاننىڭ پاراليمپيادالىق مەدالداردى باعالاي قويمايتىنىن ايتتى.

«مەملەكەتكە ءوتىنىش ايتار ەدىم. البەتتە، بارلىق قولداۋعا العىسىم شەكسىز، ءبىراق مەدالگە دەگەن قارىم-قاتىناس وزگەشەلەۋ، ياعني وليمپيادالىق جانە پاراليمپيادالىق مەدالدارعا كوزقاراس ەكى ءتۇرلى. ماسەلەن، شەتەلدە پاراليمپيادالىق مەدالدارعا زور قۇرمەتپەن قارايدى. ال بىزدە كەرىسىنشە، وليمپيادالىق مەدالداردى العا قويادى. پاراليمپياداشىلاردان گورى وليمپياداشىلارعا باسا نازار اۋدارادى»، - دەيدى الەكساندر كوليادين.

ەسكە سالا كەتسەك، قازاقستاندىق شاڭعىشى الەكساندر كوليادين پحەنچحانداعى پاراليمپيادادا التىن مەدالدى جەڭىپ العان بولاتىن. 14 -ناۋرىزدا وتكەن شاڭعى جارىسى قازاقستان ءۇشىن جەڭىسپەن اياقتالعان. كلاسسيكالىق ادىسپەن 1,5 شاقىرىمدىق سپرينتەرلىك شاڭعى جارىسىندا جارىسقان سپورتشىلار اراسىندا قازاقستاندىق سپورتشى ىرىكتەۋ كەزەڭىندە دە، جارتىلاي فينالدا دا ۇزدىك بولعان ەدى. الەكساندر كوليادين فينالدا 4 مينۋت 19,7 سەكۋند ناتيجەسىن كورسەتىپ، الدىنا جان سالمادى. كۇمىس مەدال جاپونيالىق يوشيحيرو نيتتانىڭ ەنشىسىندە كەتسە، «قولاعا» كانادا وكىلى مارك ارەندز جانە فينليانديادان ييكك تۋوميستو قول جەتكىزگەن بولاتىن.