مينيستر ۇ ب ت-عا دايىندىق بارىسىندا شەشۋدى قاجەت ەتەتىن ماسەلەلەردى اتادى

استانا. قازاقپارات - وڭىرلەر ۇلتتىق ءبىرىڭعاي تەستىلەۋ وتەتىن پۋنكتتەردى زاماناۋي تەحنيكالارمەن تولىق قامتاماسىز ەتپەگەن.

بۇل تۋرالى بۇگىن ۇكىمەتتىڭ سەلەكتورلىق رەجيمدەگى وتىرىسىندا ءبىلىم جانە عىلىم ءمينيسترى ەرلان ساعاديەۆ ايتتى، دەپ حابارلايدى قازاقپارات ءتىلشىسى.

«سونىمەن قاتار، ۇ ب ت- عا دايىندىق بارىسىندا شەشۋدى قاجەت ەتەتىن ماسەلەلەر دە بار. ءبىرىنشى، مونيتورينگ ناتيجەسى بويىنشا مينيسترلىك تاراپىنان وبلىس اكىمدەرىنە بىرنەشە رەت تەحنيكالىق قۇرالداردى، ونىڭ ىشىندە 4G موبيلدى بايلانىس سيگنالدارىن باسۋ قۇرالدارىن، مەتالل ىزدەگىشتەر، ونلاين ترانسلياتسيالاۋ كامەرالارىن ساتىپ الۋ جانە ۇ ب ت وتكىزۋ پۋنكتەرىن قامتاماسىز ەتۋ تۋرالى حات جولداندى»، - دەدى مينيستر.

ونىڭ ايتۋىنشا، بۇگىنگى مونيتورينگ ناتيجەلەرىنە سايكەس وڭىرلەردىڭ ۇ ب ت پۋنكتتەرى ءالى كۇنگە دەيىن زاماناۋي تەحنيكالىق قۇرالدارمەن تولىق قامتاماسىز ەتىلمەگەن.

«ەكىنشى، جەرگىلىكتى اتقارۋشى ورگانداردان بىتىرۋشىلەردى تاسىمالداۋ، قاجەت جاعدايدا ولاردى تاماقتاندىرۋ مەن ورنالاستىرۋدى قامتاماسىز ەتۋ، سونداي-اق تەستىلەۋ كەزىندە بىتىرۋشىلەر مەن اتا-انالار ءۇشىن ارنايى اۋىز سۋى، كونديسيونەر، مەديتسينالىق- پسيحولوگيالىق كومەك، جالپى قاۋىپسىزدىك ماسەلەلەرىن ۇيىمداستىرۋ بويىنشا مىندەتتەرى ساقتالادى. وسىعان بايلانىستى وبلىس اكىمدەرى ۇ ب ت- نى ۇيىمداستىرۋ جانە وتكىزۋ ماسەلەلەرىنە ارنايى نازار اۋدارۋدى سۇرايمىز»، - دەدى ەرلان ساعاديەۆ.