سامال ەسلياموۆانى جانكۇيەرلەرى اۋەجايدان «قازاقستان» انىمەن كۇتىپ الدى
اۋەجايعا كەلگەن اكتريسانى قازاق جاستارى مۇقاعالي ماقاتايەۆتىڭ «قازاقستان» اتتى ولەڭىنە جازىلعان انمەن قارسى الدى. «سەن مەنىڭ سۇيەگىم مەن قانىمداسىڭ، جانىمداسىڭ، ۇياتىم، ارىمداسىڭ»، دەپ ءان سالعان جاستاردىڭ كەيبىرى ۇلتتىق ناقىشتاعى كيىم كيىپ كەلگەن.
ايتا كەتەيىك، بۇگىن ەلوردادا ق ر مادەنيەت جانە سپورت ءمينيسترى ارىستانبەك مۇحامەدي ۇلى مەن اكتريسا سامال ەسلياموۆانىڭ، رەجيسسەر سەرگەي دۆورسەۆويدىڭ كەزدەسۋى جوسپارلانعان. شاراعا سونىمەن بىرگە، فيلمنىڭ پروديۋسسەرى گۇلنار سارسەنوۆا قاتىسادى.
ەسكە سالساق، قازاقستاندىق اكتريسا سامال ەسلياموۆا 71- كانن كينوفەستيۆالىندە «ۇزدىك ايەل ءرولى» اتالىمىندا جەڭىمپاز اتانعان ەدى. كەيىن مينيستر ارىستانبەك مۇحامەدي ۇلى قازاقستاندىق اكتريسانى فەستيۆالدەگى جەتىستىگىمەن قۇتتىقتادى. سامال ەسلياموۆا رەسەيىك رەجيسسەر سەرگەي دۆورسەۆويدىڭ «ايكا» اتتى كارتيناسىندا باستى ءرولدى سومدادى.
س. ەسلياموۆا 1984 -جىلى 1 -قىركۇيەكتە تۋعان. 2011 -جىلى رەسەيدىڭ تەاتر ونەرى ۋنيۆەرسيتەتىن (گ ي ت ي س) بىتىرگەن. بۇعان دەيىن ول «تيۋلپان» فيلمىندە باستى ءرولدى ويناعان. تۋىندى 2008 -جىلى كانندا «ەرەكشە كوزقاراس» كونكۋرسىنىڭ باس جۇلدەسىن، جاس ءادىلقازىلاردىڭ جۇلدەسىن، فرانسيانىڭ ءبىلىم مينيسترلىگىنىڭ جۇلدەسىن جەڭىپ العان بولاتىن.