كوكتەمگى ەگىستىك جۇمىستارى كەشەۋىلدەپ جاتىر- ق ر اۋىل شارۋاشىلىعى مينيسترلىگى

استانا. قازاقپارات - اۋا رايىنىڭ سالقىن بولۋىنا جانە توپىراقتىڭ كەش قىزۋىنا بايلانىستى كوكتەمگى ەگىستىك جۇمىستارىنىڭ قارقىنى بيىل ءبىرشاما تومەن.

بۇل تۋرالى ۇكىمەتتىڭ سەلەكتورلىق رەجيمدەگى وتىرىسىندا ق ر اۋىل شارۋاشىلىعى ءبىرىنشى ۆيتسە-ءمينيسترى ارمان ەۆنيەۆ ايتتى، دەپ حابارلايدى قازاقپارات ءتىلشىسى.

«اعىمداعى جىلى جالپى ەگىستىك القابى 21,8 ميلليون گەكتاردى قۇراماق. بۇل ءىس جۇزىندە وتكەن جىلعى دەڭگەيدە. ءداندى- داقىلداردى 14,7 ميلليون گەكتارعا، ونىڭ ىشىندە بيدايدى 11,4 ميلليون گەكتارعا سەبۋ جوسپارلاۋدا. بۇل وتكەن جىلعىدان 544 مىڭ گەكتارعا كەم. بۇل رەتتە جەم- ءشوپ داقىلدارى وسىنشا كولەمگە ارتاتىن بولادى. جەمدىك ءداندى-داقىلدار 2,5 ميلليون گەكتارعا سەبىلەدى. بۇل وتكەن جىلعى كولەمنەن 49 مىڭ گەكتارعا ارتىق. مايلى داقىلدار 2,6 ميلليون گەكتاردى قۇرايدى. كارتوپ القابى دا ءوسۋ ديناميكاسىن كورسەتىپ، 210 مىڭ گەكتار بولماق. بۇل وتكەن جىلعى كورسەتكىشتەن 15 پايىزعا كوپ»، - دەدى ول.

ءبىرىنشى ۆيتسە-ءمينيستردىڭ ايتۋىنشا، قازىرگى تاڭدا كوكتەمگى ەگىستىك جۇمىستارى بارلىق جەردە تولىق قارقىنمەن جۇرگىزىلىپ جاتىر. 22 -مامىرعا دەيىنگى دەرەكتەرگە سايكەس، جازدىق ءداندى- داقىلدار جوسپارلانعان القاپتىڭ 36 پايىزىنا، مايلى-داقىلدار 56 پايىزىنا، كوكونىس جانە باقشا داقىلدارى 80 پايىزىنا، كارتوپ 56 پايىزىنا سەبىلدى. قانت قىزىلشاسى مەن ماقتانى سەبۋ جۇمىستارى تولىق اياقتالدى.

«اۋا رايىنىڭ سالقىن بولۋىنا جانە توپىراقتىڭ كەش قىزۋىنا بايلانىستى سەبۋ جۇمىستارىنىڭ قارقىنى وتكەن جىلمەن سالىستىرعاندا ءبىرشاما تومەن بولۋدا. وسىعان بايلانىستى سەبۋ جۇمىستارىن وڭتايلى مەرزىمدە اياقتاۋ ءۇشىن تەحنيكانى جوعارى ونىمدىلىكپەن پايدالانۋدى قامتاماسىز ەتۋ شارالارىن قابىلداۋ قاجەت»، - دەدى ول.

ونىڭ ايتۋىنشا، اعىمداعى جىلى ەگىستىك جۇمىستارىنا 2,5 ميلليون توننا تۇقىم دايىندالدى جانە اگرارييلەر 446 مىڭ توننا تىڭايتقىشقا، ونىڭ ىشىندە كوكتەمگى دالا جۇمىستارى كەزەڭىنە 270 مىڭ تونناعا ءوتىنىم بەردى. وسى ماقساتقا جەرگىلىكتى بيۋدجەتتەن 17 ميلليارد تەڭگە كوزدەلگەن. اعىمداعى جىلى 16 -مامىردا 93 مىڭ توننا تىڭايتقىش نەمەسە ءوتىنىم بەرىلگەن كولەمنىڭ 21 پايىزى اگرارييلەرگە جەتكىزىلدى.

«اعىمداعى جىلى سۋبسيديانى الۋعا ءوتىنىم بەرۋ جانە ولارعا تولەم جاساۋ ەلەكتروندى تۇردە جۇزەگە اسىرىلادى. ياعني، سۋبسيديالاۋ پروتسەسى تولىقتاي اۆتوماتتاندىرىلعان. 16 -مامىرعا سۋبسيديا الۋعا 7,4 ميلليارد تەڭگەگە 11,5 مىڭ ءوتىنىم بەرىلدى. سونىمەن بىرگە، بولىنگەن قاراجات ءوتىنىم بەرىلگەن تىڭايتقىش كولەمىن قامتاماسىز ەتۋگە جەتكىلىكسىز. وسىعان وراي، وبلىس اكىمدىكتەرىنە تىڭايتقىشتاردى سۋبسيديالۋعا ارنالعان بيۋدجەتتىك قاراجات كولەمىن ۇلعايتۋدى ۇسىنامىز»، - دەدى ارمان ەۆنيەۆ.

ۆيتسە- ءمينيستردىڭ دەرەگىنشە، رەسپۋبليكادا 142600 تراكتور، 7700 سەبۋ كەشەنى، 82,5 مىڭ تۇقىم سەپكىش، 297 مىڭ توپىراق وڭدەۋ قۇرالى بار.