الماتىدا باس بوستاندىعى شەكتەلگەن ازاماتتار دا جۇمىسپەن قامتىلىپ جاتىر

الماتى. قازاقپارات - الماتىدا جۇمىسپەن قامتۋ ورتالىعىندا پروباتسيا قىزمەتىنىڭ(زاڭدىق باقىلاۋداعى - رەد.) ەسەبىندە تۇرعاندارمەن كەزدەسۋ ءوتىپ، ولارعا الەۋمەتتىك-قۇقىقتىق قىزمەت كورسەتىلدى، دەپ حابارلايدى قازاقپارات ءتىلشىسى.

ۋاقىتشا باس بوستاندىعى شەكتەلگەن ازاماتتاردى تۇراقتى جانە ۋاقىتشا جۇمىس ورىندارىمەن قامتاماسىز ەتۋ، قىسقا مەرزىمدى وقىتۋ، سونداي-اق كاسىبىن دوڭگەلەتكىسى كەلەتىندەرگە جىلىنا %6 ميكروكرەديت بەرۋ ماسەلەسى قارالۋدا.

قالالىق حالىقتى جۇمىس پەن قامتۋ ورتالىعى ديرەكتورىنىڭ ايتۋىنشا، وتكەن جىلى پروباتسيا قىزمەتىندە ەسەپتە تۇرعان 117 ادام ورتالىق قىزمەتىنە جۇگىنگەن.

«پروباتسيا قىزمەتىندە ەسەپتەر تۇرعاندار بىزگە كەز-كەلگەن ۋاقىتتا حابارلاسىپ، وزدەرىنىڭ وتىنىشتەرىن بىلدىرە الادى. بىلىكتىلىگىن ارتتىرام دەگەندەردى قىسقا مەرزىمدى وقۋعا جىبەرەمىز. بۇل قىزمەت تەگىن كورسەتىلەدى، قوسىمشا ستيپەنديا تاعايىندالادى. وتكەن جىلى ءوتىنىش بىلدىرگەندەردىڭ ىشىنەن 40 ادامعا كومەگىمىز ءتيدى. ونىڭ ىشىندە 11 ادامعا تۇراقتى جۇمىس ورنىن تاۋىپ بەردىك، قوعامدىق جۇمىستار مەن قىسقا مەرزىمدى وقۋعا جىبەرىلگەندەرى بولدى» - دەدى قالالىق حالىقتى جۇمىس پەن قامتۋ ورتالىعى ديرەكتورى مەيرام سۇيىندىكوۆ.

پروباتسيا قىزمەتى بولىمىندە ەسەپتە تۇراتىن ازاماتشاعا (اتى-ءجونىن كورسەتپەۋدى سۇرادى) الەۋمەتتىك - قۇقىقتىق كومەك رەتىندە بىلىكتىلىگىن ارتتىرۋ مۇمكىندىگى بەرىلگەن.

«مەن قازىر شاشتاراز ماماندىعىنا وقىپ جاتىرمىن. پروباتسيا قىزمەتى مەن حالىقتى جۇمىسپەن قامتۋ ورتالىعىنىڭ وسىنداي مۇمكىندىكتى ۇسىنىپ وتىرعانىنا وتە قۋانىشتىمىن. كەز-كەلگەن ادام قاتەلەسۋى مۇمكىن» - دەدى سوتتالۋشى.

جەتىسۋ اۋدانى پروباتسيا قىزمەتىنىڭ اعا ينسپەكتورى جانار انابيەۆا مۇنداي مۇمكىندىك سوتتالۋشىلاردىڭ قوعامعا بەيىمدەلۋىنە كومەكتەسەتىنىن ايتتى.

«بۇگىندە حالىققا قىزمەت كورسەتۋ ورتالىعىمەن جۇمىس جاساپ جاتىرمىز. جاۋاپقا تارتىلعاندىڭ ىشىندە قىسقا مەرزىمدى وقۋدى بىتىرگەن بەرىكبول جاڭابايەۆ مامىر-7 پيك-دە مەتالل دانەكەرلەۋشى بولىپ، چابانوۆ ۆيكتور قۇرىلىس فيرماسىندا جۇمىس ىستەيدى. تاعى ءبىر سوتتالۋشىمىز شاشتاراز ماماندىعىن ۇيرەنىپ جاتىر. كەيىن جۇمىسقا ورنالاستىرۋ جاعى قاراستىرىلادى» - دەدى جەتىسۋ اۋدانى پروباتسيا قىزمەتىنىڭ اعا ينسپەكتورى جانار انابيەۆا.

كەزدەسۋ ناتيجەسى بويىنشا جاۋاپقا تارتىلعانداردىڭ 5 ۋى بىلىكتىلىگىن ارتتىرۋعا جولداما السا، 1 ادام ميكروكرەديت الۋ ءۇشىن قۇجات دايىنداۋعا كىرىسەتىن بولدى. تاعى 5 ۋى قىسقا مەرزىمدى وقۋعا جازىلىپ، كەيىن جۇمىسقا تۇرۋ ءۇشىن ءوتىنىش بەردى.

 

ارايلىم جولداسبايەۆا