وسكەمەن كوشەلەرىندە ۋاي-فاي تاراتاتىن شامدار ىسكە قوسىلادى
بۇل اقىلدى كوشەلىك شامدار قازىردىڭ وزىندە وبلىس ورتالىعىنىڭ نەگىزگى كوشەلەرىندە ورناتىلعان، دەپ حابارلايدى التاينيۋس ءتىلشىسى.
ماسەلەن، قازىر قازاقستان كوشەسىن تۇنگى ۋاقىتتا سامالاداي جارقىراتىپ تۇر. جارىق بەرۋمەن قاتار Wi-Fi تاراتۋ، ۇيالى بايلانىس جەلىسىن كەڭەيتۋ سەكىلدى بىرنەشە فۋنكتسيانى دا قاتار اتقارادى.
ونى ورناتۋمەن اينالىسقان LED Solution كومپانياسىنىڭ وكىلدەرى الداعى ۋاقىتتا دا وڭىردە بىرلەسە جۇمىس ىستەۋگە نيەتتى. ولار بۇگىنگە دەيىن وسكەمەندەگى بەس ورتالىق كوشەگە ەكى ايدىڭ ىشىندە 501 كوشە شامىن ورناتقان. كومپانيا مۇنداي اقىلدى شامدارداردى ويلاپ تاپقان امەريكالىق Ubicell كومپانياسىمەن بىرلەسە جۇمىس ىستەۋدە.
بۇلارمەن ودان ءارى جۇمىس ىستەۋ ماسەلەسى وبلىس اكىمى دانيال احمەتوۆتىڭ توراعالىعىمەن وتكەن تاراپتار اراسىنداعى كەزدەسۋ بارىسىندا جان- جاقتى تالقىعا سالىندى.
«ءبىز جارىق ديودتى شامداردى شىعارۋمەن اينالىسامىز. بۇرىن شام عانا شىعارساق، ەندى كۇش بىرىكتىرىپ ولاردىڭ تەحنولوگياسىن، بىلايشا ايتساق «ميىن» قولدانىپ، اقىلدى شامدار شىعارىپ جاتىرمىز. بۇل شامدار بۇرىنعىعا قاراعاندا جارىقتىعىمەن قوسا، 65 پايىزعا دەيىن ۇنەمدىلىك اكەلەدى»، - دەدى شامداردى تانىستىرۋ راسىمىندە LED Solution كومپانياسىنىڭ ديرەكتورى قانىبەك ايتاقوۆ.
«ەڭ باستىسى، كومپانيا باسەكەگە قابىلەتتى ەكەندىگىن ءىس جۇزىندە كورسەتۋى ءتيىس. سىزدەردىڭ ايتقاندارىڭىز كوڭىلگە قونىمدى. تاعى ءبىر مارتە كوزىمدى جەتكىزۋ ءۇشىن بۇگىن تۇندە قالا كوشەلەرىن تاعى ءبىر ارالاپ كورىپ شىعامىن. بايقايمىن، قازاقستان كوشەسى مەن ورتالىق مەشىت ماڭى جارىق بولا تۇسكەندەي»، - دەگەن وبلىس اكىمى كومپانيا وكىلدەرىنە قايىرىمدىلىق كومەگى رەتىندە الدىمەن ورتالىق مەشىتتىڭ بارلىق قابىرعالىق شامدارىن اۋىستىرىپ شىعۋدى تاپسىردى.